చెరువులో పడి బాలుడి మృతి

చెరువులో పడి బాలుడి మృతి

తాండూరు రూరల్‌: చెరువులో పడి ఓ బాలుడు మృతి చెందాడు. ఈ సంఘటన తాండూరు మండలం ఎల్మకన్నె గ్రామంలో ఆదివారం చోటు చేసుకుంది. కరన్‌కోట్‌ ఎస్‌ఐ విఠల్‌రెడ్డి, బాధితుల కథనం ప్రకారం.. గ్రామానికి చెందిన కుంచెరుకుల రమేష్‌(12).. శనివారం సాయంత్రం అమ్మమ్మ, మామయ్య, అత్తమ్మలతో కలిసి గ్రామ సమీపంలోని బీరప్ప చెరువు సమీపంలో వంట చెరుకు కోసం ఆటోలో వెళ్లారు. రమేష్‌ను వాహనంలో కూర్చోబెట్టి చెరువు సమీపంలో చెరుకు కోసం కుటుంబ సభ్యులు వెళ్లారు. తిరిగి వచ్చి చూసేసరికి బాలుడు కనిపించలేడు. చెరువుల సమీపంలో బట్టలు కనిపించాయి. విషయం గ్రామస్తులకు చెప్పారు. రాత్రి కావడంతో అచూకీ లభించలేదు. వెంటనే పోలీసులకు ఫిర్యాదు చేశారు. ఆదివారం పోలీసులు, గ్రామస్తులు చెరువు వద్దకు వెళ్లారు. చెరువులో వెతకగా బాలుడి మృతదేహం లభ్యమైంది. పోస్టుమార్టం నిమిత్తం తాండూరు జిల్లా ఆస్పత్రికి తరలించారు. కేసు నమోదు చేసుకుని దర్యాప్తు చేస్తున్నామని ఎస్‌ఐ తెలిపారు.