నేరెడ్‌మెట్‌లో మహిళ హల్‌చల్

ఇద్దరు చిన్నారులను నీటి సంపులో పడేసేందుకు యత్నించిన మహిళను స్థానికులు అడ్డుకొని పోలీసులకు సమాచారం అందించారు. ఈ సంఘటన నగరంలోని నేరెడ్‌మెట్ రమాబ్రహ్మంనగర్‌లో శుక్రవారం వెలుగుచూసింది. ఈ ప్రాంతంలో నివాసముంటున్న సౌజన్య గత కొంత కాలంగా ఉన్మాదిలా మారి తనను తాను గాయపర్చుకోవడం లేదా.. ఎవరిపైనైనా దాడి చేయడం లాంటి చర్యలకు పాల్పడుతోంది. ఈ క్రమంలో ఈ రోజు ఇద్దరు చిన్నారులను సంపులో వేయడానికి యత్నించింది. దీన్ని అడ్డుకునేందుకు చూసిన చిన్నారుల తల్లిపై కారం చల్లి ఆమెను గాయపరిచింది. గత కొన్నెళ్లుగా ఈమె బారిన పడిన స్థానికులు సౌజన్యపై కఠిన చర్యలు తీసుకోవాలని పోలీసులను కోరుతున్నారు. అందర్ని ఇబ్బంది పెట్టడమే కాకుండా.. తనను హింసిస్తున్నారని తిరిగి కాలనీ వాసులపై పోలీసులకు ఫిర్యాదు చేస్తోందని.. రోజురోజుకు సౌజన్య ఆగడాలు మితిమీరిపోతున్నాయని స్థానికులు ఆగ్రహం వ్యక్తం చేస్తున్నారు. సంఘటనా స్థలానికి వచ్చిన పోలీసులను చుట్టుముట్టిన స్థానికులు ఆ మహిళ నుంచి రక్షణ కల్పించాలని మొర పెట్టుకుంటున్నారు.