TV
గాలమేసి.. దోచేశారు! టీనేజ్ దొంగల 'స్మార్ట్' గేమ్!
అమెరికాలో కుర్ర దొంగలు తెలివి మీరిపోయారు. మొబైల్ గేమ్ 'పోకేమ్యాన్ గో' తో గాలమేసి.. పలువురికి కుచ్చుటోపీ పెట్టారు. 'పోకేమ్యాన్ గో' గేమ్ ద్వారా పరిచయమైన వారిని తెలివిగా ఓ నిర్మానుష ప్రాంతానికి రప్పించి వారిని నిలువుదోపిడీ చేసిన నలుగురు టీనేజ్ దొంగలను తాజాగా మిస్సోరి పోలీసులు అరెస్టు చేశారు.
తాజాగా విడుదలైన 'పోకేమ్యాన్ గో' గేమ్ కొత్త ఫీచర్లు అందుబాటులోకి తెచ్చింది. దానిప్రకారం ఈ గేమ్ ఆడేటప్పుడు పేర్కొనే ప్రాంతాలకు వెళ్లి బొమ్మలు సేకరించాలని నిర్దేశిస్తుంది. ఇలాంటి ప్రాంతాల్లో దారిచూపే గుర్తులు పెట్టి తెలివిగా వారిని బోల్తా కొట్టించిన ఈ నలుగురు దొంగలు.. తాము అనుకున్న నిర్మానుష్య ప్రాంతానికి బాధితులు రాగానే వారిని దోచేసేవారు. బాధితుల ఫిర్యాదు ప్రకారం రంగంలోకి దిగిన పోలీసులు నలుగురు దొంగలను అరెస్టు చేశారు. సెయింట్ లూయిస్ కు సమీపంలోని ఓఫాలన్ ప్రాంతానికి చెందిన ఈ నలుగురు నిందితుల వయస్సు 16 నుంచి 18 ఏళ్లు అని పోలీసులు తెలిపారు.
