రాజాం సిటీ : గ్యాస్‌ సిలిండర్లు.. గ్యాస్‌ ట్యాంకర్లు పేలడం విన్నాం. కానీ వాహనాల టైర్లకు గాలిని పెట్టేందుకు వినియోగించే ట్యాంకర్‌ కూడా పేలింది. ఈ సంఘటన రాజాంలో గురువారం చోటుచేసుకుంది. ఈ ప్రమాదంలో ఇద్దరు గాయపడ్డారు. వీరిలో ఒకరి పరిస్థితి విషమంగా ఉంది. ఈ ఘటన స్థానికులను భయాందోళనకు గురిచేసింది. రాజాంలోని పాలకొండ రోడ్డు సీతారామ థియేటర్‌ సమీపంలో వాహనాలకు పంక్చర్లు, గాలికొట్టే షాపు ఉంది. గురువారం మధ్యాహ్నం 12.30 గంటల సమయంలో షాపులో ఉన్న ఎయిర్‌ ట్యాంకర్‌ పెద్దశబ్దంతో పేలిపోయి సుమారు 30 అడుగుల దూరంలో రోడ్డుపై పడింది. దీంతో ఏమి జరిగిందో తెలియక షాపు వద్ద ఉన్నవారు, రోడ్డుపై వెళ్తున్నవారు ఆందోళన చెందారు. భయంతో పరుగులు తీశారు. ఈ సంఘటనలో షాపు వద్ద ఉన్న బీహార్‌కు చెందిన జుగున్‌ అనే వ్యక్తి తీవ్రంగా గాయపడ్డాడు. ఇతని రెండు చేతులు పూర్తిగా తెగిపోయి నుజ్జునుజ్జు అయ్యాయి. అలాగే ట్యాంకర్‌ ఎగిరి పడడంతో రోడ్డుపై వెళ్తున్న వంగర మండలం జగన్నాథవలస గ్రామానికి చెందిన పి.ఏసుబాబుకు తగలడంతో కాలుకి గాయమైంది.  తీవ్రంగా గాయపడిన జుగున్‌ను 108 వాహనంలో రాజాంలోని సామాజిక ఆస్పత్రికి తరలించారు.  పరిస్థితి విషమంగా ఉండడంతో శ్రీకాకుళంలోని రిమ్స్‌ ఆస్పత్రికి రిఫర్‌ చేశారు. అలాగే కాలుకి గాయమైన ఏసుబాబును రాజాం సీహెచ్‌సీకి తరలించారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.  – బతుకు తెరువుకు వచ్చి.. బీహార్‌ నుంచి బతుకు తెరువు కోసం రాజాం వచ్చిన జుగున్‌ స్థానికంగా మార్బుల్స్‌ అమర్చే పనులు చేసుకుంటూ జీవనం సాగిస్తున్నాడు.  ఖాళీ సమయాల్లో పరిచయం ఉన్న పంక్చర్లు వేసే షాపు వద్దకు వచ్చి సంబంధిత యజమానితో సరదాగా మాట్లాడుతుండేవాడు. గురువారం కూడా షాపు వద్ద కూర్చొని మాట్లాడుకుంటుండగా ట్యాంకర్‌ పేలింది. ఈ ప్రమాదంలో అతని రెండు చేతులు పూర్తిగా దెబ్బతినడం స్థానికులను కలచి వేసింది. ప్రమాద సమయంలో జనసంచారం తక్కువగా ఉండడంతో పెను ప్రమాదం తప్పిందని స్థానికులు చెబతున్నారు. 


 ♦ గుడికి వెళ్లి తిరిగి వస్తుండగా ప్రమాదం
 ♦ పంక్చర్‌ దుకాణం నిర్వాహకుడి నిర్లక్ష్యంతో ఘటన
 ♦ మృతదేహంతో రోడ్డుపై బైఠాయించిన బంధువులు  
 
 గండేడ్: గాలి ట్యాంకర్‌ పేలడంతో సమీపంలో నడుచుకుంటూ వెళ్తున్న ఓ వ్యక్తి తీవ్రంగా గాయపడి దుర్మరణం చెందాడు. ఈ సంఘటన మండల పరిధిలోని మహమ్మదాబాద్‌లో శనివారం చోటుచేసుకుంది. పోలీసులు తెలిపిన వివరలా ప్రకారం.. గ్రామానికి చెందిన ఈడిగి గోవర్ధన్‌గౌడ్‌ (40) స్థానికంగా చిరు వ్యాపారంతోపాటు వ్యవసాయం చేసుకుంటూ  కుటుంబాన్ని పోషించుకుంటున్నాడు. కొంతకాలంగా ఆయన మండలంలోని గాధిర్యాల్‌ రామానంద ఆశ్రమానికి నిత్యం వెళ్తూ పూజా కార్యక్రమాల్లో పాల్గొంటుండేవాడు. ఇదిలా ఉండగా, శనివారం ఉదయం ఆయన స్థానికంగా ఉన్న రామాంజనేయ స్వామి ఆలయానికి వెళ్లి దైవదర్శనం చేసుకొని తిరిగి ఇంటికి వస్తున్నాడు. ఆయన ఇంటికి సమీపంలో అదే గ్రామానికి చెందిన హఫీజ్‌ పంక్చర్‌ దుకాణం నిర్వహిస్తున్నాడు. ఇతడి కుమారుడు వసీద్‌ వాహనాలకు గాలి పెట్టేందుకు ఉన్న ట్యాంకును జనరేటర్‌తో స్టార్ట్‌ చేసి గాలి నింపుతున్నాడు. అతడు నిర్లక్ష్యంగా వ్యవహరించడంతో ట్యాంకు కెపాసిటీ కంటే గాలి ఎక్కువ కావడంతో ఒక్కసారిగా పెద్దశబ్ధంతో పేలిపోయింది. అదే సమయంలో, అటుగా వస్తున్న గోవర్ధన్‌గౌడ్‌ కాళ్లకు తగిలింది. తీవ్ర రక్తస్రావమైన అతడిని వెంటనే కుటుంబీకులు కట్టుకట్టి ఓ వాహనంలో మహబూబ్‌నగర్‌ ఆస్పత్రికి తరలించారు. అంతలోనే గోవర్ధన్‌ మృతిచెందాడు. అయితే, గతంలో గాలిట్యాంకర్‌ రెండుసార్లు పేలింది. అప్పట్లో ఓ డాక్టర్‌ ప్రాణాపాయం నుంచి బయటపడ్డాడు.  
 
 న్యాయం చేయాలని రోడ్డుపై ధర్నా
 పంక్చర్‌ దుకాణం నిర్వాహకుడి నిర్లక్ష్యానికి ఓనిండు ప్రాణం బలైపోయిందని మృతుడి కుటుంబీకులు, బంధువులు గోవర్ధన్‌గౌడ్‌ మృతదేహంతో అంతర్రాష్ర్ట లింకు రోడ్డుపై సుమారు 4 గంటల పాటు బైఠాయించి ఆందోళనకు దిగారు. దీంతో రోడ్డుకు ఇరువైపులా కిలోమీటర్ల మేర వాహనాలు ఆగిపోయాయి. మహమ్మదాబాద్‌ ఎస్‌ఐలు రాజేందర్‌రెడ్డి, వెంకటేశ్‌ మృతుడి కుటుంబీకులకు నచ్చజెప్పేందుకు యత్నించినా ఫలితం లేకుండా పోయింది. మృతుడి బంధువులు, స్నేహితులు రోడ్డుపై టైర్లువేసి తగులబెట్టారు. మృతుడికి భార్య స్వరూప, కూతుళ్లు ఆనందమయి(5), చందన(2) ఉన్నారు. మృతుడి కుటుంబీకుల ఫిర్యాదు మేరకు పంక్చర్‌ దుకాణం యజమానిపై కేసు నమోదు చేసినట్లు పోలీసులు తెలిపారు. మృతుడి కుటుంబానికి న్యాయం చేసేందుకు కృషి చేస్తామని పోలీసులు హమీ ఇవ్వడంతో ఆందోళనకారులు శాంతించారు.