భారీ బడ్జెట్ చిత్రంలో నటించనున్న కథానాయకుడు జయంరవి అన్నది తాజాగా కోలీవుడ్ వర్గాల్లో వినిపిస్తున్న సమాచారం. ప్రముఖ చిత్ర నిర్మాణ సంస్థ శ్రీతేనాండాళ్ ఫిలింస్ తన వందవ చిత్రంగా భారీ చారిత్రక కథా చిత్రాన్ని నిర్మించడానికి సన్నాహాలు చేస్తున్న విషయం తెలిసిందే. సక్సెస్‌ఫుల్ చిత్రాల దర్శకుడు సుందర్.సీ దర్శకత్వం వహించడానికి రెడీ అవుతున్న ఈ బ్రహ్మాండ చిత్రంలో హీరో ఎవరన్న విషయంపై టాలీవుడ్ సూపర్‌స్టార్ మహేశ్‌బాబు, ఇళయదళపతి విజయ్, సూర్య పేర్లు పరిశీలనలో ఉన్నట్లు ప్రచారం జరిగింది.
  
   దాదాపు ఏడాది పాటు చిత్రీకరణ జరుపుకునే ఈ చిత్రంలో నటించడానికి పైన చెప్పిన ముగ్గురు నటులు సాహసం చేయలేదు. కారణం కథ నచ్చినా అని కాల్‌షీట్స్ కేటాయించలేని పరిస్థితి అని సమాచారం. ఇప్పుడీ చిత్రంలో వరుస విజయాలతో దూసుకుపోతున్న యువ నటుడు జయంరవి హీరోగా నటించడానికి సంసిద్ధత వ్యక్తం చేసినట్లు తెలిసింది. నవంబర్‌లో సెట్‌పైకి వెళ్లనున్న ఈ చిత్రంలో హీరోయిన్, ఇతర నటవర్గం, సాంకేతిక బృందం ఎంపిక జరుగుతోందని సమాచారం. ఈ చిత్రానికి సంగీత మాంత్రికుడు ఏఆర్.రెహ్మాన్ సంగీత బాణీలను, సబు శిరిల్ కళాదర్శకత్వాన్ని, కమల్‌కన్నన్ వీఎఫ్‌ఎక్స్ బాధ్యతలను నిర్వహించనున్నారు.
  


 - దర్శకుడు సుందర్. సి
  ‘‘వాస్తవానికి ‘చంద్రకళ’కు సీక్వెల్ చేయాలనుకోలేదు. ఆ చిత్రంలో చివర్లో దెయ్యం బంగ్లాలో ఉన్నట్టు చూపించాను. దాంతో చాలామంది సీక్వెల్ చేస్తున్నారా? అని అడిగారు. అప్పుడు అనిపించింది... ఎందుకు సీక్వెల్ చేయకూడదు అని. మొదటి పార్ట్ కంటే భారీగా ఈ చిత్రం తీశాను. సక్సెస్ పరంగా కూడా తొలి భాగంకన్నా భారీగా ఉంటుంది’’ అని దర్శకుడు సుందర్.సి.
  
   అన్నారు. సిద్ధార్ధ్, హన్సిక, త్రిష, పూనమ్ బజ్వా, సుందర్.సి ప్రధాన పాత్రల్లో తమిళంలో రూపొందిన ‘అరన్మణై 2’ చిత్రం తెలుగులో ‘కళావతి’గా విడుదల కానుంది. జవ్వాజి రామాంజనేయులు సమర్పణలో సర్వాంత్ రామ్ క్రియేషన్స్, గుడ్ సినిమా గ్రూప్ ఈ చిత్రాన్ని అందిస్తున్నాయి. హిప్ హాప్ తమిళ స్వరపరచిన ఈ చిత్రం పాటలను నిర్మాత ‘దిల్’ రాజు ఆవిష్కరించి, చిత్రదర్శకుడు సుందర్‌కి అందించారు.‘‘సుందర్‌గారి దర్వకత్వంలో ఇప్పటికే ఓ చిత్రం చేశాను. ప్రేక్షకులను ఎక్కడ భయపెట్టాలో, ఎక్కడ థ్రిల్ చేయాలో ఆయనకు బాగా తెలుసు’’ అని సిద్ధార్ధ్ అన్నారు.
  
   ‘‘ఈ నెల 29న చిత్రాన్ని విడుదల చేయాలనుకుంటున్నాం. జవ్వాజి రామాంజనేయులుగారి సహాయం మర్చిపోలేను. సుందర్‌గారు త్వరలో తెలుగులో ఓ స్ట్రయిట్ చిత్రం చేయాలని కోరు కుంటున్నా’’ అని నటి, సుందర్ సతీమణి ఖుష్బూ పేర్కొన్నారు. ‘‘ఈ చిత్రం ట్రైలర్‌ను ఇప్పటివరకూ మూడు లక్షల యాభైవేల మంది చూడటం విశేషం’’ అని జవ్వాజి రామాంజనేయులు అన్నారు. ‘దిల్’ రాజు, మారుతి తదితరులు మాట్లాడారు.