కొవ్వూరు : ఐదేళ్ల క్రితం వరకూ లాభాల తీపి పంచిన చెరకు సాగు నష్టాల సుడిగుండంలో కొట్టుమిట్టాడుతోంది. జిల్లాలో 40 వేల హెక్టార్లలో విస్తరించిన చెరకు సాగు క్రమంగా తగ్గుతూ.. ప్రస్తుతం 8,500 హెక్టార్లకు పడిపోయింది. ప్రభుత్వ పరంగా ప్రోత్సాహకాలు అందకపోవడం, పంచదార పరిశ్రమల దయాదాక్షిణ్యాలపైనే ఆధారపడాల్సి రావడంతో చెరకు సాగుపై రైతుల్లో ఆసక్తి సన్నగిల్లుతోంది. గిట్టుబాటు ధర లభించకపోవడం, పెట్టుబడులు పెరగడంతో రైతులు ప్రత్యామ్నాయ పంటల వైపు మొగ్గుచూపు తున్నారు. జిల్లాలో గత ఏడాదితో  పోలిస్తే ఈ ఏడాది సుమారు 40 శాతం సాగు విస్తీర్ణం తగ్గింది. గత ఏడాది 13,500 హెక్టార్లలో చెరకు సాగు చేస్తే ఈ ఏడాది 8,500 హెక్టార్లకు మాత్రమే పరిమితమైంది. 
 ‘చాగల్లు’ పరిధిలో సాగుకు స్వస్తి
 ఈ ఏడాది జిల్లాలోని చాగల్లు షుగర్‌ ఫ్యాక్టరీ పరిధిలో చెరకు సాగుకు రైతులు పూర్తిగా స్వస్తి పలికారు. 
 గతం లో వేసిన కార్శి తోటలు మాత్రమే ఇక్కడ సాగువుతున్నాయి. అదికూడా బెల్లం తయారీ కోసం మాత్రమే సాగు చేస్తున్నారు. ఒకప్పుడు ఈ ప్రాంతంలో 15 వేలకు పైగా హెక్టార్లలో (సుమారు 50 వేల ఎకరాలు) చెరకు సాగయ్యేది. ప్రస్తుతం 3,350 హెక్టార్ల (8,375 ఎకరాలు)కు మాత్రమే పరిమితమైంది. చాగల్లు షుగర్స్‌ యాజమాన్యం చెరకు పండించిన రైతులకు రెండేళ్లుగా బకాయిలు సక్రమంగా బకాయిలు చెల్లించడం లేదు. ఆ సొమ్మును రాబట్టుకునేందుకు రైతులు తీవ్రస్థాయిలో ఆందోళనలు చేశారు. చివరకు రెవెన్యూ రికవరీ యాక్ట్‌ను సైతం ప్రయోగించాల్సిన పరిస్థితి ఏర్పడింది. ఈ నేపథ్యంలో కొవ్వూరు, తాళ్లపూడి మండలాల్లో ఈ ఏడాది రెండు వేలకు పైగా ఎకరాల్లో చెరకు పంటకు స్వస్తి పలికారు. గోపాలపురం, దేవరపల్లి, పోలవరం, నిడదవోలు మండలాల పరిధిలో రైతులు సైతం ప్రత్యామ్నాయ పంటల వైపు మళ్లారు. 
 పరిశ్రమల మూత
 జిల్లాలో షుగర్‌ ఫ్యాక్టరీలు నడపడానికి అవసరమైన స్థాయిలో చెరకు లభ్యం కావడం లేదు. ఈ కారణంగా ఇప్పటికే తణుకులోని పంచదార పరిశ్రమను మూసివేసిన విషయం తెలిసిందే. నల్లజర్ల మండలం పోతవరంలో నూతనంగా నిర్మించిన షుగర్‌ ఫ్యాక్టరీ సైతం మూతపడింది. తణుకు, జంగారెడ్డిగూడెంలలో షుగర్‌ ఫ్యాక్టరీలకు అనుబంధంగా నడుస్తున్న మొలాసిస్‌ పరిశ్రమలు కూడా మూతపడ్డాయి. ఈ కారణంగా వేలాది మంది కార్మికుల ఉపాధి సైతం దెబ్బతింటోంది. ఇలాంటి పరిస్థితుల్లోనూ చెరకు రైతులు, ఫ్యాక్టరీలు, కార్మికులను సంక్షోభం నుంచి గట్టెక్కిం  చేందుకు ప్రభుత్వం ఎలాంటి చర్యలు చేపట్టకపోవడంపై విమర్శలు వెల్లువెత్తుతున్నాయి.
  చెరకు రైతులను పట్టించుకోవట్లేదు
 చెరకు సాగును ప్రభుత్వం పూర్తిగా విస్మరించింది. ప్రభుత్వపరంగా రైతులకు ప్రోత్సాహకాలు, రాయితీలు  ఇవ్వడం లేదు. కేన్‌ డెవలప్‌మెంట్‌ కౌన్సిల్‌ ఉన్నప్పటికీ రైతులకు ఏవిధంగానూ సహాయపడటం లేదు. ఫ్యాక్టరీ యాజమాన్యాలు రైతులకు చెల్లించాల్సిన సొమ్ములు ఏళ్ల తరబడి బకాయిపడినా ప్రభుత్వం పట్టించుకోవడం లేదు. ఈ కారణంగానే రైతులు చెరకు సాగుకు దూరమవుతున్నారు. ఫలితంగా చెరకు ఫ్యాక్టరీలు, అనుబంధ కర్మాగారాలు మూతపడుతున్నాయి. పారిశ్రామిక మంత్రం జపిస్తున్న ప్రభుత్వం చెరకు ఫ్యాక్టరీలు మూతపడుతున్నా పట్టించుకోకపోవడం శోచనీయం.– ముళ్లపూడి కాశీవిశ్వనాథ్, చెరకు రైతుల సంఘం నాయకుడు, ధర్మవరం
 యాంత్రీకరణతో గట్టెక్కవచ్చు
 చెరకు సాగులో పెట్టుబడులు పెరిగాయి. చిన్న కమతాలు కావడంతో రైతులు యాంత్రీకరణను వినియోగించుకోలేకపోతున్నారు. ప్రధానంగా కూలీల కొరత తీవ్రంగా ఉంది. ఇలాంటి కారణాల వల్ల రైతులు వాణిజ్య పంటల వైపు మొగ్గు చూపుతున్నారు. యంత్రాలను వినియోగిస్తే సాగు ఖర్చులు తగ్గించుకునే అవకాశం ఉంది. చాగల్లు ఫ్యాక్టరీ పరిధిలో బకాయిలు పెండింగ్‌ ఉండటం ఈ ప్రాంతంలో చెరకు సాగు తగ్గడానికి కారణం. – ఎ.సీతారామారావు, 
 అసిస్టెంట్‌ కేన్‌ కమిషనర్, తణుకు 
  


 ‘కృష్ణా డెల్టా ఆయకట్టుకు జూలై 16వ తేదీ నాటికి నీరందిస్తాం. ఒక్క ఎకరం కూడా ఎండిపోకుండా చూసే బాధ్యత మాది’ దెందులూరు ఎమ్మెల్యే చింతమనేని ప్రభాకర్, జిల్లా అధికారులు, ప్రభుత్వ పెద్దలు పదేపదే చెప్పిన మాటలివి. జూలై 16 కాదుకదా.. ఆగస్టు 16 దాటిపోయినా దెందులూరు, ఏలూరు నియోజకవర్గాల్లోని కృష్ణా ఆయకట్టుకు నీరు మాత్రం రాలేదు. నారుమడులు ఎండిపోతుండగా.. రైతులు నాట్లు వేయాలా వద్దా అనే సందిగ్ధంలో ఉండిపోయారు.
 సాక్షి ప్రతినిధి, ఏలూరు : కృష్ణా కాలువ పరిధిలో జిల్లాలోని పెదపాడు, ఏలూరు, దెందులూరు మండలాల్లో 58 వేల ఎకరాల ఆయకట్టు ఉంది. దీనికి ప్రకాశం బ్యారేజీ నుంచి కృష్ణా కెనాల్‌ ద్వారా నీరు అందించాల్సి ఉంది. చుక్క నీరు కూడా రాకపోవడంతో చాటపర్రు, పాలగూడెం, కొమడవోలు, జాలిపూడి, కాట్లం పూడి, మాదేపల్లి, లింగారావుగూడెం, పోణంగి తదితర గ్రామాల్లో 12 వేల ఎకరాల్లో వేసిన నారుమళ్లు ఎండిపోతున్నాయి. పట్టిసీమ ఎత్తిపోతల పథకం ద్వారా గోదావరి జలాలను తరలించి జూలై 16వ తేదీ నాటికి కృష్ణా డెల్టాకు ఇస్తామని ప్రభుత్వం చెప్పింది. ఇప్పటివరకూ పట్టిసీమ నుంచి పూర్తి సామర్థ్యంతో నీటిని తీసుకువెళ్లింది లేదు. 4,200 క్యూసెక్కుల నీటి ప్రవాహానికే కృష్ణా జిల్లా రామిలేరు వద్ద పోలవరం ప్రాజెక్ట్‌ కుడి కాలువకు గండిపడింది. దీంతో నీటి తరలింపును నిలిపివేశారు. తాజాగా ఒకటి రెండు మోటార్ల ద్వారా నీటిని తరలిస్తున్నారు. కృష్ణా డెల్టాకు 15 వేల క్యూసెక్కుల నీరివ్వాల్సి ఉండగా, ప్రస్తుతం పట్టిసీమ ద్వారా వెళ్లిన ఆరు టీఎంసీల నీరు ఏ మాత్రం సరిపోలేదు. మరోవైపు కృష్ణా పుష్కరాల నేపథ్యంలో అక్కడి నదిలో నీటిమట్టం ఉండేలా చూసేందుకే ప్రభుత్వం ప్రాధాన్యత ఇచ్చింది. ప్రభుత్వ పెద్దలు, ప్రజాప్రతినిధులు ఇచ్చిన హామీని నమ్ముకుని పంటలు వేసిన రైతుల పరిస్థితి అగమ్యగోచరంగా తయారైంది.
 గోదావరి జలాలూ ఇచ్చింది లేదు.. పోణంగిపుంత పథకం పనులు పూర్తి కాకపోవడం వల్ల గోదావరి నీరు కూడా తరలించే అవకాశం లేకుండా పోయింది. దీంతో చేలు బీడువారి నారుమళ్లు, నాట్లు ఎండుతున్నాయి. ఇప్పటికే సాగు చేపట్టిన రైతులు పూర్తిగా నష్టపోతుండగా, మిగిలిన రైతులు నాట్లు వేయాలా వద్దే ఆనే మీమాంసలో ఉన్నారు. ఇప్పటికే అదును దాటిపోయింది. ఈ నెలలో నాట్లు వేస్తే పంట కోతకు వచ్చే సమయంలో వాయుగుండం, అల్పపీడనాలు ముంచుకొచ్చే ప్రమాదం ఉంది. 
 కస్సుబుస్సులాడిన ఎమ్మెల్యే
 రెండు రోజుల క్రితం పంట బోదెల ద్వారా కొంతమేర నీరు వచ్చినా.. మోటార్లతో తోడుకుంటేగాని చేలకు అందని పరిస్థితి. వంతులవారీగా నీరు తోడుకునే విషయంలో రైతుల మధ్య గొడవలు జరుగుతున్నాయి. ఎగువ రైతులు పూర్తిగా వాడుకున్న తర్వాత గాని దిగువకు నీరి వ్వడానికి అంగీకరించడం లేదు. నీటి విషయం అడిగితే దెందులూరు ఎమ్మెల్యే, ప్రభుత్వ విప్‌ చింతమనేని ప్రభాకర్‌ ఎవరినడిగి పంటలు వేశారంటూ కస్సుబుస్సులాడుతున్నారని రైతులు ఆవేదన వ్యక్తం చేస్తున్నారు. ప్రస్తుతం అపరాలు వేసే పరిస్థితి కూడా లేదు. ఎప్పుడు వర్షం పడుతుందో తెలియని స్థితిలో అపరాలు వేసినా నష్టపోవాల్సి వస్తుందని అన్నదాతలు ఆందోళన వ్యక్తం చేస్తున్నారు. గత ఏడాది ఖరీఫ్, రబీ పంటలు రెండూ వేయలేకపోయారు. ఫలితంగా ఆ ప్రాంతంలోని 14 వేల మంది కౌలు రైతులు, 20 వేల మంది వ్యవసాయ కార్మికులు ఉపాధి కోల్పోయారు. ఈ ఏడాది ఖరీఫ్‌పై ఆశలు పెట్టుకున్నా ప్రభుత్వానికి చిత్తశుద్ధి లేకపోవడంతో సాగు పరిస్థితి అగమ్యగోచరంగా తయారైంది.
 రైతుల నుంచి సొమ్ము వసూలు
 ఏలూరు మండలంలోని కొద్దిపాటి ఆయకట్టును కాపాడుకునే అవకాశం ఉన్న తూర్పు లాకుల నుంచి గోదావరి నీటిని మోటార్ల సాయంతో తోడి కాలువలోకి పంపిస్తున్నారు. గత ఏడాది ప్రభుత్వ ఖర్చుతో నీటిని తోడగా, ఈ ఏడాది కూడా అదే పని చేస్తున్నారు. అయితే, దొడ్డిదారిన రైతుల నుంచి సొమ్ము వసూలు చేస్తున్నారు. ఒక్కొక్కరి నుంచి ఎకరాకు రూ.500 చొప్పున తీసుకుంటున్నారు. అయినా, ఆ నీరు వరి పంటకు కాకుండా చేపల చెరువులకు మళ్లిస్తున్నారన్న విమర్శలు వినిపిస్తున్నాయి.