ట్రాన్స్‌ఫార్మర్స్‌, ఇండియానా జోన్స్‌ వంటి ప్రతిష్టాత్మక హాలీవుడ్‌ సినిమాలు తీసిన అగ్రహీరో షాయా లాబౌఫ్‌ తాజా సినిమా 'మ్యాన్‌ డౌన్‌' బ్రిటన్‌ బాక్సాఫీస్‌కు ఒకరకంగా బాంబు పెట్టింది. డైరెక్టర్‌ డిటో మాంటియల్‌ రూపొందించిన ఈ వార్‌ డ్రామా బ్రిటన్‌లో కేవలం ఏడుపౌండ్లు (రూ. 567) మాత్రమే వసూలు చేసింది. ఈ కలెక్షన్‌ కూడా ఒక్క టికెట్‌దే కావడం గమనార్హం.
 
 ఈ సినిమా కేవలం ఒక్క థియేటర్‌లోనే విడుదలైంది. ఆ థియేటర్‌లోనూ కేవలం ఒక్క టికెట్‌ మాత్రమే అమ్ముడుపోయినట్టు తెలుస్తోంది. గతంలో పలు సూపర్‌హిట్‌ సినిమాలు తీసిన లాబౌఫ్‌ ఇటీవల అమెరికా అధ్యక్షుడు డొనాల్డ్‌ ట్రంప్‌కు వ్యతిరేకంగా నిరసనల్లో పాల్గొని అరెస్టైన సంగతి తెలిసిందే. ఇప్పుడు మళ్లీ అతను సినిమాలపై దృష్టి పెట్టాడు. పెద్దగా కలెక్షన్‌ ఏమీ లేకపోవడంతో ఈ సినిమాను వెంటనే వీడియో ఆన్‌ డిమాండ్‌ పేరిట ఆన్‌లైన్‌లో పెట్టేశారు.
 
 లాబౌఫ్‌ సినిమానే కాదు గతంలో పలు హాలీవుడ్‌ సినిమాలు కూడా ఇలాగే బాక్సాఫీస్‌కు దిమ్మతిరిగే షాక్‌ ఇచ్చాయి. అమెరికాలో రెండువేలకుపైగా థియేటర్లలో విడుదలైన పిల్లల సినిమా ద వూజీలవ్స్‌ ఇన్‌ ద బిగ్‌ బెలూన్‌ అడ్వంచర్‌ (2012)..కేవలం 206 డాలర్లు మాత్రమే వసూలు చేసింది. అమెరికాలో ఒక్క టికెట్‌ ధర 10 డాలర్లు. ఇక హ్యాలీ బెర్రీ నటించిన డార్క్‌ టైడ్‌ (2012) సినిమా బ్రిటన్‌లో కేవలం 90 పౌండ్లు వసూలు చేసింది. ప్రస్తుతం డిస్నీ నిర్మించిన 'బ్యూటీ అండ్‌ బీస్ట్‌' సినిమాతో తన కెరీర్‌లోనే బిగ్గెస్ట్‌ హిట్‌ అందుకున్న ఎమ్మా వాట్సన్‌కు 2015లో ఇదేరకమైన అనుభవం ఎదురైంది. ప్రపంచవ్యాప్తంగా వేల కోట్ల రూపాయల వసూళ్లు సొంతం చేసుకున్న హ్యారీపొటర్‌ సినిమాలతో తళుక్కుమన్న ఈ అమ్మడు నటించిన 'కలోనియా' చిత్రం బ్రిటన్‌లో కేవలం 47పౌండ్లు వసూలు చేసింది.
  


 నచ్చిన స్టార్‌తో కాసేపు మాట్లాడితే ఆ కిక్కే వేరు. అందుకే సినిమా స్టార్స్ కనబడగానే.. వారితో ఫొటోలు దిగడానికి, కరచాలనం చేయడానికి ప్రజలు ఎగబడుతుంటారు.. అయితే ఇక్కడో అభిమాని మాత్రం మరీ విచిత్రంగా ప్రవర్తించాడు. తన అభిమాన హీరో కనిపించగానే.. అతన్ని అడిగి మరీ గూబ గుయ్యిమనిపించుకున్నాడు. ఈ ఘటన హాలీవుడ్ స్టార్ హీరో షియా లాబియప్‌ విషయంలో జరిగింది.
 
 'ట్రాన్స్‌ఫార్మర్స్', 'ఫ్యూరీ' వంటి సినిమాలతో ప్రపంచవ్యాప్తంగా పరిచితమైన ఈ స్టార్ హీరో ఈ మధ్య ఓ చిత్రమైన టీవీ రియాల్టీ షోలో పాల్గొన్నాడు. అందులో భాగంగా ఆక్స్‌ఫర్డ్‌ యూనియన్‌లోని ఓ లిఫ్ట్‌ లో 24 గంటలు గడిపాడు. ఈ సమయంలో అభిమానులు అతన్ని లిఫ్ట్‌లో కలిసి కాసేపు కబుర్లాడారు. ఈ క్రమంలో ఓ అభిమాని కూడా క్యూలో వెయిట్‌ చేసి.. తన అవకాశం రాగానే లిఫ్ట్‌ ఎక్కాడు. తానొక ఫర్మార్మెన్స్ ఆర్టిస్టునని, తనను చెంపదెబ్బ కొట్టి తన ప్రాజెక్టును పూర్తిచేయమని అతను లాబియప్‌ను కోరాడు. చూస్తూ.. చూస్తూ నిన్నెలా ముఖం మీద పంచ్‌ కొట్టాలయ్యా అంటూ లాబియప్‌ సున్నితంగా తిరస్కరించినా.. అతడు పట్టుబడటంతో గట్టిగా ఒకటి పీకాడు. ఈ నెల 19న జరిగిన ఈ ఘటనకు సంబంధించిన వీడియో తాజాగా వెలుగులోకి వచ్చింది. లిఫ్ట్‌ తలుపులు మూసుకున్న వెంటనే లాబియప్‌ అతన్ని ఒక పంచ్‌ కొట్టినట్టు సౌండ్ వినిపించింది. తీరా అదేమిటని ఆరా తీస్తే అభిమాని అడిగి మరీ పంచ్ కొట్టించుకున్నట్టు తేలింది.


  లాస్ ఏంజిలెస్: హాలీవుడ్ యువ నటుడు, దర్శకుడు షియా లాబియోఫ్పై కాలిఫోర్నియాలో షెర్మాన్ ఓక్స్లోని  ‘ద లోకల్ పెజంట్’ రెస్టారెంట్ నిషేధం విధించింది. గత నెల రెస్టారెంట్ బయటి కారు పార్కింగ్ ప్రదేశంలో లాబియోఫ్ మూత్రవిసర్జన చేసినందుకు ఈ నిర్ణయం తీసుకున్నట్లు ఫిమేల్ ఫస్ట్ అనే బ్రిటన్ వెబ్‌సైట్ పేర్కొంది. అయితే తన చర్యపై లాబియోఫ్ అప్పుడే క్షమాపణ చెప్పాడని...రెస్టారెంట్ లోపలకు వెళ్లి ఆహారాన్ని ఆర్డర్ చేసినా మేనేజర్ అతన్ని బయటకు వెళ్లాలంటూ మండిపడ్డాడని ఈ వ్యవహారం గురించి తెలిసిన ఒక వ్యక్తిని ఉటంకిస్తూ వెబ్‌సైట్ తెలిపింది.
 
 ఇదిలా ఉండగా, షియా లాబియోఫ్ను ఈ నెల 26న న్యూయార్క్ పోలీసులు అరెస్ట్ చేశారు. అసభ్యంగా ప్రవర్తించినట్లు, దుర్భాషలాడినట్లు, అనుమతిలేని ప్రదేశంలోకి చొరబడినట్లు షియాపై ఆరోపణలు ఉన్నాయి.   ఈ ఆరోపణలకు సంబంధించి షియా జూలై 24న కోర్టుకు హాజరు కావలసి ఉంది.