ఎన్నికల్లో పార్టీ తరఫున లోక్సభ అభ్యర్థిగా నిలబడాలంటే ... అధిష్టానం మొప్పు పొందాలి. కరెన్సీ నోట్లు వెదజల్లాలి. ఇంకా మాట్లాడితే అదృష్టం కూడా కలసి రావాలి. నిద్రాహారాలు మాని ప్రచారం చేయాలి. ఇంత చేసి ఎన్నికల్లో గెలిస్తే ఓకే. ఓ వేళ ఓడిపోతే ఇంతే సంగతులు. ఈ కష్టం అంతా ఎందుకు రాజ్యసభ సీటు ఇస్తే ఏకంగా వెళ్లి పెద్దల సభలో కాలుమీద కాలు వేసుకుని కూర్చోవచ్చని పలువురు ఆశిస్తుంటారు. ఓ వేళ ఆ అవకాశం అదృష్టం కొద్ది తలుపు తడితే ఎవరైనా ఎగిరి గంతు వేస్తారు. కానీ ఓ పార్టీ అగ్ర నాయకత్వం మాత్రం కేబినెట్లోని మంత్రిగారి భార్యకు రాజ్యసభ సీటుని ఆఫర్ చేసింది. అయితే ఆ ఆఫర్ను సదరు మంత్రిగారి భార్య తొసిపుచ్చింది.
 రాజ్యసభ సీటు ఆఫర్ చేసినందుకు ధన్యవాదాలు... కానీ రాజ్యసభ సీటు కంటే నా కుటుంబంతో గడపడమే నాకు అతి మఖ్యమని భావిస్తున్నానని ప్రకటించింది. దీంతో సదరు మంత్రిగారు భార్య నిర్ణయంతో పార్టీ అగ్రనాయకత్వం కంగుతింది. ఈ రోజుల్లో ఇలాంటి వాళ్లు కూడా ఉన్నారా అని అగ్ర నాయకత్వం ఆలోచనలో పడింది. ఈ సంఘటన ఉత్తరప్రదేశ్లో చోటు చేసుకుంది. రాష్ట్రంలో సీఎం అఖిలేష్ యాదవ్ కేబినెట్లోని అజాంఖాన్ సీనియర్ మంత్రిగా పని చేస్తున్నారు. ఆయన భార్య తంజీమ్ ఫాతిమాకు సమాజ్వాదీ పార్టీ రాజ్యసభ సీటు ఇచ్చి పంపాలని నిర్ణయించింది. ఆ ఆఫర్ ఆజాంఖాన్ భార్య నిర్ద్వందంగా తోసి పుచ్చింది.