మామూలుగానేమనలో చాలామందికి జుట్టుఎక్కువగా రాలిపోతుంటుంది. ఇంకొంతమందిలో అయితే జుట్టు చాలా ఎక్కువగా రాలుతూ తమకు బట్టతల వస్తుందేమోఅన్న బెంగ కలిగిస్తుంటుంది. ఇలాంటి వారు తెలుసుకోవాల్సిన కొన్ని విషయాలూ, వివరాలూ ఇవి... జెండర్‌ ప్రకారం చూస్తే బట్టతలలో రెండు రకాలుంటాయి. మొదటిది పురుషుల్లో వచ్చే బట్టతల. దీన్నే ‘మేల్‌ ప్యాట్రన్‌ హెయిర్‌లాస్‌’ అంటారు. ఇక రెండోది మహిళల్లో వచ్చే ‘ఫిమేల్‌ ప్యాట్రన్‌ హెయిర్‌లాస్‌’. బట్టతలను వైద్యపరిభాషలో ‘యాండ్రోజెనిక్‌ అలొపేషియా’ అంటారు.  బట్టతల... కారణాలు  గతకొద్దికాలం వరకూ పురుషుల్లో బట్టతల రావడానికి కారణం టెస్టోస్టెరాన్‌ హార్మోన్‌ ఎక్కువగా స్రవించడం వల్లనే అనే అపోహ ఉండేది. మగపిల్లల్లో యుక్తవయసు రాగానే టెస్టోస్టెరాన్‌ హార్మోన్‌ స్రవించడం మొదలవుతుందనీ... ఈ టెస్టోస్టెరాన్‌ కారణంగా యువ దశ మొదలుకొని క్రమంగా వయసు పెరిగే కొద్దీ పురుషుల్లో హెయిర్‌లైన్‌ కొద్దికొద్దిగా వెనక్కు పోతూ ఉండేదన్న అభిప్రాయం ఉండేది. కానీ కొన్ని  పరిశోధనల ప్రకారం దీనికి టెస్టోస్టెరాన్‌ కారణం కాదనీ... ‘డీహెచ్‌టీ’ (డిహైడ్రో టెస్టోస్టెరాన్‌) కారణమని తేలింది. పురుషులు... మహిళల్లో తేడాలిలా...  ఇక పురుషుల్లో వచ్చే బట్టతలలో నుదురు మీద ఉండే హెయిర్‌లైన్‌ క్రమంగా వెనక్కిపోతూ ఉంటుంది. అదే మహిళల్లోనైతే ఫిమేల్‌ పాట్రన్‌ హెయిర్‌లాస్‌ అనే కండిషన్‌ ఉంటుంది. ఇందులో తలపై ముందున్న హెయిర్‌లైన్‌ అలాగే ఉండి, మాడు మీద జుట్టు పలచబారుతూ పోతుంటుంది.  బట్టతల... నిర్ధారణ పరీక్షలివి... బట్టతలను నిర్ధారణ చేయడానికి డెర్మోస్కోపీ లేదా ట్రైకోస్కోపీ అనే పరీక్ష చేయాల్సి ఉంటుంది.  చికిత్స ప్రక్రియలు...  బట్టతల వస్తోందని నిర్ధారణ చేశాక... తొలుత మినాక్సిడిల్, ఫెనస్టెరైడ్, డ్యూటస్టెరైడ్‌ వంటి మందులు వాడాల్సి ఉంటుంది. వాటితో ప్రయోజనం లేకపోతే మీసోథెరపీ, స్టెమ్‌సెల్‌ థెరపీ, ప్లేట్‌లెట్‌ రిచ్‌ ప్లాస్మా అండ్‌ డర్మారోలర్‌ వంటి ప్రక్రియలను ఉపయోగించి చికిత్స తీసుకోవచ్చు. ఇక  లేజర్‌ సహాయంతో చేసే ఇన్‌ఫ్రారెడ్‌ లైట్‌ థెరపీ, లేజర్‌ కోంబింగ్‌ కూడా బాగా ఉపయోగపడతాయి. వీటన్నింటితో పాటు హెయిర్ ‌ట్రాన్స్‌ప్లాంటేషన్‌ వంటి చికిత్సలు కూడా ఉపకరిస్తాయి. 


 బెర్న్: పురుషుల్లో సెక్స్ వాంఛను ప్రేరేపించే ‘టెస్టోస్టెరాన్’ హార్మోన్ ఎక్కువగా ఉన్న రాజకీయ నేతల్లో అవినీతి ఎక్కువగా ఉంటుందట. ఈ విషయం స్విడ్జర్లాండ్‌లోని లాసన్నే విశ్వవిద్యాలయం నిపుణులు జరిపిన తాజా అధ్యయనంలో వెల్లడైంది. మానవుల్లో వృషణాలు టెస్టోస్టెరాన్ హార్మోన్‌ను ఉత్పత్తి చేస్తాయనే విషయం తెల్సిందే. ‘అధికారం అవినీతికి దారి తీస్తుంది. తిరుగులేని అధికారం అంతులేని అవినీతికి ఆస్కారమిస్తుంది’ అని చెప్పిన ఇంగ్లీష్ క్యాథలిక్ హిస్టారియన్, బ్రిటన్ పార్లమెంట్‌లో లేబర్ పార్టీ ఎంపీగా పని చేసిన రాజకీయవేత్త, రచయిత సర్ జాన్ డాల్‌బెర్గ్-యాక్షన్.... కొటేషన్‌లో వాస్తవాలను తెలుసుకునేందుకు లాసెన్నే విశ్వ విద్యాలయానికి చెందిన ప్రోఫెసర్ జాన్ ఆంటోనకిస్ నాయకత్వంలోని నిపుణుల బృందం జరిపిన తాజా అధ్యయనంలో పలు ఆసక్తికరమైన అంశాలు వెలుగులోకి వచ్చాయి.
 
 వ్యవస్థీకృత మానవ ప్రవర్తనపై ఇప్పటికే పలు అధ్యయనాలు జరిపిన జాన్ ఆంటోనకిస్ తన తాజా అధ్యయనం కోసం 718 మంది బిజినస్ విద్యార్థులను ఎంపిక చేసుకున్నారు. వారిపై ‘ది డిక్టేటర్ గేమ్’గా పిలిచే సామాజిక ప్రయోగాన్ని నిర్వహించారు. ముందుగా 718 విద్యార్థులపై ప్రవర్తన, వారికి సామాజిక విలువల పట్ల ఉన్న విశ్వాసానికి సంబంధించిన పర్సనాలిటీ పరీక్షలను నిర్వహించడంతోపాటు వారిలోని ‘టెస్టోస్టెరాన్’ హార్మోన్ స్థాయిని రికార్డు చేశారు. ఆ తార్వత వారిని రెండు గ్రూపులుగా విభజించి రెండు రకాల ‘డిక్టేటర్ గేమ్’ను ఆడించారు. విద్యార్థుల్లో ఉన్న నాయకత్వ లక్షణాలను బట్టి వారిలో కొందరిని నాయకులుగా, మరి కొందరిని వారి అనుచరులుగా విభజించారు. నాయకులుగా ఎంపిక చేసిన వారికి కొంత సొమ్మును అప్పగించి తమ ఇష్టానుసారం తమ గ్రూపు సభ్యులకు పంచాల్సిందిగా నిపుణుల బృందం ఆదేశించింది. ఆశ్యర్యకరంగా.. విద్యార్థుల్లో నాయకత్వ లక్షణాలు ఎక్కువగా ఉన్నవారు తాము ఎక్కువ సొమ్మును తమ వద్దే ఉంచుకొని, మిగతా సొమ్మును ఇతరులకు పంచారు. ఇక్కడే మరో ఆసక్తికరమైన అంశం వెలుగు చూసింది. టెస్టోస్టెరాన్ స్థాయి ఎక్కువగా ఉన్న నాయకులు ఎక్కువ సొమ్మును తమ వద్ద ఉంచుకున్నారు.
 
 గేమ్ ఫలితాలను లోతుగా అధ్యయనం చేసిన ప్రొఫెసర్ జాన్ బృందం సెక్స్ హార్మోన్ ఎక్కువగా ఉన్న నాయకులు అవినీతికి ఎక్కువ పాల్పడతారని తేల్చింది. నీతి నిజాయితీలకు కట్టుబడిన ప్రవర్తన కలిగిన విద్యార్థి నాయకులు కూడా అవినీతిని ఆశ్రయించారని ఈ అధ్యయనంలో తేలింది. అలాగే నాయకత్వ లక్షణాలు తక్కువగా ఉండి, అధికారంపై మక్కువ లేనివారిలో ఎక్కువ మంది తాము నమ్ముకున్న సామాజిక విలువలకే కట్టుబడి ఉన్నారని కూడా ఈ అధ్యయనం తేల్చింది. ‘అధికారంలో ఉన్నవారు అవినీతిని ఆశ్రయించడానికి ఎంత ఆస్కారముందో, ఆవినీతిపరులు అధికారాన్ని ఆశించేందుకు అంతే ఆస్కారం ఉంది. పిశాచులకు రక్తం ఎంత ప్రీతిపాత్రమో నాయకులకు అధికారం అంత ప్రీతిపాత్రమైనది’ అని అధ్యయన వివరాలు వెల్లడించిన ప్రొఫెసర్ జాన్ ఆంటోనకిస్ వ్యాఖ్యానించారు.