గ్రామీణ స్థాయి నుంచి పార్టీ బలోపేతం

గ్రామీణ స్థాయి నుంచి పార్టీ బలోపేతం

అనకాపల్లి: జిల్లాలోని అన్ని నియోజకవర్గాల్లో పార్టీని గ్రామీణ స్థాయి నుంచి బలోపేతం చేస్తామని, కార్యకర్తలకు మంచి గుర్తింపు వచ్చే విధంగా కృషి చేస్తామని వైఎస్సార్‌సీపీ అనకాపల్లి పార్లమెంట్‌ పరిశీలకుడు కరణం ధర్మశ్రీ అన్నారు. స్థానిక రింగ్‌రోడ్డు పార్టీ కార్యాలయంలో బుధవారం పార్టీ పట్టణ అధ్యక్షుడు మందపాటి జానకీ రామరాజు ఆధ్వర్యంలో విలేకరుల సమావేశంలో ఆయన మాట్లాడారు. ఈనెల 31న కశింకోట మండలం తేగాడ గ్రామంలోని సరోజిని విల్లాలో పార్టీ జిల్లా స్థాయి విస్తృత సమావేశం ఉదయం 10 గంటలకు నిర్వహిస్తున్నట్టు చెప్పారు. ఈ కార్యక్రమానికి ఎమ్మెల్సీలు బొత్స సత్యనారాయణ, వరుదు కల్యాణి, విశాఖ మేయర్‌ గొలగాని హరివెంకట కుమారి, జెడ్పీ చైర్‌పర్సన్‌ జల్లిపల్లి సుభద్ర, మాజీ ఉపముఖ్యమంత్రి బూడి ముత్యాలనాయుడు, మాజీ మంత్రి గుడివాడ అమర్‌నాథ్‌, పార్టీ నియోజకవర్గ సమన్వయకర్తలు, ఎంపీటీసీలు, జెడ్పీటీసీలు, గ్రామాల సర్పంచ్‌లు, పార్టీ నాయకులు పాల్గొంటారని ఆయన తెలిపారు. కూటమి ప్రభుత్వం వైఫల్యాలపై సమావేశంలో చర్చిస్తామని చెప్పారు. చిత్తశుద్ధి లేని 8 నెలల సర్కారు పాలనపై ప్రజలు విరక్తి చెందారని, జమిలి ఎన్నికల కోసం ఎదురుచూస్తున్నారని చెప్పారు.

సూపర్‌ సిక్స్‌ గోవిందా

సూపర్‌ సిక్స్‌ పథకాలను అమలు చేయకూడదని ప్రభుత్వం ఫిక్స్‌ అయిందని ధర్మశ్రీ ఎద్దేవా చేశారు. అనకాపల్లి నియోజకవర్గంలో వేలాది కోట్లు విలువచేసే ఖనిజ సంపద ఉందని, ప్రస్తుత ఎంపీ సీఎం రమేష్‌ వేలాది లారీలతో కొండలను పిండి చేస్తూ, ఖనిజ సంపదను దోచేస్తున్నారని ఆయన పేర్కొన్నారు. మార్టూరు, కుంచంగి, కూండ్రం, మామిడిపాలెం, బవులవాడ, జంగాలపాలెం తదితర ప్రాంతాల్లో అక్రమ మైనింగ్‌ చేస్తున్నా జిల్లా అధికార యంత్రాంగం నిమ్మకు నీరెత్తినట్లు వ్యవహరిస్తోందన్నారు.

ఫార్మా సిటీలోని కాలుష్యంపై దృష్టి పెట్టకుండా పరవాడ మండలంలో సాలాపువానిపాలెం, లేమర్తి, తాడి, లంకెలపాలెం, ఇతర గ్రామాల్లో పేదలకు కేటాయించిన భూములను కబ్జా చేసేందుకు కూటమి నేతలు ఎగబడుతున్నారని చెప్పారు. పార్టీ రాష్ట్ర కార్యదర్శులు దంతులూరి దిలీప్‌కుమార్‌, బొడ్డేడ ప్రసాద్‌, కశింకోట జెడ్పీటీసీ దంతులూరి శ్రీధర్‌, పార్టీ నియోజకవర్గ సీనియర్‌ నాయకులు మలసాల రమణారావు, కుమార్‌రాజా, ఎంపీపీ గొర్లి సూరిబాబు, 80వ వార్డు ఇన్‌చార్జ్‌ కె.ఎం.నాయుడు, పార్టీ మండల అధ్యక్షుడు పెదిశెట్టి గోవింద్‌ పాల్గొన్నారు.

కార్యకర్తలకు తగిన గుర్తింపు

రేపు కశింకోటలో వైఎస్సార్‌సీపీ జిల్లా స్థాయి సమావేశం

పార్టీ పార్లమెంట్‌ పరిశీలకుడు కరణం ధర్మశ్రీ వెల్లడి

విలేకరుల సమావేశంలో మాట్లాడుతున్న వైఎస్సార్‌సీపీ పార్టీ పార్లమెంట్‌ పరిశీలకుడు కరణం ధర్మశ్రీ