యువకుడి దుర్మరణం

యువకుడి దుర్మరణం

పుట్లూరు: ఎద్దులబండిని ఢీకొన్న ఘటనలో ఓ ద్విచక్ర వాహనదారుడు మృతి చెందాడు. పోలీసులు తెలిపిన మేరకు... యల్లనూరు మండలం కూచివారిపల్లి గ్రామానికి చెందిన ప్రభాకర్‌నాయుడు (36), వెంకటేష్‌ ఆదివారం ద్విచక్ర వాహనంపై తాడిపత్రికి బయలుదేరారు. నారాయణరెడ్డిపల్లి సమీపంలోకి చేరుకోగానే పొలాల వైపు నుంచి రోడ్డుపైకి ఉన్నఫళంగా వచ్చిన ఎద్దులబండిని నేరుగా వెళ్లి ఢీకొనడంతో ప్రభాకర్‌ నాయుడు అక్కడికక్కడే మృతి చెందాడు. తీవ్రంగా గాయపడిన వెంకటేష్‌ను తొలుత తాడిపత్రిలోని ప్రభుత్వాస్పత్రికి తర్వాత అనంతపురంలోని ఆస్పత్రికి కుటుంబసభ్యులు తీసుకెళ్లారు. కాగా, ప్రభాకరనాయుడుకు భార్య సాయిలత, మూడేళ్ల వయసున్న కుమార్తె, తొమ్మిది నెలల వయసున్న బాబు ఉన్నారు. ఘటనపై పోలీసులు కేసు నమోదు చేశారు.