శేష వాహన గోవిందా.. శ్రీ సూర్య దేవ గోవిందా..!

శేష వాహన గోవిందా.. శ్రీ సూర్య దేవ గోవిందా..!

పెద్ద శేష వాహనంపై కడప రాయుడు

కడప కల్చరల్‌ : దేవునికడప శ్రీ లక్ష్మి వెంకటేశ్వరస్వామి ఆలయ వార్షిక బ్రహ్మోత్సవాల సందర్బంగా గురువారం స్వామి ఉదయం సూర్యప్రభ, రాత్రి పెద్ద శేష వాహనంపై కొలువుదీరారు. ఉత్సవాలలో భాగంగా ఆలయ సూపరింటెండెంట్‌ హనుమంతయ్య, ఇన్‌స్పెక్టర్‌ ఈశ్వర్‌రెడ్డి, అర్చకులు మయూరం కృష్ణమోహన్‌ ఆధ్వర్యంలో త్రివిక్రమ్‌ బృందం ఉదయం స్నపన తిరుమంజనం నిర్వహించగా, సాయంత్రం ఊంజల సేవ చేశారు. ఆలయ ప్రాంగణంలో టీటీడీ కళాకారుల అన్నమాచార్య కీర్తనలు, ధర్మ ప్రచార పరిషత్‌ ఆధ్వర్యంలో హరికథగానం భక్తులను అలరించింది. ఊరేగింపులో మహిళా భక్తుల కోలాట బృందాలు ప్రధాన ఆకర్శణగా నిలిచాయి. స్వామి పల్లకీలో మాడవీధుల్లో భక్తులకు దర్శనమిస్తుండగా, స్వామి రాకను తెలుపుతూ మహిళా భక్తులు ఽపసుపు వర్ణ సంప్రదాయ దుస్తులు ధరించి భక్తిశ్రద్దలతో దేవతామూర్తులను కొనియాడుతూ భక్తిగీతాలను కోలాట నృత్యాలు చేస్తూ అందరినీ ఆకట్టుకున్నారు. స్థానిక భక్తులు కూడా వారితోపాటు కోలాటాలాడారు.

కడప రాయునికి కల్పవృక్షం కానుక

శ్రీ లక్ష్మి వెంకటేశ్వరస్వామికి ఆలయ అర్చక బృందం కల్పవృక్షాన్ని కానుకగా అందించారు. రూ. 6 లక్షలు విలువజేసే ఇత్తడి కల్పవృక్ష వాహనాన్ని స్వామి సేవలకు సమర్పిస్తున్నామని తెలిపారు.

దేవుని కడపకు ఒంటిమిట్ట రామయ్య అశ్వాలు

ఒంటిమిట్ట : ఒంటిమిట్ట శ్రీ కోదండరామస్వామి రథానికి ఉన్న అశ్వాలు దేవుని కడప రథోత్సవానికి తరలివెళ్లాయి. దేవుని కడపలో ఫిబ్రవరి 4న రథోత్సవం జరగుతుంది. టీటీడీ అధికారుల ఆదేశాల మేరకు అశ్వాలను గురువారం రథం నుంచి వేరుచేసి ఓ ప్రైవేటు వాహనంలో తీసుకెళ్లారు.