రోడ్డు ప్రమాదంలో యువకుడికి తీవ్ర గాయాలు

చర్ల: రోడ్డు ప్రమాదంలో సోమవారం ఓ యువకుడికి తీవ్ర గాయాలయ్యాయి. మండలంలోని దేవరాపల్లికి చెందిన యువకుడు తెల్లం సమ్మయ్య బైక్‌పై భద్రాచలం వైపు నుంచి చర్ల వైపునకు వస్తున్నాడు. అదే సమయంలో చర్ల నుంచి గోవిందరెడ్డికి చెందిన కారు భద్రాచలం వైపు వెళ్తోంది. ఈ క్రమంలో మామిడిగూడెం– గోగుబాక గ్రామాల మధ్యలోని మూలమలుపు వద్ద ద్విచక్రవాహనం అదుపు తప్పి కారును ఢీకొట్టింది. దీంతో కారు ముందుభాగం, ద్విచక్రవాహనం నుజ్జునుజ్జయ్యాయి. తెల్లం సమ్మయ్యకు తీవ్ర గాయాలై అపస్మారక స్థితికి చేరగా, చికిత్స నిమిత్తం భద్రాచలం వైద్యశాలకు తరలించారు. యువకుడి పరిస్థితి విషమంగా ఉన్నట్లు వైద్యులు తెలిపారు.

బైక్‌ అదుపు తప్పి ఇద్దరికి...

టేకులపల్లి: మండలం పరిధిలోని కోయగూడెం–లచ్చగూడెం మార్గంలో సోమవారం బైక్‌ అదుపు తప్పిన ఘటనలో ఇద్దరు యువకులకు తీవ్ర గాయాలయ్యాయి. బోడు కొత్తగూడెం గ్రామానికి చెందిన వట్టం ప్రదీప్‌, మద్రాస్‌తండాకు చెందిన గుమ్మడి నరేష్‌ బైక్‌పై వెళ్తుండగా ప్రమాదానికి గురయ్యారు. స్థానికులు క్షతగాత్రులను చికిత్స నిమిత్తం 108 అంబులెన్స్‌లో ఆస్పత్రికి తరలించారు.