ఆర్చరీలో బుద్ధేశ్వరరావు ప్రతిభ

ఆర్చరీలో బుద్ధేశ్వరరావు ప్రతిభ

అమలాపురం టౌన్‌: అమలాపురం రూరల్‌ మండలం ఈదరపల్లికి చెందిన కర్రి బుద్ధేశ్వరరావు ఇటీవల న్యూ ఢిల్లీలో జరిగిన సీబీఎస్‌ఈ నేషనల్‌ ఆర్చరీ కాంపౌండ్‌ అండర్‌–17 విభాగ పోటీల్లో కాంస్య పతకం సాధించాడు. నవంబర్‌ 10న గుజరాత్‌ రాష్ట్రం లడియాలో జరగబోయే స్కూల్‌ గేమ్స్‌ ఫెడరేషన్‌ ఆఫ్‌ ఇండియా నేషనల్‌ ఆర్చరీ పోటీలకు కూడా బుద్ధేశ్వరరావు ఎంపికయ్యాడు. ఈ సందర్భంగా స్థానిక హెల్త్‌ ఫిట్‌నెస్‌ జిమ్‌లో ఆర్చరీ విజేత బుద్ధేశ్వరరావును జిల్లా పవర్‌ లిఫ్టింగ్‌ అసోసియేషన్‌ బుధవారం ఘనంగా సత్కరించింది. ఈ సందర్భంగా అసోసియేషన్‌ జిల్లా అధ్యక్షుడు యెనుముల కృష్ణ పద్మరాజు మాట్లాడుతూ బుద్ధేశ్వరరావు చిరు ప్రాయంలోనే ఆర్చరీ క్రీడలో జాతీయ స్థాయిలో ప్రతిభ చాటి పతకాన్ని పట్టి అమలాపురానికి పేరు తెచ్చానని పేర్కొన్నారు. అరుదైన క్రీడలో రాణించేలా ప్రోత్సహించిన బుద్ధేశ్వరరావు తండ్రి కర్రి నాగేశ్వరరావును కూడా అభినందించారు. బాడీ బిల్డింగ్‌ అసోసియేషన్‌ జిల్లా ఉపాధ్యక్షుడు గారపాటి చంద్రశేఖర్‌, జిమ్‌ కోచ్‌ డాక్టర్‌ కంకిపాటి వెంకటేశ్వరరావు, పవర్‌ లిఫ్టింగ్‌ కోచ్‌ మట్టపర్తి వెంకట సముద్రం, జిమ్‌ క్రీడాకారులు పాల్గొన్నారు.