డీఎస్సీ ఉచిత శిక్షణకు దరఖాస్తుల ఆహ్వానం

కర్నూలు (అర్బన్‌): వెనుకబడిన తరగతుల సంక్షేమ శాఖ ఆధ్వర్యంలో స్థానిక బీసీ స్టడీ సర్కిల్‌లో మెగా డీఎస్సీ (స్కూల్‌ అసిస్టెంట్‌/ఎస్‌జీటీ) పోస్టులకు ఉచిత శిక్షణ ఇవ్వనున్నట్లు స్టడీ సర్కిల్‌ డైరెక్టర్‌ పి.వెంకటలక్ష్మమ్మ తెలిపారు. ఈ శిక్షణకు జిల్లాకు చెందిన టీటీసీ/బీఈడీ, ఏపీ టెట్‌లో అర్హత సాధించిన బీసీ, ఎస్సీ, ఎస్టీ, మైనార్టీ, ఈడబ్ల్యూఎస్‌/ఈబీసీ అభ్యర్థులు అర్హుల ని ఆమె మంగళవారం ఒక ప్రకటనలో పేర్కొన్నారు. అర్హులైన అభ్యర్థులు తమ దరఖాస్తులను ఈనెల 15వ తేదీ లోగా కల్లూరు తహసీల్దార్‌ కార్యాలయం ఎదురుగా ఉన్న బీసీ స్టడీ సర్కిల్‌ కార్యాలయంలో అందించాలన్నారు. టెట్‌లో మెరిట్‌ ప్రాతిపదికన అభ్యర్థులను ఎంపిక చేసి 60 రోజుల పాటు ఉచిత శిక్షణ ఇవ్వనున్న ట్లు తెలిపారు. అలాగే ఉచిత స్టడీ మెటీరియల్‌తో పాటు శిక్షణ పూర్తయిన అనంతరం అభ్యర్థులకు స్టైఫండ్‌ అందించనున్నట్లు చెప్పారు. వివరాలకు 08518– 236076 నంబర్‌ను సంప్రదించాలని సూచించారు.