విద్యుదాఘాతంతో రైతు మృతి

విద్యుదాఘాతంతో రైతు మృతి

నవాబుపేట: విద్యుదాఘాతంతో రైతు మృతి చెందిన ఘటన నవాబుపేట మండలం నీర్సాబ్‌తండాలో చోటు చేసుకుంది. ఎస్‌ఐ విక్రమ్‌ వివరాల మేరకు.. నీర్సాబ్‌తండాకు చెందిన రైతు రమేష్‌ నాయక్‌ (37) శుక్రవారం రాత్రి తన వ్యవసాయ పొలంలో వరిపంటకు నీరు పారించేందుకు బోరుమోటారు ఆన్‌ చేస్తుండగా.. ప్రమాదవశాత్తు విద్యుత్‌ షాక్‌కు గురై అక్కడికక్కడే మృతి చెందాడు. గమనించిన సమీప పొలాల రైతులు కుటుంబ సభ్యులకు తెలియజేశారు. వారి సమాచారం మేరకు పోలీసులు ఘటనా స్థలానికి చేరుకొని మృతదేహాన్ని పోస్టుమార్టం జిల్లా మార్చురీకి తరలించారు. మృతుడి భార్య నేనావత్‌ లక్ష్మి ఫిర్యాదు మేరకు కేసు నమోదు చేసి దర్యాప్తు జరుపుతున్నట్లు ఎస్‌ఐ తెలిపారు.

డ్రెయినేజీలో పడి వ్యక్తి..

మహబూబ్‌నగర్‌ క్రైం: మద్యం మత్తులో డ్రెయి నేజీలో పడి ఓ వ్యక్తి మృతిచెందిన ఘటన జిల్లాకేంద్రంలో చోటు చేసుకుంది. వన్‌టౌన్‌ ఎస్‌ఐ శీనయ్య కథనం మేరకు.. తాండూర్‌కు చెందిన సంపత్‌ప్రసాద్‌(39) శుక్రవారం మహబూబ్‌నగర్‌ పోస్టాఫీస్‌లో కుమార్తె పేరున ఖాతా తెరిచేందుకు వచ్చాడు. పని ముగించుకొని వీరన్నపేటలో ఉండే సమీప బంధువు ఇంటికి వెళ్లా డు. అర్ధరాత్రి నడుచుకుంటూ బ్రహ్మణవాడి వైపు వస్తూ దయానంద విద్యామందిర్‌ సమీపంలో ఉన్న పెద్ద డ్రైనేజీలో పడిపోయాడు. అప్పటికే మద్యం మత్తులో ఉండటంతో తల భాగం మురుగు నీటిలో కూరుకుపోవడంతో మృతిచెందాడు. శనివారం స్థానికులు చూసి పోలీసులకు సమాచారం ఇవ్వడంతో ఘటన స్థలాన్ని పరిశీలించి మృతదేహన్ని బయటకు తీసి పోస్టుమార్టం నిమిత్తం జిల్లా జనరల్‌ ఆస్పత్రికి తరలించారు. భార్య అన్నపూర్ణ ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్‌ఐ వెల్లడించారు.

మృతదేహం లభ్యం

చిన్నంబావి: గుర్తు తెలియని వ్యక్తి మృతి చెందిన ఘటన చిన్నంబావి మండలంలో శనివారం చోటు చేసుకుంది. సీఐ ఎం.కృష్ణ వివరాల ప్రకారం.. వెలగొండ శివారులోని పెబ్బే ర్‌ ప్రధాన రహదారి పక్కన గుంతలో వ్యక్తి మృతదేహాన్ని గమనించిన స్థానికులు పోలీసులకు సమాచారం అందించారు. ఈ విషయం తెలి సిన వెంటనే పోలీసులు ఘటనా స్థలానికి చేరు కొని వివరాలు సేకరించారు. మృతుడి ఒంటి బ్లూ కలర్‌ టీ షర్ట్‌, గోదుమ కలర్‌ ప్యాంట్‌ ఉన్నట్లు పేర్కొన్నారు. 33 ఏళ్ల వయసు ఉంటుందని తెలిపారు. ఆచూకీ తెలిసిన వారు 8712670618, 8712670611 నంబర్లను సంప్రదించాలన్నారు. కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు.