Akkineni Nagarjuna: ప్రేక్షకుల్లో చాలా మార్పు వచ్చింది.. అందుకే ఈ నిర్ణయం: నాగార్జున

టాలీవుడ్‌లో యంగ్‌ హీరోలకు ఏ మాత్రం తగ్గని నటుడు అక్కినేని నాగార్జున. వయసు పెరుగుతున్నా తనకున్న గ్లామర్‌ రోల్‌తో అభిమానులకు దగ్గరవుతుంటారు. తాజాగా ఆయన నటించిన చిత్రం 'ది ఘోస్ట్'. ఈ సినిమా దసరా కానుకగా అక్టోబర్‌ 5న థియేటర్లలో అలరించనుంది. ఈ చిత్రానికి ప్రవీణ్‌ సత్తార్‌ దర్శకత్వం వహించారు. అయితే ఈ సినిమా తర్వాత ఆయన విరామం తీసుకుంటున్నట్లు తెలుస్తోంది. ప్రస్తుతం ఎలాంటి కొత్త చిత్రాలను ఒప్పుకోలేదని ఇటీవల ఓ ఆంగ్ల మీడియాకు ఇచ్చిన ఇంటర్వ్యూలో వెల్లడించారు. ఇటీవల విడుదలైన బ్రహ్మాస్త్రంలోనూ కీలక పాత్ర పోషించిన నాగార్జున.. సినిమాలకు కాస్తా బ్రేక్‌ ఇవ్వనున్నట్లు వెల్లడించారు.

(చదవండి: మా జీవితాల నుంచి వెళ్లిపోయింది.. చై-సామ్‌ విడాకులపై నాగార్జున కామెంట్స్‌)

అక్కినేని నాగార్జున మాట్లాడుతూ 'కొవిడ్‌ తర్వాత పరిస్థితులు పూర్తిగా మారిపోయాయి. ప్రేక్షకుల అభిరుచుల్లో చాలా మార్పులు వచ్చినట్లు గ్రహించా. ప్రజలు ఎలాంటి సినిమాలు కోరుకుంటున్నారో తెలుసుకోవాలనుకుంటున్నా. అందుకోసం కనీసం ఆరు నెలల సమయం అవసరం. ఈ  ఏడాది 'ది ఘోస్ట్‌' తర్వాత నా సినిమాలేవీ ఉండట్లేదు.  తర్వాత ఓటీటీలోనూ నటించాలనే ప్రణాళికతో ఉన్నా. అందుకే స్క్రిప్ట్ విన్నాక అది  ఓటీటీకి సరిపోతుందా.. థియేటర్‌లో రిలీజ్‌ చేయాలా.. అన్న విషయంపై నిర్ణయం తీసుకోవాలి. అందుకే విరామం తీసుకోవాలనుకుంటున్నా' అని అన్నారు.