రోడ్డు ప్రమాదంలో వ్యక్తికి గాయాలు

రోడ్డు ప్రమాదంలో వ్యక్తికి గాయాలు

రాయగడ: జిల్లాలోని కళ్యాణసింగుపూర్‌ సమితి నారాయణపూర్‌లో బుధవారం జరిగిన రోడ్డు ప్రమాదంలో ఒకరు గాయపడ్డారు. తొలొరంబ గ్రామానికి చెందిన బాబారావు హుయిక ఋధవారం విందు భోజనానికి రాయగడ వెళ్లి తిరిగి స్వగ్రామానికి బైకుపై వస్తుండగా గ్రామ సమీపంలో అదుపు తప్పి విద్యుత్‌ స్థంభానికి ఢీకొట్టాడు. ఈ ఘటనలో బాబారావుకు గాయాలు కావడంతో వెంటనే అంబులెన్సులో ఆస్పత్రికి తరలించారు. పోలీసులు కేసు నమోదు చేసి దర్యాప్తు చేస్తున్నారు.

జిల్లా పరిషత్‌ మాజీ సభ్యురాలు మృతి

కొరాపుట్‌: అనారోగ్యంతో జిల్లా పరిషత్‌ మాజీ సభ్యురాలు కోయికి రంధారి (26) మృతి చెందారు. బుధవారం నబరంగ్‌పూర్‌ జిల్లా నబరంగ్‌పూర్‌ సమితి బాసిని గ్రామంలో తుదిశ్వాస విడిచారు. గత విడత నబరంగ్‌పూర్‌ జోన్‌–1కి బీజేడి తరఫున ఈమె జిల్లా పరిషత్‌ సభ్యురాలిగా పనిచేశారు. మృతి విషయం తెలిసిన వెంటనే నబరంగ్‌పూర్‌ మాజీ ఎమ్మెల్యే సదాశివ ప్రధాని, నబరంగ్‌పూర్‌ జిల్లా పరిషత్‌ మాజీ అధ్యక్షురాలు మంజులా మజ్జి నివాళులు అర్పించారు. పెద్ద సంఖ్యలో బీజేడీ కార్యకర్తలు పాల్గొన్నారు.

మధ్యాహ్న భోజన కార్మికుల నిరసన

రాయగడ : వేతనాలు పెంచాలని డిమాండ్‌ చేస్తూ మధ్యాహ్న భోజన వంట సహాయకులు బుధవారం ధర్నా చేపట్టారు. ఈ సందర్భంగా జిల్లా విద్యాశాఖ అధికారి బసంతకుమార్‌ నాయక్‌కు వినతిపత్రం అందజేశారు. అనంతరం వారు మాట్లాడుతూ నెలకు అందిస్తున్న రూ. మూడు వేలతో కుటుంబ పోషణ కష్టమవుతోందని ఆవేదన వ్యక్తం చేశారు. ప్రతి నెలా రూ.23,560 చొప్పున చెల్లించాలని డిమాండ్‌ చేశారు. వంట సహాయకుల మహాసంఘం అధ్యక్షులు జొగేంద్ర స్వయి నేతృత్వలో జరిగిన ఈ నిరసన కార్యక్రమంలో వివిధ పాఠశాలల వంట సహాయకులు పాల్గొన్నారు.

ధామ్రాకు తొలి విమానం రాక

భువనేశ్వర్‌: భద్రక్‌ జిల్లా బాసుదేవ్‌పూర్‌ ధామ్రా ఎయిర్‌స్ట్రిప్‌కు బుధవారం తొలి విమానం చేరింది. అహ్మదాబాద్‌ నుంచి ఈ విమానం వచ్చింది. ఆదానీ గ్రూప్‌ 2018లో ఈ విమానాశ్రయాన్ని అభివృద్ధి చేసేందుకు రాష్ట్రంతో అవగాహన ఒప్పందం (ఎంఓయూ) కుదుర్చుకుంది. ఎయిర్‌స్ట్రిప్‌ అభివృద్ధి కోసం రాష్ట్రం 274 ఎకరాల విస్తీర్ణపు స్థలం కేటాయించింది. ఆదానీ పోర్ట్సు అనుబంధ సంస్థ ధామ్రా పోర్ట్‌ కంపెనీ లిమిటెడ్‌ యాజమాన్యంలో ఈ ఎయిర్‌స్ట్రిప్‌ పనిచేస్తుంది.

సత్తాచాటిన జీఐఈటీ విద్యార్థులు

రాయగడ: రౌర్కెలా ఎన్‌ఐటీ ఈ నెల 24 నుంచి 26 వరకు జరిగిన భీధి–25 క్రీడోత్సవాల్లో గుణుపూర్‌కు చెందిన గాంధీ ఇన్‌స్టిట్యూట్‌ ఆఫ్‌ ఇంజినీరింగ్‌ అండ్‌ టెక్నాలజీ (జీఐఈటీ) విశ్వ విద్యార్థులు విద్యార్థులు సత్తాచాటారు. క్రికెట్‌, వాలీబాల్‌, బాస్కెట్‌బాల్‌, ఫుట్‌బాల్‌, బ్యాడ్మింటన్‌, టేబుల్‌ టెన్నిస్‌, ఖోఖో తదితర అంశాల్లో విజేతలుగా నిలిచారు. విద్యార్థులను ప్రొఫెసర్‌ ప్రకాష్‌ రంజన్‌ సాహు, ఆదిత్య మహాకుల్‌, అధ్యాపకులు ఝరణా మహారాణ బుధవారం అభినందించారు. కార్యక్రమంలో విశ్వవిద్యాలయం డైరెక్టర్‌ డాక్టర్‌ జగదీష్‌ పండా, రిజిస్ట్రార్‌ డాక్టర్‌ ఎన్‌.వి.జగన్నాథరావు, క్రీడా శాఖాధికారి రవీంద్ర పండా, ఆశీష్‌ తివారి తదితరులు పాల్గొన్నారు..

1/1

రోడ్డు ప్రమాదంలో వ్యక్తికి గాయాలు