జల్సాలకు అలవాటు పడి ట్రాక్టర్ల అపహరణ

జల్సాలకు అలవాటు పడి ట్రాక్టర్ల అపహరణ

ములుగు(గజ్వేల్‌): వాహనాల దొంగతనాలకు పాల్పడిన నలుగురిని ఆదివారం రిమాండ్‌కు తరలించినట్లు ములుగు ఎస్‌ఐ విజయ్‌కుమార్‌ తెలిపారు. ఆయన కథనం మేరకు.. ములుగు మండలం నాగిరెడ్డిపల్లి గ్రామానికి చెందిన స్వామి ట్రాక్టర్‌ను 19న గుర్తు తెలియని వ్యక్తులు ఎత్తుకెళ్లారు. చుట్టు పక్కల వెతికినా లభించలేదు. 21న పోలీస్‌స్టేషన్‌లో ఫిర్యాదు చేయగా కేసు నమోదు చేసి గౌరారం ఎస్‌ఐ నాగేశ్వర్‌తో కలిసి దర్యాప్తు చేపట్టాం. సాంకేతిక పరిజ్ఞానంతో ట్రాక్టర్‌ ఉన్న చోట ను గుర్తించారు. ఇందులో యాదాద్రి భువనగిరి జిల్లా తుర్కపల్లి మండలం నాగాయిపల్లి గ్రామానికి చెందిన చెరుకుపల్లి రవీందర్‌రెడ్డి, మల్లేశం, నాగిరెడ్డిపల్లి గ్రామానికి చెందిన అన్నెబోయిన నాగరాజు, పల్లె ప్రవీణ్‌ ట్రాక్టర్‌ల దొంగతనాలకు పాల్పడుతున్నట్లు తేలింది. నలుగురు మద్యానికి బానిసై జల్సాలు చేస్తూ దొంగతనాలకు పాల్పడుతుంటారని వివరించారు. అలాగే వర్గల్‌ మండలంలోని శాఖారంలో మరో ట్రాక్టర్‌ను దొంగిలించినట్లు తెలిపారు. నిందితుల నుంచి ట్రాక్టర్‌, బైక్‌, కారు, రూ.45 వేల నగదు స్వాధీనం చేసుకొని రిమాండ్‌కు తరలించినట్లు పేర్కొన్నారు.

నలుగురిని అరెస్ట్‌ చేసిన పోలీసులు