లారీ ఢీకొని యువకుడు మృతి

హత్నూర(సంగారెడ్డి): లారీ ఢీకొని యువకుడు మృతి చెందిన ఘటన హత్నూర మండలం మంగాపూర్‌ గ్రామ శివారులో ఆదివారం రాత్రి చోటు చేసుకుంది. మెదక్‌ జిల్లా నర్సాపూర్‌ మండలం మాడాపూర్‌ గ్రామానికి చెందిన బేగరీ నితిన్‌ (19 ) బైక్‌ పై దౌల్తాబాద్‌ నుంచి స్వగ్రామమైన మాడాపూర్‌కు వెళ్తున్నాడు. మంగాపూర్‌ గ్రామ శివారులోకి రాగానే సంగారెడ్డి నర్సాపూర్‌ రహదారిపై లారీ ఢీకొట్టింది. ఈ ప్రమాదంలో నితిన్‌కు తీవ్ర గాయాలు అయ్యాయి. చికిత్స నిమిత్తం ఆస్పత్రికి తరలిస్తుండగా మార్గమధ్యలో మృతి చెందాడు. ప్రమాదానికి కారణమైన లారీని పోలీసులు అదుపులోకి తీసుకున్నారు.

ఆటోలో నుంచి పడి వ్యాపారి..

తూప్రాన్‌: రోడ్డు ప్రమాదంలో చెప్పుల వ్యాపారి మృతి చెందిన ఘటన పట్టణ సమీపంలో ఆదివారం చోటు చేసుకుంది. ఎస్‌ఐ శివానందం కథనం మేరకు.. మాసాయిపేట మండల కేంద్రానికి గంగాధర్‌(50) చెప్పుల వ్యాపారం చేస్తున్నాడు. శనివారం వెల్దుర్తిలో జరిగే వారాంతపు సంతకు ఆటోలో వెళ్లాడు. అనంతరం తిరిగి మరో ఆటోలో ముందు కూర్చొని ఇంటికి వెళ్తుండగా పట్టణ శివారులో ప్రమాదవశాత్తు కిందపడ్డాడు. అదే ఆటో గంగాధర్‌ పైనుంచి వెళ్లడంతో తీవ్ర గాయాలయ్యాయి. క్షతగాత్రుడిని ఆస్పత్రికి తరలించగా చికిత్స పొందుతూ మృతి చెందినట్లు ఎస్‌ఐ తెలిపారు.