3.8 కిలోల గంజాయి స్వాధీనం

● మహిళ అరెస్టు

సేలం : థాయ్‌ల్యాండ్‌ నుంచి చైన్నెకి రూ. 2 కోట్ల విలువైన 3.8 కిలోల ఫస్ట్‌ క్వాలిటీ గంజాయిని అక్రమంగా తరలించిన హైక్లాస్‌ మహిళను విమానాశ్రయ అధికారులు శుక్రవారం రాత్రి అరెస్టు చేశారు. వివరాలు.. చైన్నె అంతర్జాతీయ విమానాశ్రయంకు థాయ్‌ల్యాండ్‌ రాజధాని బ్యాంకాక్‌ నుంచి ఇండిగో ఎయిర్‌లైన్స్‌ ప్రయాణికుల విమానం శుక్రవారం రాత్రి వచ్చింది. అందులో వచ్చిన ప్రయాణికులను చైన్నె విమానాశ్రయ అధికారులు సోదాలు చేశారు. ఆ సమయంలో సుమారు 30 ఏళ్ల వయస్సున్న ఓ మహిళ థాయ్‌లాండ్‌కు వెళ్లి, తర్వాత రోజే చైన్నెకి ఈ విమానంలో తిరిగి వచ్చినట్లు తెలిసింది. దీంతో సందేహించిన అధికారులు ఆమె బ్యాగును తనిఖీ చేసి గంజాయిని గుర్తించి సీజ్‌ చేశారు. అందులో సుమారు 3.8 కిలో గంజాయి ఉన్నట్టు, దాని అంతర్జాతీయ మార్కెట్‌ ధర రూ. 2 కోట్లు ఉంటుందని అధికారులు తెలిపారు. తర్వాత అధికారులు ఆ మహిళను అరెస్టు చేశారు. పోలీసులు విచారణ జరుపుతున్నారు.