గంజాయి కేసులో తండ్రి, కొడుకు అరెస్టు

తిరువొత్తియూరు: కొడుంగయూరు నివాసం ఉంటున్న నాగరాజు తిరువొత్తియూరు మున్సిపాలిటీ మాజీ కౌన్సిలర్‌. అతని కుమారుడు యువరాజ్‌పై పలు కేసులు ఉన్నాయి. ఒక కేసులో గైర్హాజరైన నాగరాజ్‌, అతని కుమారుడు యువరాజ్‌ కోసం తిరువొత్తియూరు పోలీసులు గాలింపు చేపట్టారు. ఈ దశలో వారు ఇంట్లో ఉన్నట్లు పోలీసులకు సమాచారం అందింది. దీంతో రంగంలోకి దిగిన పోలీసులు ఇంట్లో దాక్కున్న నాగరాజ్‌, అతని కుమారుడు యువరాజ్‌ను అరెస్టు చేశారు. వారి ఇంట్లో సోదా చేయగా 2 కిలోల గంజాయి, మత్తుమందు మాత్రలు, 2 పట్టా కత్తులు లభించాయి. పోలీసులు వాటిని స్వాధీనం చేసుకున్నారు. అరెస్టు చేసిన ఇద్దరు వ్యక్తులను కోర్టులో హాజరుపరిచి జైలుకు తరలించారు.