ఎంబీబీఎస్‌ పేరిట రూ.59 లక్షలు మోసం

● మహిళ అరెస్టు

అన్నానగర్‌: చైన్నెలోని పడూర్‌లోని ఓఎంఆర్‌ రోడ్డులోని జేనన్స్‌ ఇన్సెలీ పార్క్‌ ప్రాంతానికి చెందిన దీప (44). ఆమె భర్త రాజ ప్రభు. దుబాయ్‌లో మెకానికల్‌ ఇంజినీర్‌గా పనిచేస్తున్నాడు. వీరి కూతురు అభిషేక్‌ గతేడాది 2019లో నీట్‌ పరీక్ష రాసింది. అందులో ఎంబీబీఎస్‌ సీటు దొరకలేదు. ఆ తర్వాత ఎలాగైనా నా కూతురికి ఎంబీబీఎస్‌ సీటు ఇప్పించాలని దీప తన స్నేహితురాలు లతను కోరారు. లత తన స్నేహితురాలిని దీపకు పరిచయం చేసింది. ఆల్‌ ఇండియా మెడికల్‌ కౌన్సిల్‌లోని అధికారుల గురించి తనకు బాగా తెలుసునని, దాని ద్వారా మీ కుమార్తెకు ఎంబీబీఎస్‌ సీటు వస్తుందని అనిత చెప్పింది. ఆ తర్వాత అనిత గోవాకు చెందిన మహ్మద్‌ ఖాన్‌ స్నేహితురాలని కూడా చెప్పింది. ఎంబీబీఎస్‌ సీటు ఇప్పిస్తానని అతడు సెల్‌ఫోన్‌లో సంప్రదించాడు. ఆ తర్వాత చైన్నె పోరూర్‌ పక్కనే ఉన్న అయ్యప్పన్‌ తాంగల్‌ ప్రాంతంలో నివాసముంటున్న అనిత.. దీపను ఇంటికి పిలిపించుకుని కుమార్తె 12వ తరగతి సర్టిఫికెట్‌, ఆధార్‌ కార్డు, 2 ఫొటోలు, రూ.4 లక్షల 50 వేలు తీసుకున్నారు. అనంతరం అనిత బ్యాంకు ఖాతాకు రూ.25 లక్షల 52 వేల 348 వరకు పంపారు. అలాగే తిరునల్వేలి జిల్లాలోని వల్లియూర్‌ ప్రాంతంలోని ఓ బ్యాంకు నుంచి దీప రూ. 29 లక్షలను గోవా రాష్ట్రంలోని బ్యాంకు ఖాతాకు మహ్మద్‌ ఖాన్‌కు పంపింది. డబ్బులు అందిన తర్వాత అనిత దీపా కుమార్తెకు ఎంబీబీఎస్‌ సీటు ఇప్పించకుండా మోసం చేసింది. ఆ తర్వాత 2021లో దీప కూతురు మళ్లీ నీట్‌ పరీక్ష రాసి ఉత్తీర్ణత సాధించి ఓ ప్రైవేట్‌ కాలేజీలో ఎంబీబీఎస్‌ చదువుతోంది. దీంతో దీప తన కూతురికి ఎంబీబీఎస్‌ సీటు ఇప్పిస్తానని తీసుకున్న డబ్బును అనితను అడిగింది. అయితే అనిత డబ్బులు ఇవ్వకుండా మోసం చేసి పరారైంది. దీంతో దీప అవడి పోలీస్‌ కమిషనర్‌ కార్యాలయంలో సెంట్రల్‌ క్రైమ్‌ బ్రాంచ్‌లో ఫిర్యాదు చేసింది. ఆవడి పోలీస్‌ కమిషనర్‌ శంకర్‌ ఆదేశాల మేరకు అసిస్టెంట్‌ కమిషనర్‌ పొన్‌ శంకర్‌ ఆధ్వర్యంలో ఇన్‌స్పెక్టర్‌ అల్బిన బ్రిగిట్టే మేరీ కేసు నమోదు చేసి దర్యాప్తు చేపట్టారు. ఈ క్రమంలో కన్యాకుమారి జిల్లా అగస్తీశ్వరంలోని చందాపురం ప్రాంతంలో తలదాచుకున్న అనిత(48)ని బుధవారం అరెస్ట్‌ చేశారు.