3 నుంచి నామినేషన్ల స్వీకరణ

3 నుంచి నామినేషన్ల స్వీకరణ

● 27న పోలింగ్‌, మార్చి 3న లెక్కింపు

● ఉత్తరాంధ్ర ఉపాధ్యాయ ఎమ్మెల్సీ

ఎన్నికకు పకడ్బందీ ఏర్పాట్లు

● కలెక్టర్‌, ఆర్వో హరేందిరప్రసాద్‌ వెల్లడి

మహారాణిపేట: ఉత్తరాంధ్ర ఉపాధ్యాయ ఎమ్మెల్సీ ఎన్నికల పోలింగ్‌ ఫిబ్రవరి 27వ తేదీ ఉదయం 8 గంటల నుంచి సాయంత్రం 4 గంటల వరకు జరగనుందని, ఇందుకు సంబంధించిన ఏర్పాట్లను అధికార యంత్రాంగం మొదలు పెట్టిందని విశాఖ జిల్లా కలెక్టర్‌, రిటర్నింగ్‌ అధికారి ఎం.ఎన్‌.హరేందిర ప్రసాద్‌ తెలిపారు. ఎన్నికల సంఘం వెలువరించిన షెడ్యూ ల్‌ ప్రకారం ఈ నెల 29వ తేదీ నుంచే ఎన్నికల ప్రవర్తనా నియమావళి అమల్లోకి వచ్చిందన్నారు. 24 గంటల్లో అన్ని ప్రభుత్వ కార్యాలయాల్లో, పబ్లిక్‌ ప్రాంతాల్లో రాజకీయపరమైన పోస్టర్లు, ఫొటోలు తొలగించాలని సంబంధిత అధికారులను ఆదేశించినట్లు చెప్పారు. ఎమ్మెల్సీ ఎన్నికకు సంబంధించి కలెక్టరేట్‌లో గురువారం డీసీపీ అజిత, డీఆర్వో, సహాయక రిటర్నింగ్‌ అధికారి బీహెచ్‌ భవానీ శంకర్‌లతో కలిసి విలేకరులతో మాట్లాడారు. ఎన్నికల నిర్వహణలో భాగంగా ఉత్తరాంధ్ర పరిధిలోని ఆయా జిల్లాల కలెక్టర్లు ఆర్వోలుగా, డీఆర్వోలు ఏఆర్వోలుగా వ్యవహరిస్తారని కలెక్టర్‌ తెలిపారు.

3 నుంచి నామినేషన్ల స్వీకరణ

షెడ్యూల్‌ ప్రకారం ఫిబ్రవరి 3న నోటిఫికేషన్‌ జారీ అవుతుందని, ఆ రోజు నుంచి అన్ని ప్రభుత్వ పని దినాల్లో ఉదయం 11 నుంచి సాయంత్రం 3 గంటల వరకు కలెక్టర్‌ కార్యాలయాల్లో నామినేషన్లు స్వీకరిస్తారని ఆర్వో హరేందిరప్రసాద్‌ తెలిపారు. 10వ తేదీ సాయంత్రం 3 గంటలతో నామినేషన్ల ప్రక్రియ ముగుస్తుందని, 11న పరిశీలన, 13న ఉపసంహరణ ప్రక్రియ ఉంటుందన్నారు. 27న పోలింగ్‌, మార్చి 3న కౌంటింగ్‌ ప్రారంభమవుతుందన్నారు. 8వ తేదీతో ఎన్నికల ప్రక్రియ ముగుస్తుందని కలెక్టర్‌ వివరించారు. జనరల్‌ అభ్యర్థులు రూ.10 వేలు, ఎస్సీ, ఎస్టీ అభ్యర్థులు రూ.5 వేలు ధరావత్తు చెల్లించాలని, ఫారం–26 ద్వారా అఫిడవిట్‌ సమర్పించాలన్నారు. అనుమతుల జారీకి సంబంధించి కలెక్టరేట్‌లో సింగిల్‌ విండో డెస్క్‌ను అందుబాటులోకి తీసుకొస్తామన్నారు. సాధారణ ఎన్నికల మాదిరిగానే ఈ ఎన్నికల్లో కూడా అన్ని రకాల నిబంధనలు అభ్యర్థులకు వర్తిస్తాయని స్పష్టం చేశారు.

ఓటర్లు 21,555.. పోలింగ్‌ కేంద్రాలు 123

2024 డిసెంబర్‌ 30న వెలువరించిన ఉపాధ్యాయ ఎమ్మెల్సీ తుది ఓటర్ల జాబితా ప్రకారం ఆరు జిల్లాల పరిధిలో 21,555 మంది ఓటర్లు ఉన్నారని కలెక్టర్‌ తెలిపారు. వీరిలో పురుష ఓటర్లు 12,948, మహిళా ఓటర్లు 8,607 మంది ఉన్నారని పేర్కొన్నారు. ఉత్తరాంధ్ర పరిధిలో 123 పోలింగ్‌ కేంద్రాలు ఉన్నాయన్నారు. విశాఖలో 13, అనకాపల్లిలో 24, అల్లూరి సీతారామరాజు జిల్లాలో 11, విజయనగరంలో 29, పార్వతీపురం మన్యంలో 15, శ్రీకాకుళంలో 31 పోలింగ్‌ కేంద్రాలు ఉన్నట్లు వివరించారు. ఎన్నికల ప్రక్రియ సజావుగా సాగేందుకు వీలుగా పోలింగ్‌ కేంద్రాల్లో అన్ని వసతులు సమకూరుస్తున్నట్లు కలెక్టర్‌ చెప్పారు. డీసీపీ అజిత మాట్లాడుతూ ఎన్నికలు పకడ్బందీగా నిర్వహించేందుకు అన్ని రకాల చర్యలు తీసుకుంటున్నామని వివరించారు.

పర్యవేక్షణకు 23 బృందాలు : ఎన్నికల ప్రవర్తనా నియమావళి అమలుకు వివిధ స్థాయి అధికారులతో కూడిన 12 ఎంసీసీ బృందాలను నియమించామని కలెక్టర్‌ చెప్పారు. అలాగే మండలానికి ఒకటి చొప్పున 11 ఫ్లైయింగ్‌ స్వ్కాడ్‌ బృందాలను ఏర్పాటు చేశామన్నారు. జీవీఎంసీ అదనపు కమిషనర్‌, జెడ్పీ సీఈవో, భీమిలి, విశాఖ ఆర్డీవోలను నోడల్‌ అధికారులుగా నియమించినట్లు కలెక్టర్‌ వెల్లడించారు.