యువతిని వేధిస్తున్న ఆర్మీ ఉద్యోగి

సాక్షి, విజయవాడ: పెళ్లి చేసుకోమంటూ శ్రీనివాస్‌ అనే ఆర్మీ ఉద్యోగి తనను వేధిస్తున్నాడని ఓ యువతి పోలీసులను ఆశ్రయించింది. పోలీసులు తెలిపిన వివరాల మేరకు.. గుంటూరు జిల్లా కొల్లిపరకు చెందిన ఆర్మీ ఉద్యోగి శ్రీనివాస్‌కు, ఓ యువతికి గతంలో పెళ్లి చేయాలని పెద్దలు నిర్ణయించారు. అయితే పెళ్లికి ముందే తనను అనుమానిస్తున్నాడంటూ సదరు యువతి వివాహానికి నిరాకరించింది. ఈ నేపథ్యంలో శ్రీనివాస్‌ తనను పెళ్లి చేసుకోవాల్సిందేనంటూ యువతిపై ఒత్తిడి తెచ్చాడు. పెళ్లి పేరుతో మూడేళ్లుగా యువతిని వేధింపులకు గురిచేయసాగాడు. దీంతో సదరు యువతి కృష్ణలంక పోలీసులకు శ్రీనివాస్‌పై ఫిర్యాదు చేసింది. కేసు నమోదు చేసుకున్న పోలీసులు దర్యాప్తు చేపట్టారు.