బర్త్‌డేకి 13 లక్షల మంది వస్తారనుకుంటే...

ఆమె ఓ మెక్సికన్ అమ్మాయి.. పేరు రూబీ. తన 15వ పుట్టినరోజును గ్రాండ్‌గా చేసుకోవాలనుకుంది. అందుకోసం ఆమె తల్లిదండ్రులు సోషల్ మీడియాలో ఒక వీడియో ఇన్విటేషన్ కూడా పోస్ట్ చేశారు. దాన్ని ఫేస్‌బుక్‌లో షేర్ చేస్తే, ఏకంగా 13 లక్షల మంది ఆమె పుట్టినరోజుకు వస్తామని చెప్పారు. దాంతో ఆ అమ్మాయి చాలా సంబరపడిపోయింది. సాధారణంగా అమ్మాయిల 15వ పుట్టినరోజు అంటే లాటిన్ అమెరికా దేశాల్లో చాలా పెద్ద పండగలా చేస్తారు. అమ్మాయి పెద్దది అయ్యిందని చెప్పడానికి దాన్నొక వేదికగా చేసుకుంటారు. అలాగే రూబీ కూడా తన 'క్విన్సీనెరా' పార్టీని చాలా పెద్ద ఎత్తున చేసుకోవాలనుకుంది. దాంతో లా జోయాలో జరిగే తన పుట్టినరోజు పార్టీకి అందరినీ పిలవమని తన తల్లిదండ్రులకు చెప్పింది. వాళ్లు కూడా ఎక్కడా తగ్గకుండా దంపతులిద్దరూ మధ్యలో కూతురిని పెట్టుకుని మరీ వీడియో ఇన్విటేషన్ పోస్ట్ చేశారు. గుర్రపు రేసు ఉంటుందని, అందులో రూ. 34వేల బహుమతి కూడా ఉంటుందని చెప్పారు. దాంతో ఫేస్‌బుక్ యూజర్లలో 13 లక్షల మంది తాము ఆ పార్టీకి వస్తున్నామని చెప్పారు.