తిప్పర్తి, నల్గోండ : పెట్రోల్‌ బంకుల్లో మోసాలు నానాటికీ పెరిగిపోతున్నాయి. ఇచ్చిన డబ్బుల కంటే తక్కువగా పెట్రోల్, డీజిల్‌ను పోస్తున్నారు. మరోసారి కల్తీకి పాల్పడుతున్నారు. సరిగ్గా నెల రోజుల క్రితం మండల కేంద్రంలోని హెచ్‌పీ పెట్రోల్‌ బంకులో ఇచ్చిన డబ్బుల కంటే తక్కువగా పెట్రోల్‌ పోశారంటూ వాహనదారులు వాదనకు దిగడంతో రెండురోజుల పాటు ఆ బంకును నిర్వహకులు బంద్‌ చేశారు. ఇదే బంకులో ఆదివారం నీళ్లు కలిసిన పెట్రోల్‌ను వాహనదారులు గుర్తించి వాదనకు దిగారు. ఇలా నెలరోజుల వ్యవధిలోనే రెండుసార్లు ఆ బంక్‌లో అవకతవకలు జరిగినా అధికారులు పట్టించుకోలేదని వాహనదారులు ఆగ్రహం వ్యక్తం చేస్తున్నారు. గుర్తించింది ఇలా.. స్థానిక హెచ్‌పీ బంక్‌లో తిప్పర్తికి చెందిన నవీన్‌ తన బైక్‌లో రూ.100 పెట్రోల్‌ పోయించుకున్నాడు. సరిగ్గా రెండు కిలోమీటర్లు వెళ్లగానే బైక్‌ ఆగిపోయింది. అనుమానం వచ్చిన నవీన్‌ బైక్‌ను అలాగే నడిపించుకుంటూ బంక్‌ వద్దకు వచ్చి బైక్‌లో ఉన్న పెట్రోల్‌ను బాటిల్‌లోకి తీయగా ఆ పెట్రోల్‌లో నీళ్లు కలిసి ఉన్నాయి. అప్పటికే అదే బంక్‌లో పెట్రోల్‌ పోయించుకున్న కారు స్టార్ట్‌ కాకపోవడంతో బంక్‌ నిర్వాహకులను నిలదీశారు. దీంతో బంక్‌ను బంద్‌ చేసుకున్నారు.  గతంలో కూడా.. గతంలో కూడా ఇదే బంక్‌లో పెట్రోల్‌లో నీళ్లు కలిశాయని పలుమార్లు అధికారులకు ఫిర్యాదు చేశారు. అయితే ఈ బంక్‌ ఉన్న చోట నీరు నిల్వ ఉండడంతో అప్పుడప్పుడు నీళ్ల పైప్‌లైన్‌ పగిలి నీరు పెట్రోల్‌లో కలుస్తుంటుందని పలువురు పేర్కొంటున్నారు. కొరవడిన అధికారుల నిఘా.. మండల కేంద్రం నుంచి నార్కట్‌పల్లి– అద్దంకి రహదారి ఉండడంతో వాహనాల రద్దీ అధికంగా ఉంటుంది. మండల పరిధిలో మొత్తం వివిధ కంపెనీలకు చెందిన ఆరు బంక్‌లు ఉన్నాయి. ఇందులో అనిశెట్టిదుప్పలపల్లిలో 2, మల్లెపల్లివారిగూడెంలో 1, తిప్పర్తిలో 2, ఇండ్లూరులో 1 ఉన్నాయి. ఆయా పెట్రోల్‌ బంకుల్లో అప్పుడప్పుడు వివిధ కారాణాలతో గోడవలు జరుగుతుంటాయి. అయినా అధికారులు పర్యవేక్షించడంలో విఫలం చెందుతున్నారని పలువురు ఆరోపిస్తున్నారు.


 తాండూరు రూరల్‌: తాండూరులోని హైదరాబాద్‌ రోడ్డు మార్గంలో ఉన్న ఐఓసీ పెట్రోల్‌ బంక్‌లో కల్తీపై అధికారులు విచారణ చేపట్టారు. శుక్రవారం కొందరు వాహనదారులకు ఈ బంక్‌లో పెట్రోల్‌ పోయగా కల్తీగా అనుమానం రావడంతో నిరసన వ్యక్తం చేశారు. పెట్రోల్‌ బంక్‌లో పెట్రోల్‌, డీజిల్‌ నాణ్యతతో పాటు తూకంలో మోసాలపై అధికారులకు ఫిర్యాదు చేశారు. దీంతో వికారాబాద్‌ డివిజన్‌ ఏఎస్‌ఓ రుక్మిణి శనివారం సదరు పెట్రోల్‌ బంక్‌లో కల్తీ వ్యవహారంపై విచారణ చేపట్టారు. వాహనదారులతో పాటు సిబ్బందితో మాట్లాడారు. బంక్‌లో ఉన్న పెట్రోల్‌, డీజిల్‌ శాంపిల్స్ తీసుకున్నారు. శాంపిల్స్‌ను ల్యాబ్‌లో పరిశీలించిన తర్వాత చర్యలు తీసుకుంటామని తెలిపారు. ఇండియన్‌ ఆయిల్‌ సేల్స్‌మన్‌ విజయ్‌కుమార్‌ సైతం దీనిపై విచారణ చేపట్టారు.