లీడ్స్‌ : ఇంగ్లండ్‌ వేదికగా జరగుతున్న ప్రపంచకప్‌లో వెస్టిండీస్‌ ప్రస్థానం విజయంతోనే ముగిసింది. గురువారం హెడింగ్లీ వేదికగా అఫ్గానిస్తాన్‌తో జరిగిన చివరి లీగ్‌ మ్యాచ్‌లో విండీస్‌ 23 పరుగుల తేడాతో విజయం సాధించింది. కరేబియన్‌ జట్టు నిర్దేశించిన 312 పరుగుల లక్ష్యంతో బరిలోకి దిగిన అఫ్గాన్‌ నిర్ణీత ఓవర్లలో 288 పరుగులకు కుప్పకూలింది. అఫ్గాన్‌ ఆటగాళ్లలో ఇక్రామ్‌ అలీ(86; 93 బంతుల్లో, 8ఫోర్లు), రెహ్మత్‌ షా(62; 78 బంతుల్లో 10ఫోర్లు)అర్దసెంచరీలతో రాణించారు. అస్గర్‌ అఫ్గాన్‌(40), నజీబుల్లా(31) ఫర్వాలేదనిపించారు. విండీస్‌ బౌలర్లలో బ్రాత్‌వైట్‌ నాలుగు వికెట్లతో చెలరేగగా.. కీమర్‌ రోచ్‌ మూడు వికెట్లు పడగొట్టాడు. వెస్టిండీస్‌ భారీ స్కోర్‌ సాధించడంలో సహకరించిన షాయ్‌ హోప్‌కు ప్లేయర్‌ ఆఫ్‌ ద మ్యాచ్‌ అవార్డు లభించింది.  ఛేదనలో అఫ్గాన్‌కు శుభారంభం లభించలేదు. ఓపెనర్‌, సారథి గుల్బాదిన్‌ నైబ్‌(5) తీవ్రంగా నిరాశ పరిచాడు. అనంతరం మరో ఓపెనర్‌ రెహ్మత్‌ షా ఇక్రామ్‌ అలీతో కలిసి ఇన్నింగ్స్‌ను చక్కదిద్దాడు. వీరిద్దరూ ఆచితూచి ఆడుతూ వీలుచిక్కినప్పుడల్లా బౌండరీలు బాదారు. ఈ క్రమంలోనే వీరిద్దరూ అర్దసెంచరీలు పూర్తి చేసుకున్నారు. రెండో వికెట్‌కు 135 పరుగుల భాగస్వామ్యం నమోదు చేసిన అనంతరం రెహ్మాత్‌ను బ్రాత్‌వైట్‌ ఔట్‌ చేసి విండీస్‌కు బ్రేక్‌ ఇస్తాడు. అనంతర వచ్చిన బ్యాట్స్‌మెన్‌ మెరుపు వేగంతో ఆడకపోవడంతో పాటు.. క్రీజులో నిలదొక్కుకోలేకపోయారు. భారీ స్కోర్‌ కావడం.. చివర్లో విండీస్‌ కట్టుదిట్టంగా బౌలింగ్‌ చేయడంతో అఫ్గాన్‌ ఓటమి చవిచూసింది.  అంతకుముందు బ్యాట్స్‌మెన్‌ షాయ్‌ హోప్‌(77; 92బంతుల్లో 6 ఫోర్లు, 2 సిక్స్‌లు), లూయిస్‌ (58; 78బంతుల్లో 6 ఫోర్లు, 2 సిక్స్‌లు), పూరన్‌(58; 43 బంతుల్లో 6 ఫోర్లు, 1 సిక్స్‌) అర్ధసెంచరీలకు తోడు హెట్‌మైర్‌(39: 31 బంతుల్లో 3 ఫోర్లు, 2 సిక్స్‌లు), హోల్డర్‌(45; 34 బంతుల్లో ఫోర్లు, 4 సిక్స్‌లు) మెరుపులు మెరిపించడంతో ఆఫ్గానిస్తాన్‌తో మ్యాచ్‌లో విండీస్‌ నిర్ణీత ఓవర్లలో 6 వికెట్లకు 311 పరుగుల భారీ స్కోరు చేసింది.  అఫ్గాన్‌ బౌలర్లలో దవ్లత్‌ రెండు వికెట్లు పడగొట్టగా, షిర్జాద్, నబి, రషీద్‌ ఖాన్‌ తలో వికెట్‌ దక్కించుకున్నారు.  ప్చ్‌.. గేల్‌.. టాస్‌ గెలిచి తొలుత బ్యాటింగ్‌ ఎంచుకున్న విండీస్‌కు శుభారంభం దక్కలేదు. కెరీర్‌లో చివరి వరల్డ్‌కప్‌ ఆడుతున్న కరేబియన్‌ వీరుడు క్రిస్‌ గేల్‌ (7) నిరాశపర్చాడు. దవ్లత్‌ బౌలింగ్‌లో వికెట్‌ కీపర్‌ ఇక్రమ్‌కు క్యాచ్‌ ఇచ్చి వెనుదిరిగాడు. తర్వాత నుంచి లూయిస్‌–హోప్‌ జోడీ రెండో వికెట్‌కు 88 పరుగులు జతచేసింది. లూయిస్‌ను ఔట్‌ చేయడం ద్వారా ఈ జోడీని రషీద్‌ ఖాన్‌ విడదీశాడు. ఆ తర్వాత హెట్‌మైర్‌తో కలసి హోప్‌ మరో ఉపయుక్త భాగస్వామ్యం(65) నెలకొల్పాడు. వీరిద్దరూ స్వల్పవ్యవధిలో ఔట్‌ కావడంతో విండీస్‌ స్కోరు కాసేపు మందగించింది. అయితే, ఆఖర్లో పూరన్‌–హోల్డర్‌ భారీ షాట్లతో విరుచుకుపడ్డారు. ఈ జోడీ శతక భాగస్వామ్యాన్ని నెలకొల్పింది. చివర్లో బ్రాత్‌వైట్‌ (14 నాటౌట్‌) బ్యాట్‌ ఝుళిపించడంతో విండీస్‌ స్కోరు 300 దాటింది. 

లీడ్స్‌: వరల్డ్‌కప్‌లో భాగంగా వెస్టిండీస్‌ జరుగుతున్న మ్యాచ్‌లో అఫ్గానిస్తాన్‌ దీటుగా బదులిస్తోంది. వెస్టిండీస్‌ నిర్దేశించిన 312 పరుగుల లక్ష్య ఛేదనలో అఫ్గాన్‌ నిలకడగా ఆడుతోంది. 21 ఓవర్లు ముగిసే సరికి వికెట్‌ నష్టానికి 109 పరుగులు చేసింది. రహ్మత్‌ షా, ఇక్రమ్‌ అలీ ఖిల్‌లు హాఫ్‌ సెంచరీలు సాధించారు. భారీ లక్ష్య ఛేదనలో అఫ్గాన్‌ ఆదిలోనే కెప్టెన్‌ గుల్బదీన్‌ నైబ్‌(5) వికెట్‌ను కోల్పోయింది. ఆ తరుణంలో రహ్మత్‌ షాకు జత కలిసిన వికెట్‌ కీపర్‌ ఇక్రమ్‌ అలీ ఖిల్‌లు ఇన్నింగ్స్‌ను చక్కదిద్దే యత్నం చేశారు. విండీస్‌ పేసర్లను సమర్ధవంతంగా ఎదుర్కొంటూ అర్థ శతకాలతో మెరిశారు. అంతకుముందు టాస్‌ గెలిచి ముందుగా బ్యాటింగ్‌ చేసిన విండీస్‌ నిర్ణీత ఓవర్లలో ఆరు వికెట్లు కోల్పోయి 311 పరుగులు చేసింది.  విండీస్‌ ఆటగాళ్లలో ఎవిన్‌ లూయిస్‌(58; 78 బంతుల్లో 6 ఫోర్లు, 2 సిక్సర్లు), షాయ్‌ హోప్‌(77; 92 బంతుల్లో 6 ఫోర్లు, 2 సిక్సర్లు), హెట్‌మెయిర్‌(39; 31 బంతుల్లో 3 ఫోర్లు, 2 సిక్సర్లు), పూరన్‌(58; 43 బంతుల్లో 6 ఫోర్లు, 1 సిక్సర్‌), హోల్డర్‌(45; 34 బంతుల్లో 1 ఫోర్‌, 4 సిక్సర్లు) రాణించడంతో ఆ జట్టు గౌరవప్రదమైన స్కోరు సాధించింది.  

లీడ్స్‌: వన్డే వరల్డ్‌కప్‌లో భాగంగా అఫ్గానిస్తాన్‌తో జరుగుతున్న మ్యాచ్‌లో వెస్టిండీస్‌ 312 పరుగుల టార్గెట్‌ను నిర్దేశించింది. విండీస్‌ ఆటగాళ్లలో ఎవిన్‌ లూయిస్‌(58; 78 బంతుల్లో 6 ఫోర్లు, 2 సిక్సర్లు), షాయ్‌ హోప్‌(77; 92 బంతుల్లో 6 ఫోర్లు, 2 సిక్సర్లు), హెట్‌మెయిర్‌(39; 31 బంతుల్లో 3 ఫోర్లు, 2 సిక్సర్లు), పూరన్‌(58; 43 బంతుల్లో 6 ఫోర్లు, 1 సిక్సర్‌), హోల్డర్‌(45; 34 బంతుల్లో 1 ఫోర్‌, 4 సిక్సర్లు) రాణించడంతో ఆ జట్టు గౌరవప్రదమైన స్కోరు సాధించింది. టాస్‌ గెలిచి బ్యాటింగ్‌ ఎంచుకున్న వెస్టిండీస్‌కు ఆదిలోనే షాక్‌ తగిలింది. ఓపెనర్‌ క్రిస్‌ గేల్‌(7) నిరాశపరచడంతో విండీస్‌ 21 పరుగుల వద్ద తొలి వికెట్‌ను కోల్పోయింది. ఆ తరుణంలో లూయిస్‌-హోప్‌ల జోడి ఇన్నింగ్స్‌ను నడిపించింది. ఈ జోడి రెండో వికెట్‌కు 88 పరుగుల భాగస్వామ్యం సాధించిన తర్వాత లూయిస్‌ రెండో​ వికెట్‌గా ఔటయ్యాడు. ఆపై హెట్‌మెయిర్‌తో కలిసి 65 పరుగులు జత చేశాడు హోప్‌. దాంతో విండీస్‌ గాడిలో పడింది. చివర్లో పూరన్‌, హోల్డర్‌లు ధాటిగా బ్యాటింగ్‌ చేయడంతో విండీస్‌ నిర్ణీత ఓవర్లలో ఆరు వికెట్లు కోల్పోయి 311 పరుగులు చేసింది. ఆఖరి ఓవర్‌లో బ్యాటింగ్‌కు వచ్చిన బ్రాత్‌వైట్‌ నాలుగు బంతులు ఆడి ఒక సిక్స్‌, రెండు ఫోర్లతో 14 పరుగులు చేశాడు. అఫ్గాన్‌ బౌలర్లలో దవ్లాత్‌ జద్రాన్‌ రెండు వికెట్లు సాధించగా, నబీ, రషీద్‌ ఖాన్‌, షిర్‌జాద్‌లకు తలో వికెట్‌ దక్కింది.  

లీడ్స్‌: వన్డే వరల్డ్‌కప్‌లో భాగంగా అఫ్గానిస్తాన్‌తో జరుగుతున్న మ్యాచ్‌లో వెస్టిండీస్‌ టాస్‌ గెలిచి బ్యాటింగ్‌ ఎంచుకుంది. టాస్‌ గెలిచిన విండీస్‌ కెప్టెన్‌ జేసన్‌ హెల్డర్‌ ముందుగా బ్యాటింగ్‌ చేసేందుకు మొగ్గుచూపాడు. ఈ మెగా టోర్నీ నుంచి ఇరు జట్లు ఇప్పటికే సెమీస్‌ రేసు నుంచి నిష్క్రమించిన నేపథ్యంలో ఇది నామమాత్రపు మ్యాచ్‌ కానుంది. ప్రస్తుత వరల్డ్‌కప్‌లో వెస్టిండీస్‌ ఎనిమిది మ్యాచ్‌లు ఆడి ఒక మ్యాచ్‌ మాత్రమే గెలవగా, ఆరు మ్యాచ్‌ల్లో ఓటమి పాలైంది. ఒక మ్యాచ్‌ వర్షం​ కారణంగా రద్దయ్యింది. ఇక అఫ్గానిస్తాన్‌ అస్సలు బోణీనే కొట్టలేదు. ఎనిమిది మ్యాచ్‌లకు గాను ఎనిమిదింట పరాజయం చవిచూసింది. దాంతో తమ చివరి మ్యాచ్‌లోనైనా గెలిచి పరువు నిలుపుకోవాలని యోచిస్తోంది. ఇదిలా ఉంచితే, ఇరు జట్ల మధ్య ముఖాముఖి పోరులో ఐదు వన్డేలు జరగ్గా మూడింట అఫ్గానిస్తాన్ విజయం సాధించగా‌, ఒక దాంట్లో వెస్టిండీస్‌ గెలిచింది. ఒక మ్యాచ్‌లో ఫలితం తేలలేదు. ఈ నేపథ్యంలో వెస్టిండీస్‌పై ఉన్న ఘనమైన రికార్డును కొనసాగించాలనే అఫ్గాన్‌ భావిస్తోంది. అదే సమయంలో విండీస్‌ కూడా గెలుపుపై ధీమాగా ఉంది. తుది జట్లు వెస్టిండీస్‌ జేసన్‌ హెల్డర్‌(కెప్టెన్‌), క్రిస్‌గేల్‌, ఎవిన్‌ లూయిస్‌, షాయ్‌ హోప్‌, హిమ్రాన్‌ హెట్‌మెయిర్‌, నికోలస్‌ పూరన్‌, కార్లోస్‌ బ్రాత్‌వైట్‌, ఫాబియన్‌ అలెన్‌, షెల్డాన్‌ కాట్రెల్‌, ఓష్నీ థామస్‌, కీమర్‌ రోచ్‌ అఫ్గానిస్తాన్‌ గుల్బదిన్‌ నైబ్‌(కెప్టెన్‌), రహ్మత్‌ షా, అస్గర్‌ అఫ్గన్‌, మహ్మద్‌ నబీ, సమిల్లాహ్‌ షిన్వారి, నజిబుల్లా జద్రాన్‌, ఇక్రమ్‌ అలీ ఖిల్‌, రషీద్‌ ఖాన్‌, దవ్లాత్‌ జద్రాన్‌, సయ్యద్‌ షిర్‌జాద్‌, ముజీబ్‌ ఉర్‌ రహ్మన్‌