ఏటూరునాగారం: మీ గూడెంలో ఎవరికైనా కరోనా వచ్చిందా.. అని ప్రశ్నించినప్పుడు వారు చెప్పే సమాధానం వింటే ఎవరైనా ఆశ్చర్యపోవాల్సిందే. అవును.. అడవిలో ఆహ్లాదకరమైన వాతావరణంలో జీవనం సాగించే వారికి కరోనా అంటే కొత్తగా వచ్చిన జ్వరం అని మాత్రమే తెలుసు.! ప్రపంచాన్ని గడగడలాడిస్తోన్న కోవిడ్‌ ఆ గూడెం పొలిమేర కూడా దాటకపోవడం గమనార్హం. సుమారు 15 సంవత్సరాల క్రితం ఛత్తీస్‌గఢ్‌ నుంచి వచ్చిన వీరు ఏటూరునాగారం గ్రామ పంచాయతీలోని మామిడిగూడెంలో కరోనా వంటి మహమ్మారి ఆనవాళ్లు కూడా తాకకుండా ఆనందంగా జీవనం సాగిస్తోన్నారు. ఉదయం లేచినప్పటి నుంచి నిత్యం ఏదో ఒక పనిలో నిమగ్నం కావడం తప్ప మరో ద్యాస లేకుండా ఉంటున్నారు. గ్రామంలోని ఉన్న ఇళ్లు దూరం దూరంగా ఉంటూ అన్ని రకాల చెట్ల మధ్యలో నివసిస్తుంటారు. రిజర్వు ఫారెస్టు కావడంతో పక్కా ఇళ్లు లేకున్నా గూనపెంకులు, మట్టి గోడలను నిర్మించుకొని సావాసం చేస్తున్నారు.  విభిన్నమైన అలవాట్లు గూడేనికి ఆనుకొని ప్రవహిస్తున్న జంపన్నవాగులోని చెలిమల నీటినే నేటికీ తాగునీటిగా వాడుతారు. ఇప్ప పువ్వులను వండుకొని తింటారు. గంజి, అంబలి, లద్దా లాంటివి సేవిస్తారు. ఇప్ప పువ్వు సారను తాగుతుంటారు. కట్టుబొట్టు అంతా విభిన్నంగా ఉంటుంది. ఒకరింటికి ఒకరు పోవడం గానీ, ఒకరి ఆహారం మరొకరు తీసుకోవడం వంటివి చేయరు. ఎవరి ఇంటిలో వారే వండుకోవడం, ఎవరి ఆహారాన్ని వారే సమకూర్చుకుంటారు. అడవిలో లభించే నల్లగడ్డలు, ఎర్రగడ్డలు, పుట్టగొడుగులు ఆహారంగా తీసుకుంటారు. ఏటూరునాగారంలో ప్రతీ శనివారం నిర్వహించే సంతకు వచ్చి వారానికి సరిపడా నిత్యావసర వస్తువులను కొనుగోలు చేసుకుంటారు. అలాగే ఇప్ప పువ్వును బియ్యానికి విక్రయిస్తారు. పువ్వు ఇచ్చి బియ్యాన్ని తీసుకోవడం వారి అలవాటు. కూలీ పనులకు పోయి వస్తే వెంటనే వాగుల్లోకి వెళ్లి స్నానం చేసిన తర్వాతనే గూడెంలోకి వస్తామని గూడెం ప్రజలు చెబుతున్నారు. శానిటైజేషన్‌  అంటే వారికి తెలియదు. శానిటైజర్‌ బాటిళ్లు ఎలా ఉంటాయో కూడా తెలియవు. మూతికి మాస్క్‌ కూడా ఆ గూడెంలో ఎవరు కట్టుకోరు. కరోనాతో ప్రపంచం వణుకుతోన్న ఈ రోజుల్లో కూడా వారు స్వేచ్ఛాయుత జీవితాన్ని గడుపుతున్నారు. కరోనా వచ్చిందా.. మీ గూడెంలో ఎవరికైనా కరోనా వచ్చిందా.. అంటే రాలేదు.. రాదు ధీమాగా చెబుతున్నారు ఈగూడెంవాసులు. ఆ గూడెంలోని జనులను సాక్షి పలకరించగా.. పలు విషయాలను వెల్లడించారు. ఏ ఇంటికి వెళ్లి అడిగినా కరోనా వచ్చిందా అంటే రాలేదనే సమాధానమే వస్తుంది. కరోనా అంటే తెలుసా అంటే కొత్తగా వచ్చిన జ్వరం కదా అని వారి అమాయకమైన మాటలు వింటుంటే విచిత్రంగా ఉంది. కరోనా పేరు చెబితే గడగడలాడుతున్న నేటి తరుణంలో కరోనా అంటే ఉట్టి జ్వరం అన్న ఆలోచనలో ఉండడం గమనార్హం. ఇదేకాకుండా వారిలో ఆత్మవిశ్వాసం ఎక్కువగా ఉన్నట్లు కనిపిస్తోంది. గతంలో వారికి ఏదైనా వ్యాధులు వస్తే చెట్ల పసర్లు, మంత్రాలతోనే నయం చేసుకునేవారు. ఈ మధ్య కాలంలోనే ఆ గూడేనికి ఏఎన్‌ఎంలు వెళ్లి చికిత్సలు అందిస్తున్నారు. లేకుంటే వారికి చెట్ల పసర్లు, మూలికలతోనే వారి రోగాలకు చికిత్సలు చేయించుకునేవారు. కరోనా వైరస్‌ వారి ధరి చేరకపోవడం సంతోషకరం. అయితే వారు ఎప్పుడు కూడా గుమికూడిన ప్రదేశాల్లో ఉండరు. ఎవరిని ముట్టుకోరు. షాపుల దగ్గరకు వస్తే దూరంగా ఉంటూ సామాన్లను సేకరిస్తుంటారు. వారికి తెలియకుండానే కరోనా నియమాలను పాటించడం గమనార్హం. గిరిజనుల అలవాట్లు ఇంటికి ఇంటికి మధ్య దూరం ఉంటుంది. ఆ గూడెంలోకి ఎవరు రాకుండా కుక్కలు కాపలా ఉంటాయి. గూడెంలోకి కొత్త వ్యక్తి వస్తే పది అడుగుల దూరం నుంచి మాట్లాడి పంపిస్తారు. గ్రామం చుట్టూ దట్టమైన అడవి, ఒక పక్క వాగు నీరు  ఎలాంటి విద్యుత్‌ సరఫరా, ఫ్యాన్లు, కూలర్లు ఉండవు. ప్రతి ఇంటి వద్ద రాత్రి వేళలో నెగడు (కర్రలతో నిప్పుపెట్టుకొని ) ఉంటారు.   పొద్దుగాల అడవికి పోతం లేవగానే ముఖం కడుక్కొని అడవికి పోతాం. అడవిలో కావాలి్సన ఫలాలను సేకరిస్తాం. తునికిపండ్లు సేకరించి ఇంటికి తెచ్చుకొని పిల్లలకు ఇస్తాం. కట్టెలు కొట్టడం, ఇంటిచుట్టూ శుభ్రం చేస్తుంటాం. మాకు కావాలి్సన ఆహారాన్ని తయారు చేసుకొని ఉదయమే తింటాం. ఆ తర్వాత చిన్న చిన్న పనులు చేసుకొని పడుకుంటాం. మాకు ఈ కరోనా గురించి పెద్దగా తెలవదు.    - అడమయ్య, మామిడిగూడెం కరోనా అంటే భయం లేదు కరోనా వైరస్‌ మాకు వస్తుందనే భయం లేదు. ఎందుకంటే మేము ఎటు పోవడం లేదు. మా గూడేనికి ఎవరు రావడం లేదు. అది మనుషులతోనే వస్తుందని తెలుసు. ఇప్పటి వరకు మా గూడెంలోని ఎవరికి రాలేదు. అందరం మంచిగానే ఉన్నాం. స్కూళ్లు కూడా బంద్‌ కావడంతో సారు కూడా రావడం లేదు. కరోనా వైరస్‌ అంటే పెద్దగా మేము పట్టించుకోవడం లేదు. - మహేశ్, మామిడిగూడెం ముందస్తు అవగాహన  మామిడిగూడెంలోని గిరిజనులకు ముందస్తుగా అవగాహన కల్పించాం. ఎవరు కూడా బయటకు రాకుండా ఉండాలని వివరించాం. గ్రామానికి ఎవరైనా వస్తే వెంటనే పంపించి వేయాలని సూచనలు చేశాం. గ్రామంలో జ్వరం, దగ్గు, జలుబు వంటి లక్షణాలు వస్తే వెంటనే వైద్య సిబ్బందికి సమాచారం ఇవ్వాలని ఫోన్‌ నంబర్లను అందుబాటులో పెట్టాం. గ్రామానికి వచ్చిపోయే వారు ఎవరు కూడా లేకపోవడంతో వారికి కరోనా భయం లేదు. కరోనా వచ్చే అవకాశాలు కూడా తక్కువే.  - ఈసం రామ్మూర్తి, ఏటూరునాగారం సర్పంచ్‌ చదవండి: జనం చస్తుంటే.. జాతర చేస్తారా.. చదవండి: చెరువులో విషప్రయోగం..


 దండేపల్లి : ప్రధానమంత్రి సంసద్‌యోజన ఆ దర్శ గ్రామంగా ఎంపికైన మండలంలోని గూడెం గ్రామాన్ని ఆదర్శ గ్రామంగా తీర్చి దిద్దుతానని పెద్దపల్లి ఎంపీ బాల్క సుమన్ అన్నారు. ఆదివారం ఆయన గూడెం గ్రామాన్ని సందర్శించి గ్రామస్తులతో మాట్లాడారు. సమస్యలు తెలుసుకున్నారు. స్థానిక పంచాయతీ కార్యాలయంలో వివిధ శాఖల అధికారులు స్థానిక ప్రజాప్రతినిధులు, నాయకులతో మాట్లాడారు.
 
 అనంతరం ఏర్పాటు చేసిన సమావేశంలో  ఎంపీ మాట్లాడుతూ.. పాలకవర్గం లేక అభివృద్ధికి దూరంగా ఉంటున్న గూడెం గ్రామాన్ని దత్తతగా తీసుకున్నామన్నారు. గ్రామంలో రోడ్లు, డ్రెయినేజీలు, తాగునీటి వసతులు కల్పించి ఆదర్శ గ్రామంగా తీర్చి దిద్దుతానన్నారు. పంచాయతీ కార్యాలయం,  అంగన్‌వాడీ, ఆరోగ్య ఉపకేంద్రానికి పక్కా భవనాలు నిర్మిస్తానని చెప్పారు. పక్కనే ఉన్న గోదావరి నదీ తీరం వద్ద  పుష్కరాల సందర్భంగా భక్తుల సౌకర్యార్థం పుష్కర ఘాట్ల నిర్మాణానికి అధికారులు ప్రతిపాదనలు పంపించారన్నారు. రాయపట్నం నుంచి ఎన్టీఆర్ చౌరస్తా వరకు ఫోర్‌లేన్ రోడ్డు నిర్మాణం చేపట్టాలని పలువురు కోరారు.
 
 దీర్ఘకాలికంగా నెలకొన్న ఏజెన్సీ సమస్యను కేంద్రం దృష్టికి తీసుకెళ్లి పరిష్కరిస్తానని చెప్పారు. గ్రామంలో పర్యటిస్తుండగా పింఛన్ రాని కొందరు వృద్ధులు ఇప్పించాలని వేడుకున్నారు. అర్హులందరికీ పింఛన్ వచ్చేలా చూడాలని అధికారులకు సూచించారు. ఆయన వెంట ఎంపీపీ గోళ్ల మంజుల, వైస్ ఎంపీపీ ఆకుల రాజేందర్, స్థానిక ఎంపీటీసీ సభ్యుడు ముత్తె నారాయణ, తహశీల్దార్ కుమారస్వామి, ఎంపీడీవో శ్రీనివాస్, ఈవోపీఆర్డీ శివకృష్ణ టీఆర్‌ఎస్ నాయకులు గురువయ్య, మల్లేశ్, వెంకటేశ్, శ్రీనివాస్, లక్ష్మణ్, తిరుపతి, రమేశ్, మల్లేశ్, స్థానికులు రాజయ్య, సాంబయ్య, మధు, బాపు, తిరుపతి, గోపాల్, రమేశ్, విద్యార్థి సంఘం నాయకులు సోహెల్‌ఖాన్, కుమార్‌యాదవ్, మహేశ్, వివిధ శాఖల అధికారులు, నాయకులు గ్రామస్తులు పాల్గొన్నారు.
  
 గొప్ప పుణ్యక్షేత్రంగా...
 గూడెం శ్రీ సత్యనారాయణ స్వామి ఆలయాన్ని తెలంగాణలోనే గొప్ప పుణ్యక్షేత్రంగా తీర్చిదిద్దుతానని ఎంపీ సుమన్ చెప్పారు. ఆదివారం ఆయన సత్యదేవున్ని దర్శించుకున్నారు. ఈ సందర్భంగా ఆలయ అధికారులు, అర్చకులు ఘనస్వాగతం పలికారు. వేదపండితులు ఆశీర్వచనం చేసి స్వామివారి తీర్థ ప్రసాదాలు అందించారు. ఆలయ అభివృద్ధికి తనవంతు కృషి చేస్తానని ఎంపీ చెప్పారు.  ఈవో పురుషోత్తమాచార్యులు, ఆలయ వ్యవస్థాపక కుటుంబ సభ్యుడు వెంకటస్వామి, అధికారులు, వేదపారయణదారు, అర్చకులు పాల్గొన్నారు.