ప్రముఖ హాలీవుడ్ నటుడు జాకీచాన్ నిర్మించిన ‘ది లెజండరీ అమెజాన్స్’ చిత్రం ‘అమెజాన్ యోధులు’ పేరుతో తెలుగులో విడుదల కానుంది. రిచాజెన్, సెసిలియా చియాంగ్ జంటగా ఫ్రాంకీచాన్ దర్శకత్వంలో రూపొందిన ఈ చిత్రాన్ని జి.వంశీకృష్ణ వర్మ తెలుగు ప్రేక్షకులకు అందిస్తున్నారు. ఈ చిత్రం ట్రైలర్‌ను నిర్మాత డీఎస్ రావు, పోస్టర్స్‌ని నిర్మాత రామకృష్ణ గౌడ్ రిలీజ్ చేశారు. ‘‘యాక్షన్ సన్నివేశాలు ప్రేక్షకులకు థ్రిల్లింగ్ కలిగిస్తాయి.
 
 500 కోట్ల బడ్జెట్‌తో రూపొందిన చిత్రం ఇది. ఈ నెలలోనే విడుదల చేయాలనుకుంటున్నాం’’ అని వంశీకృష్ణ వర్మ చెప్పారు. సహ నిర్మాత: జి.యుగంధర్ రెడ్డి.


 సూపర్‌స్టార్ రజనీకాంత్‌కు ప్రపంచవ్యాప్తంగా అభిమానులున్న విషయం తెలిసిందే. అభిమానులందరూ ఆయన్ను సూపర్ స్టార్ అనీ, తలైవా (నాయకుడు) అనీ పిలుచుకుంటుంటారు. ఇప్పుడు మలేసియాలోని ఆయన అభిమానులు రజనీకి మరో బిరుదు రావాలనుకుంటున్నారు. ఆ బిరుదు పేరు ‘డటుక్’. ఎక్కడా విన్నట్లు లేదే అనుకుంటున్నారా? మలేసియన్ ప్రభుత్వం ఇచ్చే గౌరవ బిరుదు ఇది. ఏదైనా రంగంలో విశిష్ట కృషి చేసినవారికి ఈ బిరుదు ఇస్తుంటారు. సినీ కళాకారుల్లో ఇప్పటివరకూ ఈ బిరుదు హాలీవుడ్ నటుడు జాకీచాన్, నటి మిచెల్లీ యో, బాలీవుడ్ నటుడు షారుక్ ఖాన్‌లకు మాత్రమే దక్కింది.
 
  ఈ బిరుదు అందుకునే అర్హత తమ నాయకుడికి పూర్తిగా ఉందని రజనీకాంత్ అభిమానులు భావిస్తున్నారు. దీనికోసం సంతకాల సేకరణ మొదలుపెట్టారు. మలేసియన్ ప్రభుత్వం దృష్టికి ఈ విషయాన్ని ఆన్‌లైన్ ద్వారా తీసుకెళుతున్నారు. ఈ సామాజిక మాధ్యమం ద్వారా రజనీ అభిమానులు ఆ ప్రభుత్వాన్ని తమ నాయకుడికి ‘డటుక్’ బిరుదు ఇవ్వాల్సిందిగా కోరవచ్చు. ‘‘ఈ గౌరవ బిరుదు జాకీచాన్‌కి దక్కింది. ఇది దక్కించుకునే అర్హత మా నాయకుడిగా మెండుగా ఉంది’’ అని రజనీ అభిమానులు అంటున్నారు. ఇతర దేశాలతో పోల్చితే మలేసియాలో రజనీకి అభిమానులు ఎక్కువ అనీ, అందుకని ఆ ప్రభుత్వం ఈ బిరుదుని ఆయనకు ఇస్తే బాగుంటుందని ఇక్కడి అభిమానులు అభిప్రాయపడుతున్నారు. ఇంతకీ డటుక్ అంటే ఏంటో తెలుసా? ‘నాయకులకే నాయకుడు’ అని అర్థమట.