విజయనగరం అర్బన్‌: ఉమ్మడి విజయనగరం జిల్లా మెంటాడ,  దత్తిరాజేరు మండలా­ల్లోని 562 ఎకరాల విస్తీర్ణంలో కేంద్రీయ గిరిజన యూనివర్సిటీ నిర్మాణానికి మాస్టర్‌  ప్లాన్‌ సిద్ధమైంది. ప్రభుత్వం కేటాయించిన స్థలంలో యూనివర్సి­టీ నిర్వహణకు అవసరమైన.. విస్తరణకు అనువుగా భవనాల నిర్మాణ ప్రతిపాదనలను ఉన్నతాధికా­రు­ల అనుమతి కోసం యూనివర్సిటీ వీసీ ప్రొఫెసర్‌ టీవీ కట్టిమణి పంపించారు. తొలివిడతగా కేటా­యిం­చిన రూ.300.50 కోట్ల వ్యయంతో యూని­వర్సి­టీకి ప్రాథమికంగా అవసరమైన నిర్మాణాలు చేపట్టనున్నారు. వర్సిటీలో ప్రస్తుతం నిర్వహిస్తున్న వివిధ కోర్సులకు చెందిన 20 విభాగాల్లో ప్రతి ఐదింటికి 10 చొప్పున 40 తరగతి గదులు నిర్మిస్తారు. విద్యార్థులు, విద్యార్థినులకు వేర్వేరుగా 500 మందికి సరిపడేలా వసతి గృహాలు, వెయ్యి మందికి సరిపడే ఆడిటోరియం, 300 మంది సామర్థ్యం గల మరో ఆడిటోరియం, అడ్మినిస్ట్రేషన్‌ భవనం, సెంట్రల్‌ లైబ్రరీ, స్కిల్‌ సెంటర్, ఇండోర్, అవుట్‌డోర్‌ స్టేడియాలు, టీచింగ్, నాన్‌ టీచింగ్‌ సిబ్బంది నివాస భవనాలు 100 చొప్పున నిర్మించేందుకు వీసీ ప్రతిపాదనలు పంపించారు. వచ్చే విద్యాసంవత్సరం నుంచి కొత్త భవనాల్లో తరగతులు నిర్వహించేలా యుద్ధప్రాతిపదికన భవనాల నిర్మాణానికి చర్యలు తీసుకుంటున్నారు.  కొత్త భవనాల్లోనే తరగతులు  వచ్చే విద్యా సంవత్సరం కొత్తగా నిర్మించే భవనా­ల్లోనే తరగతులు నిర్వహించాలన్నది లక్ష్యం. ప్రస్తుతం యూనివర్సిటీలో 8 పీజీ, 6 అండర్‌ పీజీ కోర్సులు నడుస్తున్నాయి. మరో రెండు కోర్సులను వచ్చే విద్యా సంవత్సరానికి కొత్తగా తీసుకొస్తాం. ఇందుకోసం 77 మంది బోధన, 89 మంది బోధనేతర సిబ్బంది అవసరం. ప్రస్తుతం బోధన సిబ్బంది 18 మంది, బోధనేతర సిబ్బంది 12 మంది వరకు ఉన్నారు. మిగిలిన పోస్టుల నియామ­కానికి ప్రతిపాద­నలు పంపించాం.  – ప్రొఫెసర్‌ టీవీ కట్టిమణి, కేంద్రీయ గిరిజన యూనివర్సిటీ వీసీ 

సార్వత్రిక ఎన్నికలు సమీపిస్తుండటంతో తుడా (తిరుపతి పట్టణాభివృద్ధి సంస్థ ) మాస్టర్‌ ప్లాన్‌ను పక్కనపెట్టింది. ప్రభుత్వ ఆమోద ప్రతిపాదనకు తాత్కాలికంగా బ్రేక్‌ పడింది.  మాస్టర్‌ ప్లాన్‌పై రైతుల నుంచి తీవ్ర వ్యతిరేకత రావడమే ఇందుకు కారణం. ఓట్లపై ప్రభావం చూపుతుందని అధికార పార్టీ నేతలు వెనక్కి తగ్గారు. ఎన్నికల సమయంలో ఆమోదం తీసుకొస్తే రాజకీయంగా ఇబ్బందులు తప్పవని వీరి భావన. ఈ ఏడాది ఫిబ్రవరి చివరి కల్లా ప్లాన్‌ను ఆమోదింపజేస్తామని చెప్పిన తుడా అధికారులు, పాలకులు కొత్త ఏడాదిలోకి వస్తున్నా ఆ ఊసెత్తలేదు. ఎన్నికల తరువాత నిర్ణయం తీసుకోవాలని యోచిస్తున్నారు. తిరుపతి తుడా:తిరుపతి పట్టణాభివృద్ధి సంస్థ 1982లో ఏర్పాటైంది. ప్రధానంగా వెంచర్‌లు, ప్లాట్లు అనుమతులు ఇవ్వడం, తుడా భూములను అభివృద్ధి చేసి ప్లాట్లుగా విక్రయించడం, షాపింగ్‌ కాంప్లెక్స్‌ను నిర్మించడం ద్వారా వచ్చే ఆదాయంతో తుడా సంస్థ నడుస్తోంది. తిరుపతి అర్బన్, రూరల్, చంద్రగిరి, రేణిగుంట మండలాల పరిధి వరకే ఉన్న తుడాను 2008లో అప్పటి తుడా చైర్మన్‌ చెవిరెడ్డి భాస్కర్‌రెడ్డి విస్తరించారు. ప్రస్తుతం ఈ నాలుగు మండలాలతో పాటు శ్రీకాళహ స్తి, ఏర్పేడు, వడమాలపేట, పుత్తూరు, రామచంద్రాపురం మండలాలు తుడా పరిధిలో ఉన్నాయి. 2005 నాటి తుడా పరిధి మాస్టర్‌ప్లాన్‌తో నెట్టుకొస్తున్నారు. పరిధికి దీటుగా ప్లాన్‌ను విస్తరించలేకపోయారు. 2009లో తుడా మాస్టర్‌ ప్లాన్‌ను రూపొందించాలని భావించారు. అప్పటి సీఎం రాజశేఖర రెడ్డి ఆకస్మికంగా దివంగతులు కావడంతో మాస్టర్‌ ప్లాన్‌ కాస్తా వెనక్కు మళ్లింది. 2015లో అప్పటి వీసీ వెంకట్‌రెడ్డి కొత్త మాస్టర్‌ ప్లాన్‌కు శ్రీకారం చుట్టారు.  వీసీలు వినయ్‌చంద్, హరికిరణ్‌లు దీనికి కృషి చేశారు. ఫలితంగా ఈ ఏడాది జనవరిలో ముసాయిదా సిద్ధమైంది. జనవరి 5 నుంచి 30 రోజుల గడువుతో దీనిపై అభ్యంతరాలు,  సలహాలు, సూచనలు ఇవ్వవచ్చని నోటిఫికేషన్‌ పొందుపరిచారు. ఒక్కసారిగా  రైతులు, సన్నకారు రైతులు, స్థానికుల నుంచిముసాయిదాపై వ్యతిరేకత పెల్లుబుకింది. దీంతో అధికార పార్టీ నేతలు అవాక్కయ్యారు. ఎన్నికలు సమీపిస్తుండటంతో దీనిని కదిపితే కొంప మునుగుతుందని భావించారు. దీంతో కొంతకాలం వాయిదా వేయాలని నిర్ణయించారు. ఇష్టానుసారంగా ప్రతిపాదనలు.. 2035 నాటి అవసరాలంటూ రూ.23,254 కోట్లతో మాస్టర్‌ ప్లాన్‌ను రూపొందించారు. ప్రతిపాదిత ప్రాంతాల్లో రోడ్డు, ఇతర ప్రాజెక్టులకు సూచిస్తే అక్కడ భూములు విలువ కోల్పోతున్నాయి. అమ్మకాలు లేక రైతులు చతికిలపడుతున్నారు. మాస్టర్‌ ప్లాన్‌ అమలు చేస్తే కనీసం 7,500 ఎకరాలు అవసరమవుతాయి. పంట పొలాల్లో అనవసర ప్రతిపాదనలు చేశారని కొందరు, వాడుకలో ఉన్న రోడ్డును కాదని పక్కనే మరో కొత్తరోడ్డు ప్రతిపాదనలు చేయడం వెనుక కుట్ర ఏమిటని మరికొందరు రైతులు నిరసన వ్యక్తం చేశారు. ప్రాధాన్యతలేని ప్రాంతాల్లోనూ రెండుమూడు బైపాస్‌లకు ప్రతిపాదలు చేయడం ఎందుకంటూ ఆగ్రహం చెందుతున్నారు. అప్పో సప్పో చేసి ప్లాట్లు కొన్నవారు దిగాలు పడ్డారు. వెంచర్లు, ఇతర భూములని తేడా లేకుండా ప్రతిపాదనలు చేయడంతో అక్కడ నిర్మాణాలకు అనుమతులు ఉండవు. దీంతో ప్రతిపాదించిన ప్రాంతంలోని భూములకు విలువ తగ్గింది. క్రయ విక్రయాలకు బ్రేక్‌ పడటంతో లబోదిబో మంటున్నారు. రోడ్ల ప్రతిపాదనను వ్యతిరేకిస్తున్న రైతులు.. కొత్త రోడ్ల ప్రతిపాదనలపైనా రైతుల నుంచి వ్యతిరేకత వ్యక్తమవుతోంది. తిరుపతి – అనంతపురం నేషనల్‌ హైవేకు రెండు బైపాస్‌లతో పాటు లింక్‌ రోడ్లను ప్రతిపాదించడంపై రైతులు నిరసిస్తున్నారు. అలిపిరి నుంచి జూపార్కుకు దక్షిణం వైపున కల్యాణిడ్యామ్‌ మలుపు వరకు 120 అడుగుల బైపాస్, అదేవిధంగా శ్రీనివాసమంగాపురం నుంచి కల్యాణిడ్యామ్‌ చెక్‌పోస్టు వరకు పంటతోటలపై మరో బైపాస్‌ ప్రతిపాదించారు. ఇప్పటికే 60 అడుగుల రోడ్డు ఉండనే ఉంది. ఈ మూడు రోడ్లను కలుపుతూ శ్రీవిద్యానికేతన్‌ ఇంజినీరింగ్‌ కళాశాలకు ఎదురుగా మరో 60 అడుగుల లింకు రోడ్డుకు ప్రతిపాదనలు చేశారు. 34 మందికి చెందిన 36 ఎకరాల పంట భూములు పోతాయని అక్కడి రైతులు ధర్నాకు దిగారు. తిరుపతి రూరల్‌ మండలం కొత్తూరు సమీపంలో ట్రాన్స్‌ఫోర్ట్‌ టెర్మినల్‌కు ప్రతిపాదనలు చేయడం అక్కడి రైతులకు నష్టం కలిగిస్తుందని తీవ్ర అభ్యంతరం వ్యక్తం చేశారు. మంగళం గ్రామం నుంచి మూడు పంటలు పండే భూముల్లో రెండు లింకు రోడ్లకు ప్రతిపాదనలు చేశారు. ఇక్కడ అంతా సన్నకారు రైతులు ఉండడంతో తీవ్ర వ్యతిరేకత వ్యక్తమవుతోంది. చింతలచేనులో 60 అడుగుల రోడ్డు ప్రతిపాదననూ స్థానికులు వ్యతిరేకిస్తున్నారు. తుడా మాస్టర్‌ప్లాన్‌లో పాతరోడ్లు సరిగా లేవని  కొత్తరోడ్లకు ప్రతిపాదించారు. తిరుపతి, రూరల్, రేణిగుంట మండలాల్లో ఖరీదైన భూములు ఉన్నాయి. ఇలాంటి ప్రాంతాల్లో కొత్తరోడ్లు, పాత రోడ్ల విస్తరణ చేపడితే నష్టపోయే ప్రమాదముంది. శ్రీకాళహస్తి, ఏర్పేడు, పుత్తూరు మండలాల్లోని భూములు మూడు పంటలకు అనువుగా ఉన్నాయి. ఇక్కడ భూమిని సేకరిస్తే వందలాది ఎకరాలు కోల్పోతామని రైతులు అభ్యంతరం చెబుతున్నారు. ఇలాంటి ప్రాంతాల్లో రైతులు, ప్రజల నుంచి అభ్యంతరాలు వ్యక్తమవుతున్నాయి. ♦ తుడా పరిధి : 1102 చదరపు కి.మీ ♦ అభివృద్ధి నేపథ్యంలో విభజన  : 7 జోన్‌లు ♦ చంద్రగిరి – శ్రీకాళహస్తి మధ్య ఎంఎంటీఎస్‌ రైళ్లు ♦ చంద్రగిరి ప్రాంతం : ఆర్ట్‌ అండ్‌ కల్చర్‌ జోన్‌ ♦ తిరుపతి : కమర్షియల్, ఎడ్యుకేషన్‌ జోన్లు ♦ రేణిగుంట : కమర్షియల్‌ జోన్‌ ♦ గాజులమండ్యం ప్రాంతం : ఇండస్ట్రియల్, లాజిస్టిక్‌ హబ్‌ ♦ పుత్తూరు: మైక్రో ఇండస్ట్రియల్‌ జోన్‌ ♦ ఏర్పేడు, శ్రీకాళహస్తి : ఇండస్ట్రియల్‌ జోన్‌ ♦ శ్రీకాళహస్తి, ఏర్పేడు, పుత్తూరు: ఇండస్ట్రియల్‌ కారిడార్‌


 అన్నవరం : ప్రముఖ పుణ్యక్షేత్రం అన్నవరం దేవస్థానంలో భవిష్యత్తులో చేపట్టబోయే నిర్మాణ పథకాలు, ప్రస్తుతం ఉన్న నిర్మాణాల్లో చేయాల్సిన మార్పులు తదితర విషయాలపై మాస్టర్‌ప్లాన్ సిద్ధమైంది. రాష్ట్రప్రభుత్వం నియమించిన రిటైర్డ్ ఈఈ రాఘవప్రసాద్ ఆధ్వర్యంలోని కమిటీ తాము రూపొం దించిన మాస్టర్ ప్లాన్‌ను గురువారం ఉదయం 11-30 గంటలకు దేవస్థానంలోని నిత్యకల్యాణ మండపంలో పవర్‌పాయింట్ ప్రజంటేషన్ ద్వారా అధికారులు, సిబ్బందికి వివరించనుంది. ఈ విషయాన్ని దేవస్థానం ఈఓ పి.వెంకటేశ్వర్లు బుధవారం రాత్రి ‘న్యూస్‌లైన్’కు తెలిపారు.
  
  ఇదీ మాస్టర్ ప్లాన్ ముఖ్య ఉద్దేశం
  అన్నవరం దేవస్థానానికి గతంలోనే మాస్టర్‌ప్లాన్ రూపొందించారు. అయితే ఆగమశాస్త్రాలను, నియమనిబంధనలను పరిగణనలోకి తీసుకోకుండానే, కేవలం చేపట్టాల్సిన నిర్మాణాల కోసమే దానిని రూపొందించారు. దీనిని పరిగణనలోకి తీసుకుంటూనే, ఆగమశాస్త్ర ప్రకారం మరో మాస్టర్‌ప్లాన్ రూపొందించేందుకు  దేవాదాయశాఖ విశ్రాంత కమిషనర్ ముక్తేశ్వరరావు హైదరాబాద్‌కు చెందిన రాఘవ డిజైన్ వర్క్స్ ఇంజినీర్లను నియమించారు. సుమారు ఆరునెలల క్రితం నుంచి పని ప్రారంభించిన ఇంజినీర్ల బృందం రత్నగిరి, సత్యగిరిపై చేయాల్సిన నిర్మాణాలు, ప్రస్తుతం ఉన్న నిర్మాణాల్లోని ఆగమశాస్త్ర విరుద్ధ లోపాలు, వాటి పరిష్కారాలు, కొండదిగువన చేపట్టాల్సిన అభివృద్ధి పథకాలు, వాటర్ మేనేజ్‌మెంట్, తదితర విషయాలతో ఈ మాస్టర్‌ప్లాన్ రూపొందించింది.
  
  మాస్టర్‌ప్లాన్‌లోని ముఖ్యాంశాలివీ..
  సత్యదేవుని ఆలయం కన్నా దేవస్థానంలోని ఇతర భవనాలు ఎత్తులో ఉండరాదు. అయితే సత్యగిరిపై నిర్మించిన హరిహరసదన్ సత్రం ఆలయం కన్నా ఎత్తులో ఉంది. దీనికి కారణం రత్నగిరి కన్నా, సత్యగిరి ఎత్తు 40 మీటర్లు ఎక్కువ ఉండడమే. దానిపై ఐదంతుస్తుల సత్రం నిర్మించారు. భవిష్యత్తులో ఇలాంటి నిర్మాణాలు జరగకుండా చూడాలి.  
  
   సత్యదేవుని ఆలయానికి భవిష్యత్తులో నిత్యం సరాసరిన  15వేలమంది భక్తులు వచ్చే వీలుంది. దీనికి తగ్గట్టుగా నిర్మాణాలు చేపట్టాలి. దీనికోసం సాధ్యమైనంతగా కొండదిగువన దేవస్థానం విద్యాసంస్థలున్నచోట మౌలికవసతులు కల్పిం చాలి. విద్యాసంస్థలను మరో చోటకు తరలిం చాలి. దీంతో కొండపై భక్తుల తాకిడి తగ్గుతుంది.  సత్యదేవుని ఆలయం వెలుపల ప్రస్తుతం అన్నదానం, ప్రసాదాల తయారీ విభాగాలు ఉన్నాయి.  వీటిని ఆలయ ప్రాకారం లోపలే ఉండేలా చూడాలి. దీనికోసం ప్రస్తుతం ఉన్న షాపింగ్‌కాంప్లెక్స్‌ను  పార్కింగ్‌ప్లేస్‌లోకి మార్చా లి.  ప్రాకారం నిర్మాణానికి అడ్డుగా ఉన్న భవనాలను వాటి జీవితకాలం తర్వాత కూల్చివేయాలి.
  
   దేవస్థానంలోని ప్రతీభవనాన్ని ఆలయ సంస్కృతిని ప్రతిబింబించేలా మార్పు చేయాలి. ఆలయం వెనుక లిఫ్ట్ డిజైన్‌ను కూడా మార్చాలి.   నీటిని రీసైక్లింగ్ చేయడం ద్వారా పొదుపు చేయవచ్చు. బాత్‌రూమ్‌లలో వాడుతున్న నీటిని నిల్వచేసి దానిని మొక్కల పెంపకానికి వాడవచ్చు.  నీటి వినియోగం పెరగనున్నందున ఇప్పటి నుంచే నీటి పొదుపు చర్యలు చేపట్టాలి.   రత్నగిరి చుట్టూ ఉన్న ప్రాంతాలు భవిష్యత్తులో టూరిజం హబ్‌గా రూపొందే అవకాశం ఉంది. అందుకనుగుణంగా ఇప్పటినుంచే ప్రణాళిక ప్రకారం  మౌలిక సదుపాయాలు కల్పించాలి.  
  
  మార్పులు, చేర్పులపై నేడు చర్చ
  మాస్టర్‌ప్లాన్‌లో మార్పులు, చేర్పులపై గురువారం చర్చిస్తారు. అనంతరం దీనిని దేవస్థానం కమిటీ ఆమోదించి దేవాదాయశాఖ కమిషనర్‌కు, అక్కడి నుంచి ఐదుగురు ఐఏఎస్ అధికార్ల కమిటీ ముందుకు పంపుతారు. వారూ ఆమోదించాక ప్రభుత్వం ఆదేశాలు జారీ చేస్తుంది.