కరీంనగర్‌ డెయిరీ కిరీటంలో మరో కలికితురాయిగా నూతన ప్లాంటుకు కేంద్రం గ్రీన్‌సిగ్నల్‌ ఇచ్చింది. తెలంగాణ రాష్ట్రంలో నెంబర్‌వన్‌ స్థానంలో ఉన్న కరీంనగర్‌ డెయిరీ, నూతనంగా మూడు లక్షల లీటర్ల సామర్థ్యం గల మెగా ప్లాంట్‌ను స్థాపించనుంది. తిమ్మాపూర్‌ మండలం నల్గొండ గ్రామంలో నెలకొల్పడానికి కేంద్ర ప్రభుత్వం సోమవారం ఉత్తర్వులు జారీ చేసింది. ఇప్పటికే పాల ఉత్పత్తి, పాడి పరిశ్రమ ద్వారా రైతుల సేవలో తరిస్తున్న డెయిరీకి మరో అరుదైన అవకాశం దక్కింది. 70 వేల మంది రైతులు సభ్యులుగా ఉన్న కరీంనగర్‌ డెయిరీ విస్తరణలో భాగంగా నూతనంగా స్థాపించనున్న ఈ ప్లాంట్‌కు రూ.63 కోట్ల వ్యయం కానుంది. ఇందులో రూ.10 కోట్ల సబ్సిడీని సోమవారం ఢిల్లీలో కేంద్ర మంత్రి హర్రిమ్రత్‌ కౌర్‌ బాదల్‌ అధ్యక్షతన జరిగిన సమావేశంలో ‘ప్రధాన మంత్రి కిసాన్‌ సంపద యోజన’ కింద మంజూరు చేశారు. కొత్త ప్లాంటు స్థాపనతో నూతనంగా 500 మందికి నేరుగా ఉద్యోగాలు లభించనుండగా, పరోక్షంగా మరెందరికో ఉపాధి కలగనుంది.  సాక్షిప్రతినిధి, కరీంనగర్‌: కరీంనగర్‌ డెయిరీ పాడి పరిశ్రమాభివృద్ధి ద్వారా తెలంగాణలో క్షీర విప్లవానికి నాంది పలికింది. కరీంనగర్‌ డెయిరీలో 95 శాతం చిన్న, సన్నకారు రైతులే ఉన్నారు. ఈ డెయిరీ పాల మార్కెటింగ్‌కు దేశవ్యాప్తంగా పేరుంది. రెండు లక్షల లీటర్ల పాల ఉత్పత్తి నుంచి మూడు లక్షలకు పెంచేందుకు పాలకవర్గం కృషి చేస్తోంది. ప్రభుత్వం లీటరుకు 4 రూపాయల ప్రోత్సాహకంతోపాటు పాడిపశువుల కొనుగోలుకు పశువుకు రూ.30 వేల సబ్సిడీ పథకం కూడా ప్రకటించి గత సెప్టెంబర్‌ 24 నుంచి అమలు చేస్తోంది. లీటరుకు రూ.4 ప్రోత్సాహం కింద ఉమ్మడి కరీంనగర్‌ జిల్లాలో గతేడాది సరాసరి పాలసేకరణ ఆధారంగా రోజుకు 1,47,000 లీటర్లకు లీటరుకు 4 రూపాయల చొప్పున ప్రోత్సాహకం అందిస్తున్నారు. ఈ మేరకు రోజుకు రూ.5.88 లక్షలు లబ్ధి కలుగుతుండగా, నెలకు రూ.1,76,40,000 లబ్ధి చేకూరుతోంది. కరీంనగర్‌ డెయిరీ పరిధిలోని రైతులకు ఈ పథకం ద్వారా రూ.21 కోట్ల 16 లక్షల 80 వేల లబ్ధి వస్తోంది. అదేవిధంగా 70 వేల పాడిరైతులకు పాడిపశువు కొనుగోలుకు ఒక్కో పశువుకు రూ.30 వేల చొప్పున 210 కోట్ల మేర సబ్సిడీ అందించేందుకు కరీంనగర్‌ డెయిరీ పాలకవర్గం కృషి చేస్తోంది. ఇదే సమయంలో రూ.63 కోట్లతో కరీంనగర్‌ డెయిరీ నూతనప్లాంటు ఏర్పాటుకు కేంద్రం గ్రీన్‌సిగ్నల్‌ ఇవ్వడంపై రైతుల నుంచి హర్షం వ్యక్తమవుతోంది. 9 జిల్లాలకు ప్రయోజనం.. 70 వేల మంది రైతులు సభ్యులుగా ఉన్న డెయిరీ విస్తరణలో భాగంగా నూతనంగా స్థాపించనున్న ఈ ప్లాంట్‌ ద్వారా తొమ్మిది జిల్లాల రైతులకు  ప్రయోజనం కలగనుంది. సుమారు రూ.63 కోట్ల వ్యయం కానున్న ఈ ప్లాంట్‌ కోసం రూ.10 కోట్లు కేంద్రం సబ్సిడీ అందనుంది. ఈ నూతన ప్లాంటుకు గ్లోబల్‌ అగ్రి సిస్టమ్‌ వారు సాంకేతిక సలహాలు అందించేలా ఒప్పందం జరిగింది. నూతన ప్లాంటుతో 15 బల్క్‌ మిల్క్‌ కూలింగ్‌ కేంద్రాలను స్థాపించనున్నారు. వీటి ద్వారా కరీంనగర్, రాజన్న సిరిసిల్ల, నిజామాబాద్, పెద్దపల్లి, జగిత్యాల, కామారెడ్డి, మెదక్, సిద్దిపేట, జనగామ జిల్లాల రైతులు ప్రయోజనం పొందనున్నట్లు డెయిరీ వర్గాలు వెల్లడించాయి. కరీంనగర్‌ డెయిరీ చరిత్రలో మరో అధ్యాయం నూతన ప్లాంటు ఏర్పాటు తెలంగాణ రైతాంగానికి, డెయిరీ చరిత్రలో ప్రగతికి మరో ఆధ్యాయం. నూతన ప్లాంటు కు గ్లోబల్‌ అగ్రి సిస్టమ్‌ వారు సాంకేతిక సలహాలు అందించనున్నారు. ఈ ప్లాంటు ద్వారా కరీంనగర్, రాజన్నసిరిసిల్ల, నిజామాబాద్, పెద్దపల్లి, జగిత్యాల, కామారెడ్డి, మెదక్, సిద్దిపేట, జనగామ జిల్లాల రైతులు ప్రయోజనం పొందుతారు. కరీంనగర్‌ ఎంపీ వినోద్‌కుమార్‌ కృషి, ప్రయత్నంతో తెలంగాణ రైతాం గానికి, డెయిరీ చరిత్రలో ప్రగతికి మరో ఆధ్యాయం ప్రారంభం     అవుతోంది.   – చలిమెడ రాజేశ్వర్‌రావు, చైర్మన్, కరీంనగర్‌ డెయిరీ


 పాలు సంపూర్ణ ఆహారం అన్నది ఎంత నిజమో.. రసాయనిక అవశేషాలతో కూడిన పాలు అనారోగ్య హేతువన్నది కూడా అంతే నిజం! సేంద్రియ పాలపై మధ్యతరగతి వినియోగదారుల్లో అవగాహన క్రమంగా పెరుగుతున్నది. సేంద్రియ పాల ఉత్పత్తికి దేశీ జాతి పశువులతో పాటు, రసాయనిక అవశేషాల్లేని గడ్డి, దాణా దినుసులు అవసరం. దాణాలో బీటీ పత్తి చెక్కను వాడకూడదు. నిపుణులు సిఫారసు చేసిన ఔషధాలను మాత్రమే వాడాలి. నీడన కట్టేసి ఉండే పశువుల పాల కన్నా.. ఆరుబయట తిరిగే పశువుల పాలు ఇంకా శ్రేష్టమని నిపుణులు చెబుతున్నారు. సేంద్రియ పాల డెయిరీలు మన రాష్ట్రంలోనూ ప్రజాదరణ పొందుతున్నాయనడానికి ఈ యువరైతుల అనుభవాలే నిదర్శనం..
  
 సేంద్రియ పాడి రైతుగామారిన యువ వైద్యుడు
 ఆరోగ్యవంతమైన సేంద్రియ పాలను వినియోగదారులకు అందించే లక్ష్యంతో డా. గద్దె సుదర్శనరావు అత్యాధునిక రీతిలో డెయిరీ ఫాంను నెలకొల్పారు. కృష్ణా జిల్లా పమిడిముక్కలకు చెందిన సుదర్శనరావు హైదరాబాద్‌లో ఎంబీబీఎస్ చదివిన తర్వాత కాంట్రాక్టర్‌గా స్థిరపడ్డారు. రసాయనిక అవశేషాలు లేని, ఔషధ గుణాలు కలిగిన పాలను ఉత్పిత్తి చేసి ప్రజలకు అందిస్తే వారికి మంచి ఆరోగ్యాన్నిచ్చినట్టేనని భావించారు. పమిడిముక్కల మండలం వీరంకిలాకులో అత్యాధునిక పద్ధతుల్లో డెయిరీని ఏర్పాటు చేశారు. విశ్రాంత వైద్యుడైన తన తండ్రి డా. జీవీ కృష్ణారావు తోడ్పాటుతో డెయిరీని నిర్వహిస్తున్నారు. ఔషధ విలువలతోపాటు పాలధార ఎక్కువగా ఉండే 40 దేశవాళీ గిర్ జాతి ఆవులతోపాటు 20 జాఫరాబాదే రకం గేదెలతో గత ఏడాది నవంబర్ 1న డెయిరీ ఫాంను ప్రారంభించారు. గుజరాత్‌లోని గిర్ అటవీ ప్రాంతానికి చెందిన గిర్ ఆవులను కొనుగోలు చేశారు. రోజుకు ఒక్కో ఆవు 20 లీటర్లు, ఒక్కో గేదె 16 లీటర్లు వరకు పాల దిగుబడి ఇస్తున్నాయి. పాలను ప్యాకెట్లలో నింపి హైదరాబాద్ మార్కెట్‌కు తరలిస్తూ మంచి ఆదాయాన్ని గడిస్తున్నారు.
 
 ఆధునిక పద్ధతిలో గోధుమ గడ్డి సాగు!
 సేంద్రియ విధానంలో ఆధునిక హైడ్రోపోనిక్ పద్ధతిలో పచ్చి మేతను సాగు చేస్తుండడం విశేషం. రూ.35 లక్షల వ్యయంతో హైడ్రోపోనిక్ ఫాడర్ మిషన్‌ను నెలకొల్పారు. శీతలీకరణ గిడ్డంగి మాదిరిగా ఉండే ప్రత్యేకంగా రూపొందించిన ఈ పశుగ్రాస యంత్రం ద్వారానే బార్లీ, గోధుమ, అలసంద, మొక్కజొన్న తదితర విత్తనాలతో పచ్చి మేతను పెంచుతున్నారు. ట్రేలలో ఈ గింజలను పోసి.. ఆరు రోజులపాటు 18 డిగ్రీల ఉష్ణోగ్రతలో ఉంచి, 20 నిమిషాలకోసారి నీటి తుంపరలు పడేలా ఏర్పాటు చేశారు. ప్రస్తుతం విద్యుత్/ జనరేటర్‌తో నడుస్తున్న ఈ యంత్రాన్ని గోబర్ గ్యాస్‌తో నడిపేందుకు ఏర్పాట్లు చేస్తున్నారు. మొలకెత్తిన గింజలు ఏడో రోజుకు సుమారు 5 అంగుళాల ఎత్తు పెరుగుతాయి. రసాయనాలు వాడకుండా పెంచిన ఈ గడ్డిని ఆవులకు మేపుతున్నారు. ఒక కిలో విత్తనాలతో పది కిలోల పశుగ్రాసం లభిస్తున్నట్లు నిర్వాహకులు తెలిపారు. ఈ గడ్డితోపాటు ఆవులు, గేదెలకు దాణా కూడా పెడుతున్నారు. పచ్చి మేత పెంపకంతోపాటు పాలు పితకడం.. పితికిన పాలను శీతలీకరించడం.. ప్రత్యేకంగా సంచుల్లో నింపడం.. అంతా యంత్రాలతోనే చేస్తుండడం విశేషం. సుధాకరరావు ఆరోగ్యదాయకమైన పాలను ఉత్పత్తి చేస్తూ మంచి ఆదాయం పొందుతున్నారు.
  - ఐ.ఉమామహేశ్వరరావు సాక్షి, మచిలీపట్నం, కృష్ణా జిల్లా
  (ఇన్‌పుట్స్: పామర్తి నాగేంద్రరావు,న్యూస్‌లైన్, పమిడిముక్కల)
  
 స్వచ్ఛమైన పాల ఉత్పత్తిలో యువ రైతు
 మెదక్ జిల్లాలో ఓ యువరైతు సహజమైన పద్ధతుల్లో దేశవాళీ ఆవుల డెయిరీ నిర్వహిస్తూ స్వచ్ఛమైన పాల ద్వారా ఆరోగ్యకరమైన సమాజ నిర్మాణానికి తన వంతు కృషి చేస్తున్నారు. సికింద్రాబాద్‌లోని బేగంపేటకు చెందిన ఒమర్ (27) పదో తరగతి వరకు చదువుకొని కొన్ని సంవత్సరాలు చిన్నా చితకా ఉద్యోగాలు చేశాడు. సంతృప్తి చెందక వ్యవసాయంపై దృష్టి పెట్టాడు. జగదేవ్‌పూర్ మండలం గణేష్‌పల్లిలో మూడేళ్ల క్రితం ఏడెకరాల భూమిని కొనుగోలు చేసి రెండు బోర్లు వేశాడు. తొలి ఏడాది మొక్కజొన్న సాగు చేశాడు. ఆ తర్వాత అతని మనసు పాడి పరిశ్రమ వైపు మళ్లింది. ఏదైనా ప్రత్యేకత ఉంటే మార్కెటింగ్ సులువు అవుతుందన్న భావనతో నాటు ఆవులతో డెయిరీని నిర్వహించడం మేలనుకున్నాడు. గుజరాత్ వెళ్లి అధి కంగా పాలిచ్చే 17 నాటు ఆవులను కొనుగోలు చేశాడు. నిపుణుల సలహా మేరకు.. ఆవులను స్వేచ్చగా ఆరుబయట తిరిగి మేత మేసే విధంగా తన వ్యవ సాయ క్షేత్రానికి చుట్టూ ఫెన్సింగ్ వేయించాడు. పొ లంలో రసాయనిక ఎరువులు వినియోగించకుండా జీవామృతంతో పశుగ్రాసం సాగు చేసి ఆవులకు మేపుతూ మంచి ఆదాయం పొందుతున్నాడు. ప్రస్తుతం 9 ఆవులు ఒక్కొక్కటి రోజుకు 10 లీటర్ల వరకు పాలు ఇస్తున్నాయి. ఈ ఉత్సాహంతో ప్రకృతి వ్యవసాయ పద్ధతిలో కూరగాయల సాగు కూడా చేపట్టడానికి ఒమర్ సంసిద్ధమవుతున్నాడు.     
  - వై.సురేందర్, న్యూస్‌లైన్, గజ్వేల్, మెదక్ జిల్లా
  
 మొదట్లో ఎవరూ ఆదరించలేదు!
 స్వచ్ఛమైన పాలను తొలుత తా ను ఊరురా తిరిగి అమ్మే వాడిని. అయితే అవగాహనలేక ప్రజలు కొనడానికి ఆసక్తి చూపలేదు. హైద్రాబాద్ లోని ప్రముఖ మిఠాయి వ్యాపారవేత్త ఇటీవలే నా గురించి తెలుసుకొని పాలను కొనుక్కెళ్తున్నారు. ఏపూటకాపూట తాజాగా వినియో గదారులకు అందిస్తున్నారు. సంకర జాతి ఆవు పాలకన్నా ఈ పాలకు రెట్టింపు ధర పలుకుతుండడంతో మంచి ఆదాయం పొందగలుగుతున్నా. రసాయనాల అవశేషాలు లేని, ఔషధ విలువలు కలిగిన ఈ పాలు చక్కని ఆరోగ్యాన్ని, ఆయుష్షును అందిస్తాయని వినియోగదారులు అర్ధం చేసుకుంటున్నారు. స్వచ్ఛమైన పాలకు డిమాండ్ ఇంకా పెరుగుతుంది.
  - ఒమర్ (99085 71176), దేశీ ఆవు పాల రైతు,
  గణేష్‌పల్లి, జగదేవ్‌పూర్ మండలం, మెదక్ జిల్లా
  
 సహజమైన పాలు అందించడమే లక్ష్యం!
 సహజసిద్ధమైన ఆవు పాలను అందించే లక్ష్యంతో రసాయనాలు వాడని మేతను ఆవులకు మేపుతున్నాం. ఆయుర్వేద ఔషధాలను వాడాలనుకుంటున్నాం. సేంద్రియ పాల ఉత్పత్తిపై ఆసక్తితో వివిధ రాష్ట్రాల్లో పర్యటించి డెయిరీలను పరిశీలించి ఆధునిక పద్ధతిలో ఈ డెయిరీని ఏర్పాటు చేశా. యంత్రాల వాడకం ద్వారా కూలీల కొరతను అధిగమించాం. మా డెయిరీలో ముగ్గురు కార్మికులు, ఒక సూపర్‌వైజర్ పనిచేస్తారు. మా నాన్న డా. జీవీ కృష్ణారావు (99590 90105, 99632 00729) పర్యవేక్షిస్తున్నారు. డెయిరీ ఫాంకు అనుసంధానంగా గోబర్ గ్యాస్ ప్లాంట్, సోలార్ సిస్టంను పెట్టుకుంటే కరెంటు ఖర్చు తగ్గుతుందనుకుంటున్నాం.
  - డా. గద్దె సుదర్శనరావు, సేంద్రియ డెయిరీ యజమాని,
  వీరంకిలాకు, పమిడిముక్కల మండలం, కృష్ణా జిల్లా
  
 నాటు పశు జాతుల ప్రత్యేకతేమిటి?
 ఎ2 బీటా కెసిన్ అనే ప్రొటీన్ పుష్కలంగా ఉండే సేంద్రియ పాలకు ఆస్ట్రేలియా, న్యూజిలాండ్ వంటి దేశాల్లో మంచి గిరాకీ ఉంది. ఈ పాలకు మన దేశంలోనూ ఇప్పుడిప్పుడే ప్రాచుర్యం పెరుగుతోంది. మోపురం ఉండే దేశీ/నాటు జాతుల ఆవులు, బర్రెల పాలల్లో ఎ2 కెసిన్ 94 నుంచి 100% వరకు ఉందని హర్యానాలోని భారతీయ జంతు జన్యు వనరుల సంస్థ(ఎన్ బీఏజీఆర్) అధ్యయనంలో తేలింది. గిర్ తదితర జాతుల ఆవు పాలలో ఎ2 కెసిన్ 100% ఉండగా, ఒంగోలు ఆవు తదితర దేశీ పశుజాతుల పాలలో 94 శాతం ఉందని వెల్లడైంది.
  
 దేశీ ఆవు పెరుగుతో మధుమేహానికి చెక్!
 దేశీ లేదా నాటు ఆవు పెరుగుతో మధుమేహం తగ్గించవచ్చని హైదరాబాద్(ఇక్రిశాట్ ఆవరణ)లోని అంతర్జాతీయ పశు పరిశోధన సంస్థకు చెందిన శాస్త్రవేత్త డాక్టర్ ఎం. సాయిబుచ్చారావు అంటున్నారు. అధ్యయనంలో భాగంగా ఆయన ఒంగోలు, గిర్ ఆవులకు మూలికలతో ప్రత్యేకంగా రూపొందించిన దాణా పెట్టి.. ఈ ఆవుల పాలతో తయారైన పెరుగును స్వచ్ఛందంగా ముందుకొచ్చిన ముగ్గురు మధుమేహ రోగులకు తినిపించారు. ఈ అధ్యయనం ప్రాథమిక దశ విజయవంతంగా పూర్తయిందని డా. సాయిబుచ్చారావు తెలిపారు. తదుపరి దశ అధ్యయనం కొనసాగుతోందన్నారు. దీని ఫలితాలను ప్రపంచ ఆరోగ్య సంస్థకు నివేదిస్తామని ఆయన వివరించారు.
  


 పర్చూరు, న్యూస్‌లైన్:
  పాడి పరిశ్రమ తీవ్ర సంక్షోభం ఎదుర్కొంటోంది. పశుపోషణ భారమై పాల ఉత్పత్తి ఏమాత్రం గిట్టుబాటు కాకపోవడంతో పాడి పశువులను అమ్ముకుంటున్నారు. వేసవితో పోలిస్తే పాల ఉత్పత్తి కొంత పుంజుకున్నా..గతేడాది ఇదే సమయానికి జిల్లాలో ఉత్పత్తి అవుతున్న పాలకు, ప్రస్తుతం ఉత్పత్తి అవుతున్న పాలకు మధ్య 20 శాతం వ్యత్యాసం కనిపిస్తోంది. దాణా ధరలు విపరీతంగా పెరగడం, పాల సేకరణ ధరలు ఖర్చులకు తగినట్లు పెంచకపోవడం ఇందుకు ప్రధాన కారణమని పశుపోషకులు పేర్కొంటున్నారు. జిల్లా డెయిరీతో పాటు ప్రైవేటు డెయిరీల్లో కలిపి ప్రస్తుతం సుమారు 3 లక్షల లీటర్ల పాలు సేకరిస్తున్నట్లు అంచనా. పది శాతం వెన్న ఉన్న గేదె పాలను జిల్లా డెయిరీకి అనుబంధంగా నడిపే పాల ఉత్పత్తిదారుల సహకార సంఘాల ద్వారా లీటరు 44కు కొనుగోలు చేస్తున్నారు. ప్రైవేటు డెయిరీలైతే * 46 చెల్లిస్తున్నాయి.  
  
  పశువైద్యం గగనం...
  ప్రభుత్వ పశువైద్యశాలల్లో సీజనల్ వ్యాధులకు సకాలంలో వైద్యం అందడం గగనమైంది. గ్రామాల్లో తెలిసీ తెలియని వైద్యం చేస్తున్న వ్యక్తుల కారణంగా పశువుల్లో మరణాల శాతం అధికమైంది. పశుసంవర్థక శాఖ అధికారులు మొక్కుబడిగా ఉచిత మెడికల్ క్యాంపులు నిర్వహిస్తూ మమ అనిపిస్తున్నారు. ప్రభుత్వ వైద్యశాలల్లో పర్యవేక్షణ కొరవడింది. ప్రభుత్వాస్పత్రుల్లో లైవ్‌స్టాక్ ఆఫీసర్లు, అసిస్టెంట్ల పోస్టులు ఖాళీగా ఉన్నాయి. ఒక్క ఒంగోలు డివిజన్‌లో లైవ్‌స్టాక్ ఆఫీసర్లు మూడు పోస్టులు, లైవ్‌స్టాక్ అసిస్టెంట్ పోస్టులు ఐదు ఖాళీగా ఉన్నాయి. దీనికితోడు పశువైద్యశాల భవనాలు చాలాచోట్ల శిథిలావస్థకు చేరాయి. నియోజకవర్గ కేంద్రమైన పర్చూరులో పశువుల ఆస్పత్రి భవనం శిథిలావస్థకు చేరుకుంది. రైతులు సమకూర్చిన భవనంలో తాత్కాలికంగా పశువైద్యశాల నిర్వహిస్తున్నారు. వీరన్నపాలెంలో పశువైద్యశాలకు నిధులు మంజూరైనా నిర్మాణం నత్తనడకన సాగుతోంది. జిల్లాలో చాలాచోట్ల పరిస్థితి ఇలానే ఉంది.
  
  రైతులకు దక్కేది తక్కువే...
  పశువైద్యం పరిస్థితి ఇలా ఉంటే రైతుల వద్ద తక్కువ ధరకు పాలను సేకరిస్తూ ఎక్కువ ధరకు విక్రయించేందుకు డెయిరీలు మొగ్గుచూపుతున్నాయి. రైతుల వద్ద వెన్నశాతం ఆధారంగా పాలు కొనుగోలు చేసే పాలసేకరణ కేంద్రాలు వినియోగదారులకు మాత్రం నిర్దేశించిన ధరకు విక్రయిస్తుంటారు. ఉదాహరణకు పది శాతం ఉన్న పాలకు మాత్రమే లీటరుకు * 44 చొప్పున అందజేస్తారు. సాధారణంగా రైతులు కేంద్రాలకు తెచ్చే పాలల్లో సరాసరి వెన్న 7-8 శాతం వరకు మాత్రమే ఉంటుంది. వెన్న శాతం ప్రకారం రైతులకు ధర చెల్లిస్తారు. కేంద్రాల్లో పాలు కొనుగోలు చేసే వినియోగదారులకు మాత్రం వెన్నశాతంతో పనిలేకుండా లీటరు * 44 విక్రయిస్తారు. వ్యవసాయానికి అనుబంధంగా ఉన్న పాడి పరిశ్రమపై ప్రభుత్వ ప్రోత్సాహం అంతంతమాత్రంగానే ఉంది. పక్క రాష్ట్రాలైన కర్ణాటకలో పాడి రైతులకు లీటరు * 4, తమిళనాడులో లీటరుకు * 2 చొప్పున ప్రభుత్వాలు ప్రోత్సాహకాన్ని అందజేస్తున్నాయి. మన రాష్ట్రంలో ఈ తరహా విధానం లేకపోగా..వ్యవసాయం మాదిరిగా వడ్డీలేని రుణాలు ఇస్తున్న దాఖలాలు కూడా లేవు. గత నాలుగైదేళ్లలో పాడిపరిశ్రమ కోసం ప్రవేశపెట్టిన ఒక్క పథకం కూడా సక్రమంగా అమలుకు నోచుకోలేదు.
  
  జిల్లాను ముంచెత్తుతున్న కల్తీపాలు:
  ఇక్కడ కల్తీ అవుతున్న పాలు తక్కువగానే ఉన్నా..ఇతర జిల్లాల నుంచి వస్తున్న కల్తీపాలు మార్కెట్‌ను ముంచెత్తుతున్నాయి. ఆహార భద్రతా ప్రమాణాల సంస్థ పర్యవేక్షణ లేదు. తనిఖీలు నిర్వహించిన దాఖలాలూ లేవు. ఏవి అసలు..ఏవి నకిలీ అని నిర్ధారించే పరిస్థితి లేదు. దీనివల్ల ప్రజారోగ్యం దెబ్బతినడంతో పాటు పాడిపరిశ్రమ కుంటుపడుతోంది.  
  
  ప్రస్తుతం డెయిరీఫామ్‌లు నష్టాల్లో నడుస్తుంటే..2, 3 గేదెల పోషణ కూడా రైతులకు భారమైంది. దీంతో పశువుల్ని అమ్ముకోవాల్సి వస్తోంది. గేదెల్ని కొనేవారు కూడా ముందుకు రావడం లేదు. పరిస్థితి ఎంత దారుణంగా ఉందంటే గతేడాది * 40 వేలు పలికిన పాడిగేదెలను ప్రస్తుతం * 30 వేలకు సైతం కొనుగోలు చేసేందుకు ముందుకు రావడం లేదు.  వ్యవసాయ రంగానికి ప్రత్యామ్నాయంగా రైతులను ఆదుకుంటున్న పాడిపరిశ్రమ కనుమరుగయ్యే పరిస్థితుల నుంచి కాపాడాల్సిన బాధ్యత ప్రభుత్వంపై ఉంది.