గుత్తిరూరల్‌: మండలంలోని బసినేపల్లి తండా శివార్లలో కర్నూలు జిల్లా తుగ్గలి మండలం జి.ఎర్రగుడి వద్ద పొలంలో మంగళవారం ట్రాక్టర్‌ టిల్లర్‌ అదుపు తప్పి గుంతలో పడి డ్రైవర్‌ బండారు నాగరాజు(35) మృతి చెందాడు. వివరాలు. జి.ఎర్రగుడికి చెందిన బండారు నాగరాజు ట్రాక్టర్‌ డ్రైవర్‌గా జీవనం సాగిస్తున్నాడు. ఈ క్రమంలో గ్రామ శివార్లలో పొలంలో పెద్ద రాళ్లను ట్రాక్టర్‌ టిల్లర్‌తో తొలగించేందుకు వెళ్లాడు.
 
 వెనుక వైపు గుంత ఉంటడం గమనించకుండా ట్రాక్టర్‌ రివర్స్‌లో వేగంగా తీసుకెళ్లడంతో అదుపు తప్పి బోల్తా పడింది. ప్రమాదంలో డ్రైవర్‌ నాగరాజుపై ట్రాక్టర్‌ పడటంతో అక్కడికక్కడే మృతి చెందాడు. అతడికి భార్య యమున, ఇద్దరు వికలాంగ కుమారులు, కుమార్తె ఉన్నారు. మృతదేహాన్ని పోస్టుమార్టం నిమిత్తం గుత్తి ప్రభుత్వాసుపత్రికి తరలించి, పోలీసులు కేసు దర్యాప్తు చేస్తున్నారు.


 చిలమత్తూరు : ఆటోను వెనుక వైపు నుంచి ట్రాక్టర్‌ ఢీకొన్న  ప్రమాదంలో ఓ వ్యక్తి మృతి చెందిన సంఘటన గురువారం కొడికొండ జిల్లా పరిషత్‌ ఉన్నత పాఠశాల సమీపంలో చోటు చేసుకుంది. స్థానికులు తెలిపిన వివరాల మేరకు.. కర్ణాటక జిల్లా జర్ల  గ్రామం వైపు నుంచి  కొడికొండ వైపు  ఆటో వస్తోంది.  సోమఘట్ట వైపు నుంచి కొడికొండ వైపు వస్తున్న ట్రాక్టర్‌లో చెడిపోయిన బైక్‌ను తీసుకుని బలిజపల్లి గ్రామానికి చెందిన నాగరాజు (39) వస్తున్నాడు. ఈ క్రమంలో ఆటోను వెనుక వైపు నుంచి ట్రాక్టర్‌ ఢీకొంది. ట్రాక్టర్‌లో ఉన్న నాగరాజు తలకు, కాళ్లు, చేతులకు బలమైన గాయలయ్యాయి. చిక్సిత నిమిత్తం అతడిని హిందూపురం ఆస్పత్రికి తరలించగా.. అక్కడ మృతి చెందాడు. అతడికి భార్య, ఇద్దరు పిల్లలు ఉన్నారు.