సాక్షి, హైదరాబాద్‌: తెలంగాణలోని 8 స్థానిక సంస్థలకు ఉత్తమ పంచాయతీ పురస్కారాలు దక్కాయి. జాతీయ పంచాయతీ దివస్‌ సందర్భంగా ఏప్రిల్‌ 24న ఈ అవార్డులను ఏటా కేంద్రం అందజేస్తోంది. ఇందులో ఈ ఏడాదికి దీనదయాళ్‌ ఉపాధ్యాయ్‌ పంచాయతీ సశక్తి కరణ్‌ పురస్కార్‌ను తెలంగాణలోని ఒక జిల్లా పరిషత్‌తోపాటు, 2 మండల పరిషత్‌లను, మరో 4 గ్రామపంచాయతీలను కేంద్రం ఎంపిక చేసింది. జిల్లా పరిషత్‌ విభాగంలో ఆదిలాబాద్, మండల పరిషత్‌ విభాగంలో సిద్దిపేటతోపాటు పెద్దపల్లి జిల్లా శ్రీరాంపూర్‌ మండల పరిషత్‌కు పురస్కారం దక్కింది. గ్రామపంచాయతీ విభాగంలో రాజన్న సిరిసిల్ల మండలం ముష్టిపల్లి, సిద్దిపేట మండలం ఇర్కోడు, రంగారెడ్డి జిల్లా ఫారూఖ్‌నగర్‌ మండలం గంటల్‌పల్లి, కరీంనగర్‌ జిల్లా రామడుగు మండలం వెలిచాల పురస్కారం దక్కించుకున్నాయి. అవార్డుకు ఎంపికైన జిల్లా పరిషత్‌కు రూ.50 లక్షలు, మండల పరిషత్‌లకు రూ.25లక్షలు, గ్రామపంచాయతీలకు జనాభా ప్రాతిపదికన రూ.8 లక్షల నుంచి రూ.12 లక్షల నగదు ప్రోత్సాహకాన్ని కేంద్రం అందజేస్తుంది. నానాజీ దేశ్‌ముఖ్‌ రాష్ట్రీయ గౌరవ్‌ గ్రామ సభ పురస్కారాన్ని కరీంనగర్‌ జిల్లా సైదాపూర్‌ మండలం దుద్దెనపల్లి దక్కించుకుంది. ఈ కేటగిరీ కింద 10 లక్షల నగదు ప్రోత్సా హకం దక్కనుంది. 24న మధ్యప్రదేశ్‌లోని జబల్‌పూర్‌లో జరిగే కార్యక్రమంలో 2016–17లో ప్రతిభ కనబర్చిన అవార్డు గ్రహీతలకు కేంద్రం పురస్కారాలు అందజేయనుంది. అవార్డు గ్రహీతలను పంచాయతీరాజ్‌ మరియు గ్రామీణాభివృద్ధి మంత్రి జూపల్లి కృష్ణారావు అభినందించారు.


 యూపీ సీఎం యోగి నుంచి పురస్కారాలు అందుకున్న తెలంగాణ ప్రజాప్రతినిధులు
 
 సాక్షి, హైదరాబాద్‌: జాతీయ పంచాయతీ రాజ్‌ దివస్‌ను పురస్కరించుకొని ఉత్తమ పనితీరు కనబరిచిన స్థానిక సంస్థలకు కేంద్రం అవార్డులను అందజేసింది. జాతీయ స్థాయిలో ప్రకటించిన అవార్డుల్లో తెలంగాణకు 8 అవార్డులు దక్కాయి. ఎంపికైన గ్రామ పంచాయతీ, మండల పరిషత్, జిల్లా పరిషత్‌ల ప్రజాప్రతినిధులు సోమవారం లక్నోలో జరిగిన జాతీయ పంచాయతీరాజ్‌ దినోత్సవంలో ఉత్తర ప్రదేశ్‌ సీఎం యోగి ఆదిత్యనాథ్, కేంద్ర పంచాయతీరాజ్‌ మంత్రి తోమర్‌ చేతుల మీదుగా పురస్కారాలను అందుకున్నారు.
 
 మంత్రి జూపల్లి అభినందనలు...
 రాష్ట్రీయ గౌరవ గ్రామసభ పురస్కార్‌ను సిద్దిపేట జిల్లా ఇబ్రహీంపూర్‌ సర్పంచ్‌ లక్ష్మీయాదమ్మ అందుకున్నారు. పంచాయతీ స్వశక్తి కరణ్‌ పురస్కారాలను కరీంనగర్‌ జెడ్పీ చైర్మన్‌ తుల ఉమ, వనపర్తి జిల్లా ఘనపూర్‌ ఎంపీపీ కృష్ణ నాయక్, భూపాలపల్లి జిల్లా తాడ్వాయి ఎంపీపీ శ్రీదేవి, నిజామాబాద్‌ జిల్లా వేల్పూర్‌ సర్పంచ్‌ భాగ్య, సిరిసిల్ల జిల్లా కస్బెకట్కూర్‌ సర్పంచ్‌ మంజుల, గోపాల్‌ రావుపల్లి సర్పంచ్‌ రాంరెడ్డి, మహబూబ్‌ నగర్‌ జిల్లా నిజలాపూర్‌ సర్పంచ్‌ ఇంద్రయ్య అందుకున్నారు. రాష్ట్రం నుంచి పంచాయతీ రాజ్‌ కమిషనర్‌ నీతూప్రసాద్‌ తదితరులు కార్యక్రమానికి హాజరయ్యారు. అవార్డు గ్రహీతలకు పంచాయతీరాజ్‌ శాఖ మంత్రి జూపల్లి కృష్ణారావు అభినందనలు తెలిపారు.