– అల్లు అరవింద్‌
 ‘‘తెలుగు చిత్ర పరిశ్రమలో చిన్న చిత్రాలు మరిన్ని రావాలి. అప్పుడే ఇండస్ట్రీలో పదిమందికి పని దొరుకుతుంది. చిన్న సినిమాలు మంచి కథతో తీస్తున్నారు. శ్రేయాస్‌ శీను, ఫణిలకు సినిమా అంటే ప్యాషన్‌. చిన్న చిత్రాలు తీసి, సక్సెస్‌ సాధిస్తున్నారు’’ అని ప్రముఖ నిర్మాత అల్లు అరవింద్‌ అన్నారు. ‘హ్యాపీడేస్‌’ ఫేం రాహుల్, బాలీవుడ్‌ టీవీ నటి మహిమా మక్వాన్‌ జంటగా వేణును దర్శకునిగా పరిచయం చేస్తూ శ్రేయాస్‌ శీను, ఫణి సంయుక్తంగా నిర్మించిన చిత్రం ‘వెంకటాపురం’. ఈ చిత్రం ట్రైలర్‌ను అల్లు అరవింద్‌ విడుదల చేశారు.
 నిర్మాత మాట్లాడుతూ– ‘‘వైవిధ్యమైన కథను దర్శకుడు తనదైన స్కీన్ర్‌ప్లేతో ఎంటర్‌టైనింగ్‌గా చూపించబోతున్నారు. మా చిత్రం ఫస్ట్‌ లుక్, ట్రైలర్‌ చూసి సినిమా ఇండస్ట్రీ పెద్దలు అభినందిస్తుండటం సంతోషంగా ఉంది. రాహుల్‌ విభిన్నంగా కనిపించబోతున్నాడు. పోస్ట్‌ ప్రొడక్షన్‌ కార్యక్రమాలు జరుగుతున్న ఈ చిత్రం పాటలను త్వరలో విడుదల చేస్తున్నాం’’ అన్నారు. రాహుల్, నిర్మాత ‘జెమిని’ కిరణ్, నటుడు–దర్శకుడు అవసరాల శ్రీనివాస్, దర్శకుడు ‘డార్లింగ్‌’ స్వామి పాల్గొన్నారు. ఈ చిత్రానికి కెమెరా: సాయి ప్రకాష్, సంగీతం: అచ్చు, ఎగ్జిక్యూటివ్‌ నిర్మాత: తాళ్లూరి ఆనంద్, లైన్‌ ప్రొడ్యూసర్‌: కె.అరుణ్‌ మోహన్‌.