డిగ్రీ కళాశాలలో ఘన సన్మానం
 మెహిదీపట్నం (హైదరాబాద్): ప్రముఖ బ్యాడ్మింటన్ క్రీడాకారిణి పీవీ సింధు డిగ్రీ ప్రథమ శ్రేణిలో ఉత్తీర్ణులైంది. ఈ సందర్భంగా ఆమెను మెహిదీపట్నంలోని సెంట్‌ఆన్స్ కళాశాల యాజమాన్యం ఘనంగా సన్మానించింది. అదే కళాశాలలో పీవీ సింధు ఇటీవల బీకాం డిగ్రీ పూర్తి చేసింది. ఫలితాల్లో ప్రథమ శ్రేణిలో ఉత్తీర్ణత సాధించడంతో ఆమెను సన్మానించారు. ఈ సందర్భంగా కళాశాల ప్రిన్సిపాల్ డాక్టర్ అమృత మాట్లాడుతూ.. ఆటతోపాటు చదువుల్లోనూ సింధు ముందుండేదన్నారు. రానున్న రోజుల్లో మరిన్ని అవార్డులు గెలుచుకోవాలని ఆకాంక్షిస్తున్నట్లు ఆమె తెలిపారు.


 ఇంటర్మీడియట్లో తమ కళాశాల విద్యార్థినులు మంచి ఫలితాలు సాధించారని హైదరాబాద్ నగరానికి చెందిన సెయింట్ ఆన్స్ కళాశాల ప్రతినిధులు ఓ ప్రకటనలో తెలిపారు. 1981లో కేవలం అమ్మాయిల కోసం తమ కాలేజి స్థాపించినప్పటి నుంచి వాళ్లకు కేవలం చదువులోనే కాక, అన్ని రంగాల్లో ముందుండేలా, సమాజంలో శక్తిమంతమైన మహిళలుగా ఎదిగేలా శిక్షణ ఇస్తున్నామన్నారు.
 
 ఈసారి కూడా ఇంటర్ రెండో సంవత్సరం ఎంపీసీ, బైపీసీ, ఎంఈసీ, సీఈసీ, ఎంఎల్హెచ్సీ, హెచ్ఈసీ విద్యార్థినులు మంచి ఫలితాలను సాధించారని చెప్పారు. అలాగే, వివిధ విభాగాల్లో అత్యుత్తమ మార్కులు సాధించిన విద్యార్థినుల వివరాలను కూడా తెలిపారు.
 
 ఎంపీసీ: తజ్బియా ఫాతిమా - 973; సిమ్రన్ - 969
 బైపీసీ: ఆకాంక్షా రాజ్ - 974; అనన్యా కుసుమ - 960
 ఎంఈసీ: సంస్కృతీ అగర్వాల్ - 965; రేవతి- 958
 సీఈసీ: యాస్మీన్ నాజ్ - 942; హెచ్.శ్రీవాణి- 939
 ఎంఎల్హెచ్సీ: జువేరియా షెరీన్ - 872
 హెచ్ఈసీ: సైదా సుకైనా హుస్సేన్- 722


 ఎల్బీ స్టేడియం, న్యూస్‌లైన్: ఇంటర్ జూనియర్ కాలేజి మహిళల టెన్నికాయిట్  టైటిల్‌ను నిరుటి విజేత సెయింట్ ఆన్స్  కాలేజి నిలబెట్టుకుంది. సింగిల్స్, డబుల్స్‌లో ఎం.సరిత (సెయింట్ ఆన్స్) సత్తా చాటింది. హైదరాబాద్ జిల్లా జూనియర్ కాలేజి గేమ్స్ సమాఖ్య ఆధ్వర్యంలో నారాయణగూడలోని కేశవ మెమోరియల్ జూనియర్ కాలేజి మైదానంలో జరిగిన ఫైనల్లో సెయింట్ ఆన్స్ 21-18, 21-19 స్కోరుతో కస్తూర్బా గాంధీ కాలేజిపై నెగ్గింది.
  
   సింగిల్స్ విభాగంలో సరిత 21-10, 21-12తో ఎ.హిందూజ (కస్తూర్బా గాంధీ కాలేజి)పై గెలిచింది. డబుల్స్ ఫైనల్లో సరిత, నిఖిత జోడి 21-15తో ఎ.హిందూజ, పి.దీప్తి జోడిపై గెలిచింది. డబుల్స్‌లో మూడో స్థానం సునీత, రచన జోడి (సెయింట్ ఆన్స్ కాలేజి) పొందింది. ముగింపు కార్యక్రమానికి భారత టెన్నికాయిట్ జట్టు కోచ్ ఎన్.సద్గురు ముఖ్య అతిథిగా విచ్చేసి విజేతలకు పతకాలను అందజేశారు. ఈ కార్యక్రమానికి కేశవ మెమోరియల్ జూనియర్ కాలేజి ప్రిన్సిపల్ టి.ఎం.శేఖర్ రావు అధ్యక్షత వహించారు, ఫిజికల్ డెరైక్టర్లు డాక్టర్ ఉమారావు, అన్నామేరీ తదితరులు పాల్గొన్నారు.