నటి కీర్తీసురేశ్‌కు భర్తగా నటించడానికి నటుడు సూర్య నో అన్నారు. అదేంటి వారిద్దరూ కలిసి తానాసేర్న్‌దకూటం చిత్రంలో నటిస్తున్నారుగా అంటారా ‘అది నిజమే. ఇది వేరే చిత్రానికి సంబంధించిన కోలీవుడ్‌ వర్గాల కథనం. దివంగత మహానటి సావిత్రి జీవిత చరిత్ర తమిళం, తెలుగు భాషల్లో  సినిమాగా రూపొందనున్న సంగతి, అందులో సావిత్రి పాత్రలో నటి కీర్తీసురేశ్, మరో పాత్రలో నటి సమంత నటించనున్నారనే ప్రచారం చాలా కాలంగా జరుగుతున్న విషయం తెలిసిందే. కాగా ఇందులో సావిత్రి భర్త జెమినీగణేశన్‌ పాత్ర ప్రధానంగా ఉంటుంది.
 
  ఈ పాత్రలో నటుడు సూర్యను నటింపజేసే ప్రయత్నాలు జరిగాయట. కథ విన్న సూర్య జెమీనీగణేశన్‌ పాత్రకు సంబంధించిన సన్నివేశాలు చాలా తక్కువగా ఉన్నాయనిపించడంతో కొన్ని సూచనలు చేశారని, అందుకు దర్శకుడు సుముఖత వ్యక్తం చేయకపోవడంతో ఆ చిత్రంలో నటించడానికి సూర్య నో చెప్పినట్లు కోలీవుడ్‌ వర్గాల సమాచారం. దీంతో ఆ పాత్ర కోసం మరో నటుడిని ఎంపిక చేసే పనిలో చిత్ర వర్గాలు పడ్డట్టు టాక్‌. కాగా ప్రస్తుతం తానాసేర్న్‌కూటం చిత్రంలో నటిస్తున్న సూర్య తదుపరి సెల్వరాఘవన్‌ దర్శకత్వంలో నటించే అవకాశం ఉందన్న ప్రచారం జరుగుతోంది.