ఉత్సాహంగా కరాటే పోటీలు

ఉత్సాహంగా కరాటే పోటీలు

రామచంద్రపురం: పట్టణంలోని ఆర్‌సీఎం ప్రాంగణంలో 24వ రాష్ట్ర స్థాయి కరాటే పోటీలు సోమవారం ఉత్సాహంగా నిర్వహించారు. కరాటే మాస్టర్‌ బీకే రత్నం ఆధ్వర్యంలో నిర్వహించిన ఈ పోటీలలో రాష్ట్ర నలుమూలల నుంచి వేయిమందికి పైగా బాలబాలికలు పాల్గొన్నారు. ఉదయం 8 గంటలకు పట్టణ ప్రముఖులు నల్లమిల్లి జనార్ధనరెడ్డి(చంటి రెడ్డి), జీవీ రావు, జి.ఆనందబాబు, బాబులు రెడ్డి పోటీలను ప్రారంభించారు. ఈ పోటీలలో డాక్టర్‌ బీఆర్‌ అంబేడ్కర్‌ కోనసీమ జిల్లా జట్టు 420 పాయింట్లతో మొదటి స్థానం కై వసం చేసుకోగా, 200 పాయింట్లతో విశాఖ జిల్లా రెండవ స్థానంలోను, 150 పాయింట్లతో కాకినాడ జిల్లా, 115 పాయింట్లుతో తూర్పుగోదావరి జిల్లాలు తరువాతి స్థానాల్లో నిలిచాయని రత్నం తెలిపారు. బాలుర బ్లాక్‌ బెల్ట్‌ సీనియర్‌ విభాగంలో పి.గణేష్‌ మొదటి స్థానం, బి.రవితేజ రెండవ స్థానం, బాలికల బ్లాక్‌ బెల్ట్‌ విభాగంలో కె. లేఖ నిహారిక మొదటి స్థానం, ఎస్‌కే రిణా రెండవ స్థానం కై వసం చేసుకున్నారని తెలిపారు. గెలుపొందినవారికి ట్రోఫీలు, సర్టిఫికెట్లు అందజేశారు.