వైఎస్సార్‌ సీపీ ‘అనుబంధ’ అధ్యక్షుల నియామకం

వైఎస్సార్‌ సీపీ ‘అనుబంధ’ అధ్యక్షుల నియామకం

పట్నంబజారు(గుంటూరు ఈస్ట్‌): వైఎస్సార్‌ సీపీ అధినేత వై.ఎస్‌.జగన్‌మోహన్‌రెడ్డి ఆదేశాల మేరకు గుంటూరు జిల్లా పార్టీకి సంబంధించి అనుబంధ విభాగాల అధ్యక్షులను నియమిస్తూ బుధవారం కేంద్ర పార్టీ కార్యాలయం నుంచి ఉత్తర్వులు జారీ అయ్యాయి. పార్టీ మహిళా విభాగం గుంటూరు జిల్లా అధ్యక్షురాలిగా తెనాలి నియోజకవర్గానికి చెందిన బూరెల నాంచారమ్మ, లీగల్‌ విభాగం జిల్లా అధ్యక్షుడిగా గుంటూరు పశ్చిమ నియోజకవర్గానికి చెందిన చేబ్రోలు ధన్వంతరి భగవాన్‌ (సీడీ భగవాన్‌), రైతు విభాగం జిల్లా అధ్యక్షుడిగా ప్రత్తిపాడు నియోజకవర్గానికి చెందిన నల్లమోతు రామకృష్ణలను నియమిస్తూ ఆదేశాలు వెలువడ్డాయి.

విజయకీలాద్రిపై

ప్రత్యేక పూజలు

తాడేపల్లిరూరల్‌: సీతానగరం విజయకీలాద్రి దివ్య క్షేత్రంపై త్రిదండి చిన్న శ్రీమన్నారాయణ రామానుజ జీయర్‌ స్వామి మంగళా శాసనాలతో బుధవారం ప్రత్యేక పూజా కార్యక్రమాలు నిర్వహించారు. ఈ సందర్భంగా జీయర్‌ ఎడ్యుకేషనల్‌ ట్రస్ట్‌ నిర్వాహకులు పురాణం వెంకటాచార్యులు మాట్లాడుతూ ఉత్తరాషాఢ నక్షత్రము, అమావాస్యను పురస్కరించుకుని ఉదయం 9 గంటలకు భూ వరాహ స్వామికి పంచామృతాలతో అభిషేకం నిర్వహించామని, 10 గంటలకు సర్వ గ్రహ దోష నివారణ, ఆయురారోగ్యం కోసం సర్వరక్షాకర (సుదర్శన హోమం) నిర్వహించామని భక్తులు అధిక సంఖ్యలో ఈ హోమంలో పాల్గొని తీర్థ ప్రసాదాలు స్వీకరించారని వివరించారు.

యార్డుకు 1,05,694 మిర్చి బస్తాలు

కొరిటెపాడు(గుంటూరు): గుంటూరు మార్కెట్‌ యార్డుకు బుధవారం 1,05,694 మిర్చి బస్తాలు రాగా, గత నిల్వలతో కలిపి ఈ–నామ్‌ విధానం ద్వారా 1,01,695 బస్తాల అమ్మకాలు జరిగాయి. నాన్‌ ఏసీ కామన్‌ రకం 334, నంబర్‌–5, 273, 341, 4884, సూపర్‌–10 రకాల సగటు ధర రూ.7,000 నుంచి రూ.15,200 వరకు పలికింది. నాన్‌ ఏసీ ప్రత్యేక రకం తేజ, బాడిగ, దేవనూరు డీలక్స్‌ రకాల సగటు ధర రూ.7,000 నుంచి రూ.15,000 వరకు ధర లభించింది. ఏసీ కామన్‌ రకం రూ.7,500 నుంచి రూ.13,000 వరకు ధర పలికింది. ఏసీ ప్రత్యేక రకాలకు రూ.7,500 నుంచి రూ.13,500 వరకు ధర లభించింది. తాలు రకం మిర్చికి రూ.4,000 నుంచి రూ.10,500 వరకు ధర పలికింది. అమ్మకాలు ముగిసే సమయానికి యార్డులో ఇంకా 74,693 బస్తాలు నిల్వ ఉన్నట్లు యార్డు ఉన్నతశ్రేణి కార్యదర్శి వినుకొండ ఆంజనేయులు తెలిపారు.

సాగునీటి సమాచారం

తాడేపల్లిరూరల్‌ (దుగ్గిరాల) : కృష్ణా పశ్చిమ ప్రధాన కాలువకు సీతానగరం వద్ద బుధవారం 1,816 క్యూసెక్కులు విడుదల చేశారు. హై లెవల్‌ కాలువకు 106 క్యూసెక్కులు, బ్యాంక్‌ కెనాల్‌కు 163 క్యూసెక్కులు, తూర్పు కెనాల్‌కు 243 క్యూసెక్కులు, పశ్చిమ కెనాల్‌కు 176 క్యూసెక్కులు, నిజాంపట్నం కాలువకు 51 క్యూసెక్కులు, కొమ్మమూరు కాలువకు 514 క్యూసెక్కులు విడుదల చేశారు.

1/1

వైఎస్సార్‌ సీపీ ‘అనుబంధ’ అధ్యక్షుల నియామకం