సెగ్రిగేషన్‌ షెడ్లు నిరుపయోగం

సెగ్రిగేషన్‌ షెడ్లు నిరుపయోగం

కాటారం: జిల్లావ్యాప్తంగా సెగ్రిగేషన్‌ షెడ్లు నిరుపయోగంగా మారిపోయాయి. పూర్తిస్థాయిలో తడి, పొడి చెత్త సేకరణ జరగకపోవడంతో సేంద్రియ ఎరువుల తయారీ ప్రశ్నార్థకంగా మారింది. లక్షల రూపాయలు వెచ్చించి నిర్మించిన సెగ్రిగేషన్‌ షెడ్ల నిర్వహణను అధికారులను పట్టించుకోవడం లేదని విమర్శలు వస్తున్నాయి.

పంచాయతీల్లో తడి, పొడి చెత్తను సేకరించడం, సేంద్రియ ఎరువును తయారు చేసేలా గత ప్రభుత్వం సెగ్రిగేషన్‌ షెడ్ల నిర్మాణం చేపట్టింది. జిల్లాలోని అన్ని పంచాయతీల్లో వీటిని ఏర్పాటు చేశారు. ప్రభుత్వ ఆదేశాలతో అప్పట్లో సెగ్రిగేషన్‌ షెడ్ల నిర్మాణాల లక్ష్యాన్ని అధికారులు చేరినప్పటికీ ప్రస్తుతం వాటి నిర్వహణలో చిత్తశుద్ధి కరువైంది. జిల్లాలోని సెగ్రిగేషన్‌ షెడ్లలో ఎరువుల తయారీ ప్రశ్నార్థకంగా మారింది. చెత్త సేకరణ అంతంతమాత్రంగా కొనసాగుతున్నప్పటికీ నిర్వహణ మాత్రం అధ్వానంగా మారింది. రూ.లక్షలతో షెడ్లు నిర్మించి, ఎరువుల తయారీకి అవసరమయ్యే సామగ్రిని సైతం కొనుగోలు చేశారు. కానీ చెత్తను మాత్రం కేంద్రాలకు తరలించకుండా డంపింగ్‌యార్డు, రోడ్డు పక్కన పడేసి చేతులు దులుపుకుంటున్నారు.

నిర్వహణాలోపం లోపం..

గ్రామపంచాయతీల్లో పారిశుద్ధ్య నిర్వహణలో భాగంగా గత ప్రభుత్వ హయాంలో గ్రామపంచాయతీకి ఒకటి చొప్పున ట్రాక్టర్‌ కొనుగోలు చేశారు. నిత్యం గ్రామాల్లో ఇంటింటా తడి, పొడి చెత్తను సేకరించి ట్రాక్టర్ల ద్వారా దూరంగా ఉన్న డంపింగ్‌ యార్డులకు చెత్తను తరలించాలి. సెగ్రిగేషన్‌ షెడ్‌లో చెత్తను కుప్పగా పోసి తడి, పొడి చెత్తను వేరు చేయాల్సి ఉంటుంది. పొడి చెత్తలో లభించే ప్లాస్టిక్‌, గాజు, ఇనుము, ఇతరత్రా సామగ్రిని రీసైక్లింగ్‌ చేసి విక్రయించి వచ్చిన ఆదాయాన్ని గ్రామపంచాయతీ ఖాతాలో జమ చేయాలి. అంతేకాకుండా వ్యర్థాలను వర్మీ కంపోస్టుగా తయారు చేసి ఆదాయం పొందే అవకాశాలు ఉన్నాయి. కానీ సంబంధిత అధికారుల పర్యవేక్షణ కొరవడటంతో నిర్వహణ సక్రమంగా సాగడం లేదు. ఒక్క కేంద్రానికి రూ.2లక్షలకు పైగా ఖర్చుచేసినా ఫలితం లేకుండా పోయింది. చాలాచోట్ల చెత్తను డంపింగ్‌ యార్డులో పోసి నిప్పు పెడుతున్నారు.

అంతంత మాత్రంగానే..

గత ఫిబ్రవరి నుంచి గ్రామాల్లో సర్పంచ్‌ల పదవీ కాలం ముగిసిపోవడంతో ప్రత్యేకాధికారుల పాలన కొనసాగుతోంది. దీంతో గ్రామాల్లో పారిశుద్ధ్య నిర్వహణ మందకొడిగా సాగుతోంది. జిల్లాలోని పలు గ్రామాల్లో చెత్త సేకరణ నామమాత్రంగా కొనసాగుతుండగా మరికొన్ని గ్రామాల్లో చెత్త సేకరణ జరగడం లేదు. ఇళ్లలో ఏర్పడిన చెత్తను ప్రజలు తమ ఇళ్ల సమీపంలోని ఖాళీ ప్రదేశంలో లేక పెంటకుప్పలపై పారబోసుకుంటున్నారు. దీంతో పరిసర ప్రాంతాల్లో దుర్గంధం వెదజల్లుతుంది. ఇప్పటికై నా అధికారులు సెగ్రిగేషన్‌ షెడ్లను వినియోగంలోకి తీసుకొచ్చి కంపోస్టు ఎరువు తయారీ కోసం చర్యలు తీసుకోవాల్సిన అవసరం ఉందని పలువురు కోరుతున్నారు.

చెత్త సేకరణపై ప్రత్యేక దృష్టి

గ్రామాల్లో చెత్త సేకరణ జరిగేలా ప్రత్యేక దృష్టి సారిస్తున్నాం. ఆ దిశగా ఎంపీడీఓ, ఎంపీఓ, పంచాయతీ కార్యదర్శులకు ఎప్పటికప్పుడు ఆదేశాలు ఇస్తున్నాం. సెగ్రిగేషన్‌ షెడ్ల నిర్వహణ మెరుగుపరుస్తాం. గ్రామాల్లో తడి, పొడి చెత్త సేకరించి పంచాయతీలకు ఆదాయ వనరులు చేకూరేలా చర్యలు తీసుకుంటాం.

– వీరభద్రయ్య, డీఎల్‌పీఓ

జిల్లా వివరాలు..

ప్రశ్నార్థకంగా సేంద్రియ ఎరువుల తయారీ

అంతంత మాత్రంగానే తడి, పొడిచెత్త సేకరణ

రూ.లక్షలు వెచ్చించినా నిర్వహణ అధ్వానం

అవగాహన అవసరం..

ఇంట్లో వినియోగించిన చెత్తను తడి, పొడి డబ్బాల్లో నింపడంతో పాటు చెత్త ద్వారా కంపోస్టు ఎరువు తయారవుతుందనే అవగాహన గ్రామీణ ప్రజల్లో పూర్తిస్థాయిలో లేదు. తడి, పొడి చెత్త సేకరణ, వినియోగంపై గ్రామీణ స్థాయిలో అధికారులు, సిబ్బంది ప్రజలకు అవగాహన కల్పించే కార్యక్రమాలు చేపట్టాల్సి ఉన్నప్పటికీ అలాంటి దాఖలాలు లేవు. దీంతో ప్రజలు తడి, పొడి చెత్తను ఒకే డబ్బాలో నింపి పెట్టి చెత్త సేకరణ కోసం వచ్చే ట్రాక్టర్లకు ఇచ్చేస్తున్నారు. ట్రాక్టర్ల ద్వారా సేకరించిన చెత్తను పంచాయతీ సిబ్బంది సెగ్రిగేషన్‌ షెడ్‌ల వద్ద పారబోసి వెళ్తున్నారు. చెత్తను విభజించడానికి సరిపడా సిబ్బంది లేకపోవడంతో ఎలా పోసిన చెత్త అలానే ఉండి చివరకు మట్టిలో కలిసిపోతుంది.

1/1

సెగ్రిగేషన్‌ షెడ్లు నిరుపయోగం