కర్ణాటక నుంచి క్యారమిల్‌.. ఏపీ నుంచి స్పిరిట్‌

నకిలీ మద్యం తయారీకి సంబంధించి ఆ ఇద్దరు మరికొందరి సాయంతో క్యారమిల్‌ను కర్ణాటకలోని రాయచూరు నుంచి.. స్పిరిట్‌ను ఆంధ్రప్రదేశ్‌లోని పలు జిల్లాల నుంచి సేకరించారు. చిన్న ఉరుకుందు గౌడ్‌ నీటిలో క్యారమిల్‌, స్పిరిట్‌ కలిపి నకిలీ మద్యం తయారు చేశాడు. ఇది వరకే సేకరించుకున్న ఖాళీ మద్యం సీసాల్లో ఈ శాంపిళ్లను పోసి కొందరికి ఇచ్చాడు. పలు బెల్ట్‌షాపులకు సరఫరా చేశాడు. అంతా సజావుగా సాగుతుండడంతో ఆ ఇద్దరు కలిసి రానున్న స్థానిక ఎన్నికలే లక్ష్యంగా పోటీలో నిలవాలని భావిస్తున్న వారిని టార్గెట్‌గా పెట్టుకుని పావులు కదిపినట్లు సమాచారం. ఈ మేరకు పలు రహస్య స్థలాల్లో ఇప్పటికే నకిలీ మద్యం సీసాలను దాచినట్లు తెలుస్తోంది. ఈ క్రమంలో ఈ నెల 13న బేరమాడేందుకని స్కార్పియో వాహనంలో కొన్ని శాంపిళ్లను పెట్టుకుని వస్తుంటే అయిజ పట్టణంలో ఎకై ్సజ్‌ పోలీసులు పట్టుకున్నారు. అనంతరం రవినాయుడు, చిన్న ఉరుకుందుగౌడ్‌తోపాటు మరో ఇద్దరిపై కేసు నమోదు చేశారు.