ప్రాణం తీసిన మద్యం బాటిల్‌

ప్రాణం తీసిన మద్యం బాటిల్‌

మెళియాపుట్టి: మద్యం బాటిల్‌ యువకుని ప్రాణం తీసిన సంఘటన శుక్రవారం రాత్రి మండలంలోని సవర మురికింటి భద్ర గ్రామంలో చోటుచేసుకుంది. కుటుంబ సభ్యులు, పోలీసులు తెలిపిన వివరాల మేరకు.. మండలంలోని మర్రిపాడు కె.పంచాయతీ పరిధిలోని సవర మురికింటి భద్ర గ్రామానికి చెందిన సవర సురేష్‌ (28) శుక్రవారం సాయంత్రం మద్యం సేవించడానికి భరణికోట గ్రామానికి వెళ్లాడు. తిరుగు ప్రయాణంలో ఒక విస్కీ బాటిల్‌ను ప్యాంట్‌లో పెట్టుకుని ద్విచక్రవాహనంపై వస్తుండగా.. బంజీరు గ్రామ సమీపంలో అదుపు తప్పి పడిపోయాడు. ప్యాంట్‌లో ఉన్న మద్యం సీసా పొట్టలో గుచ్చుకుపోవడంతో తీవ్ర రక్తస్రావమైంది. రాత్రి సమయంలో అటుగా వెళ్తున్న ఓ వ్యాపారి గుర్తించి యువకుడి ఫొటో తీసి గ్రామస్తులకు పంపించడంతో కుటుంబ సభ్యులు సంఘటన స్థలానికి చేరుకుని 108 కి సమాచారం అందించారు. సిబ్బంది చూసి మృతి చెందినట్లు ధ్రువీకరించడంతో యువకుని తల్లిదండ్రులు స్థానిక పోలీస్‌స్టేషన్‌లో ఫిర్యాదుచేశారు. శనివారం కేసు నమోదు చేసి పాతపట్నం ప్రభుత్వ ఆస్పత్రికి మృతదేహాన్ని తరలించారు. మృతుడికి వివాహం కాలేదు.