కేరళలో రిక్రూట్‌మెంట్‌ ర్యాలీ

కేరళలో రిక్రూట్‌మెంట్‌ ర్యాలీ

గుంటూరు ఎడ్యుకేషన్‌: భారత వైమానిక రంగంలో ఎయిర్‌ మెన్‌ (మెడికల్‌ అసిస్టెంట్‌) ఉద్యోగాలకు కేరళ కొచ్చిలోని 14 ఎయిర్‌మెన్‌ ఎంపిక కేంద్రంలో రిక్రూట్‌మెంట్‌ ర్యాలీ జరగనున్నట్లు యువజన సర్వీసుల శాఖ కార్యాలయం మంగళవారం ఓ ప్రకటనలో తెలిపింది. ఇంటర్‌ బయాలజీ అర్హత కలిగిన అభ్యర్థులు ఫిబ్రవరి 1న, డిప్లొమా, బీఎస్సీ ఇన్‌ ఫార్మసీ అభ్యర్థులు ఫిబ్రవరి 4న ఉదయం 6 గంటలకు ఎంపిక కేంద్రంలో హాజరు కావాలని సూచించారు. ఇతర వివరాలకు ఎయిర్‌ఫోర్స్‌ వెబ్‌సైట్‌ ఎయిర్‌మెన్‌ సెలక్షన్‌. సీడాక్‌.ఇన్‌ను సందర్శించాలని సూచించింది.

మాస్టర్స్‌ అథ్లెటిక్స్‌ పోటీలు

లక్ష్మీపురం(గుంటూరు వెస్ట్‌): ఈ నెల 31 నుంచి ఫ్రిబవరి 2వ తేదీ వరకు కేరళలోని త్రిసూరులో జరిగే జాతీయ మాస్టర్స్‌ అథ్లెటిక్స్‌ పోటీలకు ఆంధ్రప్రదేశ్‌ నుంచి 105 మంది పాల్గొంటున్నారని ఏపీ మాస్టర్స్‌ అథ్లెటిక్స్‌ అసోసియేషన్‌ అధ్యక్షులు షేక్‌ లాల్‌ వజీర్‌ అన్నారు. మంగళవారం అసోసియేషన్‌ కార్యాలయంలో విలేకరులతో ఆయన మాట్లాడారు. ఆర్గనైజర్‌ మాల కొండయ్య, లక్ష్మి, కిషోరి, జయమ్మ, ఉదయ్‌ హస్పిటల్‌ రామకృష్ణారెడ్డి తదితరులు పాల్గొన్నారు.

ఏబీవీపీ రాష్ట్ర సంయుక్త కార్యదర్శిగా పవన్‌ కుమార్‌

ఏఎన్‌యూ(గుంటూరు): విశాఖపట్నంలో ఈ నెల 24, 25, 26 తేదీల్లో జరిగిన ఏబీవీపీ 43వ రాష్ట్ర మహాసభల్లో గుంటూరు జిల్లా కన్వీనర్‌గా బాధ్యతలు నిర్వహిస్తున్న మల్లవరపు పవన్‌ని రాష్ట్ర సంయుక్త కార్యదర్శిగా నియమించారు. ఈయన ఆచార్య నాగార్జున యూనివర్సిటీలో విద్యనభ్యసిస్తున్నారు. గతంలో ఈయన యూనివర్సిటీ సోషల్‌ మీడియా కన్వీనర్‌గా, యూనివర్సిటీ ఇన్‌చార్జిగా, రాష్ట్ర కార్య సమితి సభ్యుడిగా , గుంటూరు జిల్లా కన్వీనర్‌గా పనిచేశారు.

వరల్డ్‌ తైక్వాండో రిఫరీగా వెంకటేశ్వరరావు

నిజాంపట్నం: ఈనెల 17 నుంచి 26వ తేదీ వరకు వరల్డ్‌ తైక్వాండో వారు ఇండియా తైక్వాండో ఆధ్వర్యంలో మహారాష్ట్ర పూణేలో నిర్వహించిన ఇంటర్నేషనల్‌ రిఫరీ కోర్స్‌లో ఆంధ్రప్రదేశ్‌ బాపట్ల జిల్లా రేపల్లెకు చెందిన రాష్ట్ర తైక్వాండో ప్రధాన కార్యదర్శి వెంకటేశ్వరరావు పాల్గొన్నారు. అంతర్జాతీయ రెఫరీగా అర్హత సాధించారు. వెంకటేశ్వరరావు మాట్లాడుతూ అంతర్జాతీయ తైక్వాండో క్రీడాకారులను తయారు చేయటానికి అవకాశం లభించటం అదృష్టంగా పేర్కొన్నారు. నేటి వరకు వేలాది మంది క్రీడాకారులకు శిక్షణ ఇచ్చామని, తన వద్ద శిక్షణ పొందిన వారు జాతీయ స్థాయిలో పతకాలు సాధించారన్నారు.

యార్డుకు

1,20,808 మిర్చి బస్తాలు

కొరిటెపాడు(గుంటూరు): గుంటూరు మార్కెట్‌ యార్డుకు ఈ సీజన్‌లో అత్యధికంగా మంగళవారం 1,20,808 మిర్చి బస్తాలు రాగా, గత నిల్వలతో కలిపి ఈ–నామ్‌ విధానం ద్వారా 1,15,612 బస్తాలు అమ్మకాలు జరిగాయి. నాన్‌ ఏసీ కామన్‌ రకం 334, నంబర్‌–5, 273, 341, 4884, సూపర్‌–10 రకాల సగటు ధర రూ.7,500 నుంచి రూ.15,000 వరకు పలికింది. నాన్‌ ఏసీ ప్రత్యేక రకం తేజ, బాడిగ, దేవనూరు డీలక్స్‌ రకాల సగటు ధర రూ.7,000 నుంచి రూ.15,000 వరకు ధర లభించింది. ఏసీ కామన్‌ రకం రూ.8,000 నుంచి రూ.13,500 వరకు ధర పలికింది. ఏసీ ప్రత్యేక రకాలకు రూ.9,000 నుంచి రూ.14,000 వరకు ధర లభించింది. తాలు రకం మిర్చికి రూ.4,000 నుంచి రూ.11,500 వరకు ధర పలికింది.

1/1

కేరళలో రిక్రూట్‌మెంట్‌ ర్యాలీ