దాడి చేశాడని ఫిర్యాదు

దాడి చేశాడని ఫిర్యాదు

శ్రీకాకుళం క్రైమ్‌ : మద్యం మత్తులో ఓ విలేకరి తనపై దాడి చేశాడని శ్రీకాకుళం దమ్మలవీధికి చెందిన ఓ కారుడ్రైవర్‌ ఒకటో పట్టణ పోలీసులకు ఫిర్యాదు చేశాడని ఎస్‌ఐ ఎం.హరికృష్ణ తెలిపారు. ఎస్‌ఐ తెలిపిన వివరాల మేరకు.. దమ్మలవీధికి చెందిన సూరాడ సత్యం (46) కారుడ్రైవర్‌గా పనిచేస్తున్నారు. ఆయన ఆదివారం రాత్రి 8:45 గంటల ప్రాంతంలో విధులు ముగించుకుని ద్విచక్రవాహనంపై ఇంటికి బయల్దేరారు. గోల్కొండ రేవు రోడ్డు తాలాడ రవి ఇంటి వద్దకు వచ్చే సరికి అక్కడ రోడ్డుకు అడ్డంగా పవన్‌ (విలేకరి) అనే వ్యక్తి కారు ఉంది. రోడ్డు మధ్యలో కారు ఎందుకు పెట్టారని ప్రశ్నించడంతో ఇద్దరి మధ్య వాగ్వాదం జరిగింది. ఈ నేపథ్యంలో పవన్‌ తనపై దాడి చేశాడని సూరాడ సత్యం పోలీసులకు ఫిర్యాదు చేశారు. పవన్‌ కూడా తనపై దాడి జరిగిందని సత్యంపై ఫిర్యాదు చేశారు. ఈ విషయమై మాట్లాడేందుకు ఆదివారం రాత్రి ఎమ్మెల్యే గొండు శంకర్‌ స్టేషన్‌కు రావడం చర్చనీయాంశమైంది. దాడి దృశ్యాలు సీసీ కెమెరాల్లో నిక్షిప్తమయ్యాయి. ఈ విషయం ఎస్పీ దృష్టికి వెళ్లడంతో డీఎస్పీ వివేకానందను మొత్తం అంశాన్ని పర్యవేక్షించి నివేదిక ఇవ్వమని సూచించారు. పవన్‌పై కేసు నమోదు చేసినట్లు ఎస్‌ఐ ఎం.హరికృష్ణ తెలిపారు.