బాల్య వివాహాలు అరికట్టాలి

బాల్య వివాహాలు అరికట్టాలి

వేలూరు: ప్రపంచ బాలల దినోత్సవాన్ని పురష్కరించుకొని శిశు సంక్షేమ శాఖ ఆధ్వర్యంలో వేలూరులో అవగాహన ర్యాలీ నిర్వహించారు. ర్యాలీని కలెక్టర్‌ సుబ్బలక్ష్మి ప్రారంభించి విద్యార్థులతో ప్రతిజ్ఞ చేయించారు. అనంతరం బాల్య వివాహాలు, మహిళలపై జరుగుతున్న లైంగికదాడులను అరికట్టాలని ర్యాలీ నిర్వహించి అవగాహన కరపత్రాలను ప్రజలకు అందజేశారు. కలెక్టర్‌ మాట్లాడుతూ చిన్న వయస్సులో సెల్‌ఫోన్‌లకు బానిస కాకుండా విద్యకే అధిక ప్రాధాన్యత ఇవ్వాలన్నారు. జిల్లాలో బాలకార్మికులు లేకుండా బాలలను బడిలో చేర్పించేందుకు అధికారులు చర్యలు తీసుకోవాలన్నారు. బాలికలపై ఎక్కడైనా లైంగిక వేధింపులు జరిగితే వెంటనే 1098, 181 అనే నంబర్‌కు ఫోన్‌ చేసి సమాచారం ఇవ్వాలని తెలిపారు. శిశుసంక్షేమశాఖ జిల్లా అధికారి సంజీత్‌, సాంఘిక సంక్షేమశాఖ అధికారి ఉమ పాల్గొన్నారు.