కమల్‌ ప్రశంసలు

కమల్‌ ప్రశంసలు

జోజూజార్జ్‌కు

తమిళసినిమా: ఏ రంగంలోనైనా ప్రతిభ మాత్రమే ప్రామాణికం. ఇందుకు భాషా భేదం లేదు. సినిమా రంగం ఇందుకు అతీతం కాదు. ఇందుకు చాలా ఉదాహరణలను చెప్పవచ్చు. తాజాగా మలయాళ నటుడు జోజూ జార్జ్‌నే తీసుకుంటే ఈయన అక్కడ ప్రముఖ నటుడిగా రాణిస్తున్నారు. తాజాగా కోలీవుడ్‌లోనూ నటుడిగా ఎంట్రీ ఇచ్చారు. నటుడు కమలహాసన్‌ కథానాయకుడిగా మణిత్రం దర్శకత్వంలో తెరకెక్కుతున్న థగ్‌లైఫ్‌ చిత్రంలో జోజూజార్జ్‌ ముఖ్య పాత్రను పోషించారు.అదే విధంగా సూర్య హీరోగా కార్తీక్‌ సుబ్బరాజ్‌ దర్శకత్వం వహిస్తున్న చిత్రంలోనూ ఆయన కీలక పాత్రను పోషించారు. ఇకపోతే నటుడు జోజూ జార్జ్‌ దర్శకుడిగా అవతారమెత్తి పణి అనే మలయాళ చిత్రాన్ని తెరకెక్కించారు. ఈ చిత్రం మలయాళంలో గత నెలలో విడుదలై విజయవంతంగా ప్రదర్శింపబడుతోంది. నటుడు జోజూ జార్జ్‌,నటి అభినయ తదితరులు ప్రధాన పాత్రలు పోషించిన ఈ చిత్రానికి శ్యామ్‌ సీఎస్‌ సంగీతాన్ని అందించారు.కాగా ఈ చిత్రాన్ని తమిళంలోనూ శుక్రవారం విడుదల చేశారు. అంతకు ముందు ఈ చిత్రాన్ని నటుడు కమలహాసన్‌ తదితర సినీ ప్రముఖల కోసం చిత్రాన్ని ప్రత్యేకంగా ప్రదర్శించారు. చిత్రం చూసిన కమలహాసన్‌ తనను, చిత్రాన్ని ఎంతగానో అబినందించినట్లు జోజూ జార్జ్‌ ఆనందాన్ని వ్యక్తం చేశారు. ఈ సందర్భంగా ఆయన పణి తనకు దర్శకుడిగా తొలి చిత్రం అని, ఏడాదిన్నర కాలం పాటు ఈ చిత్రం కోసం యూనిట్‌ సభ్యులందరూ ఎంతగానో శ్రమించారని పేర్కొన్నారు. చిత్రాన్ని చూసిన నటుడు కమలహాసన్‌, సూర్య, బాలీవుడ్‌ నటు డు అనురాగ్‌ కశ్యప్‌, సంగీతదర్శకుడు సంతోష్‌ నారాయణన్‌, దర్శకుడు కార్తీక్‌ సుబ్బరాజ్‌ తదితర సినీ ప్రముఖులు ప్రశంసించడం సంతోషంగా ఉందన్నారు. మరో విషయం ఏమిటంటే ఈ చిత్రంలోని ఒక పాటకు సంగీత దర్శకుడు సంతోష్‌ నారాయణన్‌ సంగీతాన్ని అందించారని చెప్పారు. చిత్రం మలయాళంలో విజయవంతంగా ప్రదర్శింపబడుతోందని, తమిళ ప్రేక్షకులకూ నచ్చుతుందనే నమ్మకం ఉందని జోజూజార్జ్‌ పేర్కొన్నారు.