టంగుటూరి సేవలు ఆదర్శనీయం

టంగుటూరి సేవలు ఆదర్శనీయం

జేసీ రాహుల్‌కుమార్‌రెడ్డి

భీమవరం(ప్రకాశం చౌక్‌): స్వాతంత్ర సమరయోధుడు, ఆంధ్ర రాష్ట్ర తొలి ముఖ్యమంత్రి టంగుటూరి ప్రకాశం పంతులు సేవలు ఆదర్శనీయమని జాయింట్‌ కలెక్టర్‌ టి.రాహుల్‌కుమార్‌ రెడ్డి అన్నారు. శుక్ర వారం కలెక్టరేట్‌లో జిల్లా వెనుకబడిన తరగతుల సంక్షేమ శాఖ ఆధ్వర్యంలో ప్రకాశం పంతులు జయంతి వేడుకలను నిర్వహించారు. టంగుటూరి చిత్రపటానికి జేసీ పూలమాలలు వేసి నివాళులర్పించారు. అనంతరం ఆయన మాట్లాడుతూ శ్రమించే గుణం, నేర్చుకోవాలని తపన, పట్టుదలతో ఉన్నత శిఖరాలకు చేరుకోవచ్చనే దానికి టంగుటూరి జీవితం నిదర్శమన్నారు. విద్యార్థులు, యువత ఆయన్ను ఆదర్శంగా తీసుకోవాలని అన్నారు. బీసీ, ఎస్సీ, ఎస్టీ సంక్షేమ శాఖల ఆధ్వర్యంలో నిర్వహిస్తున్న పాఠశాలల్లో విద్యార్థులు ప్రముఖుల జీవిత చరిత్రలు చదివేలా శ్రద్ధ తీసుకోవాలన్నారు. నెల పాటు ఈ కార్యక్రమాన్ని కొనసాగించి వ్యాసరచన పోటీలు నిర్వహించాలని ఆదేశించారు. డీఆర్వో జె.ఉదయ భాస్కరరావు, జిల్లా వెనుక బడిన తరగతుల సంక్షేమ అధికారి జి.గణపతిరావు, బీసీ సంక్షేమ శాఖ శాఖ ఏబీసీడబ్ల్యూఓలు, వసతి గృహాల వార్డెన్లు పాల్గొన్నారు.