రైనా అరుదైన ఫీట్.. ధోనీ చెత్త రికార్డు!

రైనా అరుదైన ఫీట్.. ధోనీ చెత్త రికార్డు!

బెంగళూరు: టీమిండియా వెటరన్ బ్యాట్స్‌మన్లు సురేష్ రైనా (45 బంతుల్లో 63: 2 ఫోర్లు, 5 సిక్సర్లు), మాజీ కెప్టెన్ ఎంఎస్ ధోనీ(36 బంతుల్లో 56: 5పోర్లు, 2 సిక్సర్లు) హాఫ్ సెంచరీలతో రాణించడంతో టీమిండియా భారీ స్కోరు సాధించింది. ఇంగ్లండ్‌తో జరుగుతున్న చివరిదైన మూడో ట్వంటీ20 మ్యాచ్‌లో నిర్ణీత ఓవర్లలో భారత్ 6 వికెట్ల నష్టపోయి 202 పరుగులు చేసింది.లక్ష్యఛేదనకు దిగిన ఇంగ్లండ్.. టీమిండియా లెగ్ స్పిన్నర్ చహల్ (6/25) దెబ్బకు 127 పరుగులకే కుప్పకూలింది.  అయితే చిన్నస్వామి మైదానంలో జరుగుతున్న ఈ మ్యాచ్‌లో సురేష్ రైనా ఓ అరుదైన రికార్డు తన ఖాతాలో వేసుకోగా, టీ20 ఫార్మాట్‌లో తొలి హాఫ్ సెంచరీతో మాజీ కెప్టెన్ ఎంఎస్ ధోనీపై ఓ చెత్త రికార్డు నమోదైంది.

టీ20ల్లో పవర్ ప్లేలో మూడు సిక్సర్లు కొట్టిన రైనా అత్యధిక సిక్సర్లు కొట్టిన ఆటగాళ్లలో రోహిత్ శర్మతో కలసి రెండో స్థానంలో నిలిచాడు. గతంలో వీరేంద్ర సెహ్వాగ్ 2009లో న్యూజిలాండ్ పై పవర్ ప్లేలో 4 సిక్సర్లు బాదేశాడు. 2016లో వెస్టిండీస్‌పై రోహిత్ 3 సిక్సర్లు కొట్టాడు. తాజాగా రైనా ఈ ఫీట్ నమోదుచేశాడు.

టీ20ల్లో తొలి హాఫ్ సెంచరీ చేశాడు ధోనీ. అయితే ఈ ఫార్మాట్లో తొలి హాఫ్ సెంచరీకి అత్యధిక ఇన్నింగ్స్ లు (76 మ్యాచ్ లు 66 ఇన్నింగ్స్ లు) తీసుకున్న ఆటగాడిగా ధోనీ చెత్త రికార్డును తన ఖాతాలో వేసుకున్నాడు. గతంలో ఈ చెత్త రికార్డు ఐర్లాండ్‌ ప్లేయర్ గారీ విల్సన్ (38 ఇన్నింగ్స్‌లు) పేరిట ఉండేది. ఈ మ్యాచ్‌లో టాప్‌ ఆర్డర్‌లో వచ్చిన ధోనీ కీలక ఇన్నింగ్స్ ఆడాడు.