న్యూఢిల్లీ: అమెరికాకు చెందిన హార్లే డేవిడ్సన్ కంపెనీ స్ట్రీట్ గ్లైడ్ మోడల్‌లో 2014 ఎడిషన్‌ను గురువారం మార్కెట్లోకి విడుదల చేసింది. ఈ బైక్ ధరను రూ.29 లక్షలుగా నిర్ణయించామని హర్లే డేవిడ్సన్ ఇండియా ఎండీ అనూప్ ప్రకాష్ చెప్పారు. వినియోగదారుల ఫీడ్‌బ్యాక్ ఆధారంగా హర్లే డేవిడ్సన్ బైక్‌లను అప్‌గ్రేడ్ చేసే ప్రాజెక్ట్ రష్‌మోర్‌లో భాగంగా ఈ బైక్‌ను తెచ్చామని వివరించారు.  1690 సీసీ, వి-ట్విన్ ఎయిర్-కూల్డ్, ట్విన్ కాంషాఫ్ట్ ఇంజిన్,  డ్యుయల్ హాలోజెన్ బల్బ్ ఉన్న కొత్త హెడ్‌లైట్,  5 స్పోక్ అలాయ్ వీల్స్, 6 గేర్లు,   ఏబీఎస్ వంటి ప్రత్యేకతలున్నాయి. ఎల్‌సీడీ స్క్రీన్,  రెండు స్పీకర్స్, బ్లూ టూత్ కనెక్టివిటీ, రేడియో, వాయిస్ రికగ్నిషన్, ఎంపీత్రీ డివైస్‌లను సపోర్ట్ చేసే యూఎస్‌బీ ఎడాప్టర్  ఉన్న ఇన్ఫోటైన్‌మెంట్ సిస్టమ్‌ను  డాష్‌బోర్డ్‌లో అమర్చారు.