ముంబై: నిధుల సమీకరణ మార్గాలను విస్తృతం చేసుకోవాలని, బ్యాంక్‌లపై ఆధారపడడాన్ని పరిమితం చేసుకోవాలని బ్యాంకింగేతర ఆర్థిక సంస్థలకు (ఎన్‌బీఎఫ్‌సీలకు) ఆర్‌బీఐ సూచించింది. బలమైన కార్పొరేట్‌ గవర్నెన్స్‌ విధానాల ద్వారా బ్యాలన్స్‌ షీట్లు పటిష్టం చేసుకుని, మోసాలు, డేటా చోరీల నుంచి రక్షణ కలి్పంచుకోవాలని కోరింది. దేశ బ్యాంకింగ్‌ రంగం, ఎన్‌బీఎఫ్‌సీలు బలంగా ఉన్నాయంటూ.. అధిక నగదు నిష్పత్తి, మెరుగుపడిన ఆస్తుల నాణ్యత, లాభాల్లో బలమైన వృద్ధిని ప్రస్తావించింది. ఈ మేరకు బ్యాంకింగ్‌ రంగంపై ఆర్‌బీఐ ఓ నివేదికను విడుదల చేసింది. ‘‘బ్యాంక్‌లు, ఎన్‌బీఎఫ్‌సీల మధ్య పరస్పర అనుసంధానత పెరిగిన నేపథ్యంలో.. ఎన్‌బీఎఫ్‌సీలు తమ నిధుల సమీకరణ మార్గాలను విస్తృతం చేసుకోవాలి. బ్యాంక్‌లపై అధికంగా ఆధారపడడాన్ని తగ్గించుకోవాలి. కస్టమర్లకు సేవల విషయంలో మరింత కృషి చేయాలి’’అని ఆర్‌బీఐ కోరింది.   సైబర్‌ దాడుల రిస్క్‌ నూతన టెక్నాలజీల అమలు నేపథ్యంలో సైబర్‌ దాడులు, డేటా చోరీ, నిర్వహణ వైఫల్యాలు పెరిగినట్టు పేర్కొంది. మెరుగైన పాలన, రిస్క్‌ నిర్వహణ విధానాల ద్వారా బ్యాలన్స్‌ షీట్లను పటిష్టం చేసుకుని, పెరుగుతున్న దేశ ఆర్థిక వ్యవస్థ ఆకాంక్షలను చేరుకునే విధంగా ఉండాలని కోరింది. ‘‘ఈ విధమైన సాంకేతిక, సైబర్‌ భద్రతా రిస్క్‌లను గుర్తించి, వాటి ముప్పును తగ్గించేందుకు చర్యలు తీసుకోవాలి. బలమైన గవర్నెన్స్, రిస్క్‌ నిర్వహణ విధానాల ద్వారా బ్యాంకింగ్‌ వ్యవస్థను పటిష్టం చేసుకోవాలి’’అని సూచించింది.

మెరుగైన రాబడుల కోసం ఈక్విటీల వైపు అడుగులు వేసే రిటైల్‌ ఇన్వెస్టర్లు పెరుగుతున్నారు. అన్ని సాధనాల్లోకెల్లా ఈక్విటీలు దీర్ఘకాలంలో స్థిరమైన, మెరుగైన రాబడులు ఇవ్వడమే ఈ ఆకర్షణకు కారణం. ఈక్విటీల్లో పెట్టుబడులు ఎంత సులభమో, ఆచరణలో అంత కష్టం. నిపుణులైన ఫండ్‌ మేనేజర్లను కాదని, నేరుగా స్టాక్స్‌లో ఇన్వెస్ట్‌ చేసేందుకు ఆసక్తి చూపించే వారు, ప్రాథమిక విషయాల గురించి, రిస్క్‌ గురించి తప్పకుండా తెలుసుకుని తీరాలి. లేదంటే అసలు ఉద్దేశమే నెరవేరకుండా పోతుంది. తమ పెట్టుబడులకు తామే ఫండ్‌ మేనేజర్‌ పాత్ర పోషిస్తామనుకునే వారు, ఈక్విటీలో తలపండిన వారెన్‌ బఫెట్, ఫిలిప్‌ ఫిషర్, చార్లీ ముంగర్‌ చెప్పిన సూత్రాలు పాటించడం అనుసరణీయం. కంపెనీ గురించి, చేస్తున్న వ్యాపారం గురించి, పని చేస్తున్న రంగం, యాజమాన్య దక్షత, పోటీ సామర్థ్యాలు, నిధుల బలాలు ఇలా ఎన్నో అంశాలను చూసి వడపోయాలి. ఆపై మిగిలిన కంపెనీలకే పెట్టుబడులను పరిమితం చేసుకోవడం వల్ల రక్షణ ఎక్కువగా ఉంటుంది. నేరుగా పెట్టుబడులు పెట్టే ప్రతి ఇన్వెస్టర్‌ తెలుసుకోవాల్సిన అంశాల సమాహారమే ఈ కథనం... వ్యాపార నమూనా అర్థమైందా? ఒక కంపెనీ షేర్లు కొంటున్నామంటే.. సదరు వ్యాపారంలో పెట్టుబడి పెడుతున్నట్టు. ఒక షేరును రూ.20లో కొని, అది రూ.100కు చేరితే నాలుగింతలు లాభం వస్తుందన్న అవాస్తవ అంచనాలు వేసుకుని ఓ కంపెనీలో పెట్టుబడులు పెడుతున్నారంటే? అనుసరించే బాట సరిగ్గా లేదని తెలుసుకోవాలి. ఎంపిక చేసుకునే కంపెనీకి ఆదాయం ఎలా వస్తోంది? కంపెనీ సేవలు లేదా ఉత్పత్తులు ఏంటన్నవి అర్థం చేసుకున్నారా? ఈ ప్రశ్నలకు మీ వద్ద సమాధానం ఉండాల్సిందే. కంపెనీ ఉత్పత్తులు లేదా సేవల గురించి తెలియనప్పుడు, భవిష్యత్తులో ఆ కంపెనీ వ్యాపారం ఎలా సాగుతుందో ఎలా తెలుస్తుంది? అటువంటప్పుడు పెట్టే పెట్టుబడి ఎలా వృద్ధి చెందుతుంది? ఒక కంపెనీ గురించి అర్థం కాకకపోయినా లేదా ఉత్పత్తులు, సేవలు ఆకర్షణీయంగా అనిపించకపోయినా, ఆ కంపెనీకి దూరంగా ఉండడమే మంచిది. వ్యాపారం అర్థం చేసుకునేందుకు ఎంత సులభంగా ఉంటే, అంత ఆకర్షణీయమైనదిగా భావించొచ్చు.   యాజమాన్య దక్షత గుడ్‌ బిజినెస్‌ ఇన్‌ రాంగ్‌ హ్యాండ్స్‌.. రాంగ్‌ బిజినెస్‌ ఇన్‌ గుడ్‌ హ్యాండ్స్‌.. ఈ రెండింటిలో రెండోదే ఉత్తమం. సమర్థత లేని వ్యక్తుల చేతుల్లో మంచి వ్యాపారం ఉన్నా దాన్ని గొప్ప స్థాయికి తీసుకెళ్లలేరు. అదే మంచి వ్యాపార దక్షత కలిగిన వ్యక్తులు యాజమాన్య స్థానంలో ఉంటే, చెత్త వ్యాపారాన్ని సైతం మంచిగా వృద్ధి చేయగలరు. పెట్టుబడులు పెట్టే కంపెనీకి సమర్థులైన, ప్రతిభావంతులైన, భవిష్యత్తు ప్రణాళికలు, పోటీతత్వంపై స్పష్టమైన అవగాహన, టెక్నాలజీ పట్ల ఆసక్తి కలిగిన ప్రమోటర్లు ఉండాలి. ఆ కంపెనీ యాజమాన్యం పనితీరు గురించి సాధ్యమైనంత లోతుగా తెలుసుకోవాలి. వ్యవస్థాపకుల ఆధ్వర్యంలో నడిచేవి, కుటుంబ కంపెనీలు సగటున ఏటా 3 శాతం అధిక పనితీరు చూపిస్తున్నట్టు పలు అధ్యయనాలు వెల్లడిస్తున్నాయి. అదే సమయంలో ప్రమోటర్లతో సంబంధం లేకుండా నిపుణుల ఆధ్వర్యంలో గొప్పగా పనిచేసే హెచ్‌డీఎఫ్‌సీ గ్రూప్, ఎల్‌అండ్‌టీ గ్రూప్, ఐటీసీ గ్రూప్‌ కూడా ఉన్నాయి.   మరొక ముఖ్యమైన అంశం.. ప్రతి కంపెనీ కూడా ఒక్కో రంగంలో విశేషమైన అనుభవం కలిగి ఉంటుంది. ఆయా రంగంలో వచ్చే మార్పులు, సవాళ్లకు అనుగుణంగా తన వ్యూహాలు మార్చుకుంటూ వెళ్లాల్సి ఉంటుంది. అలా ఓ రంగానికే కట్టుబడి గొప్పగా రాణిస్తున్న కంపెనీలను పెట్టుబడులకు పరిశీలించొచ్చు. కంపెనీల మేనేజ్‌మెంట్‌ వ్యాపారంపైనే దృష్టి పెట్టాలి కానీ, వాటాదారుల విలువపై కాదు. కంపెనీ వ్యాపారంలో మెరుగ్గా రాణిస్తుంటే సహజంగానే వాటాల విలువ ఇతోధికం అవుతుంది. వ్యాపారం కాకుండా వాటాల విలువను పెంచడంపై దృష్టి సారించే యాజమాన్యాల వైఖరి, దీర్ఘకాలంలో వాటాదారులకు మేలు చేయకపోవచ్చు. కొన్ని కంపెనీలు చేస్తున్న వ్యాపారంపై దృష్టి తగ్గించి, మార్కెట్లో వచ్చే కొత్త వ్యాపార అవకాశాల్లోకి ప్రవేశిస్తుంటాయి. వాటాల విలువ పెరుగుతుందని అలా వ్యవహరిస్తుంటాయి. దీనివల్ల నిజానికి వ్యాపార విధానం గాడి తప్పుతుంది. కొత్త వ్యాపారాల కోసం పెద్ద ఎత్తున రుణాలు సమీకరిస్తుంటాయి. ఇది కూడా వాటాదారుల విలువకు ప్రతికూలం అవుతుంది. భవిష్యత్‌ నాయకత్వం? ఒక గొప్ప ప్రమోటర్‌ను చూసి కళ్లు మూసుకుని ఆ కంపెనీలో ఇన్వెస్ట్‌ చేయొచ్చని అనుభవజు్ఞలైన ఇన్వెస్టర్లు చెబుతుంటారు. నిజమే అలా ఇన్వెస్ట్‌ చేసిన తర్వాత, ఆ గొప్ప ప్రమోటర్‌ ఏదో ఒకరోజు వయసు మళ్లో లేకుంటే ఆకస్మికంగా కాలం చేస్తే పరిస్థితి ఏమిటి? కంపెనీ సంక్షోభంలో పడిపోకుండా, ఆ తర్వాత నుంచి సమర్థవంతంగా నడిపించే నాయకుడు ఉన్నారో లేదో చూడాలి. ప్రమోటర్‌ కాకపోయినా కంపెనీలను గొప్ప స్థాయికి తీసుకెళ్లిన ఎల్‌అండ్‌టీ ఏఎం నాయక్‌ వంటి నిపుణులు ఎందరో ఉంటారు. అలాంటి నిపుణుల చేతికి నాయకత్వం వెళితే నిశి్చంతగా ఉండొచ్చు.   పనిచేస్తున్న రంగం కంపెనీ ఏ రంగంలో పనిచేస్తుందన్నది మరో ముఖ్యమైన అంశం. ఉదాహరణకు మెటల్స్‌ తీసుకుంటే వాటి ధరలు అంతర్జాతీయంగా వివిధ దేశాల వినియోగం, ఆరి్థక పరిస్థితులకు అనుగుణంగా తీవ్ర హెచ్చుతగ్గులను చూస్తుంటాయి. స్థిరమైన రాబడి కోరుకునే వారు మెటల్స్‌కు దూరంగా ఉండాల్సిందే. అదే ఐటీ రంగం తీసుకుంటే అస్థిరతలు తక్కువ. ఎక్కువ కాలాల్లో స్థిరమైన వృద్ధిని ఏటా నమోదు చేస్తుంటాయి. అలాగే బాగా వృద్ధికి అవకాశం ఉన్న రంగాలను ఎంపిక చేసుకుంటే, ఎక్కువ కాంపౌండింగ్‌కు అవకాశం ఉంటుంది.   పోటీతత్వం ఎంపిక చేసుకునే కంపెనీకి గట్టి పోటీనిచ్చే సామర్థ్యాలున్నాయా? సదరు కంపెనీకి వ్యాపార పరంగా బలాలు ఉండే పెట్టుబడులకు రక్షణ ఉన్నట్టుగా భావించొచ్చు. దీన్నే మోట్‌ అని పిలుస్తారు. దీన్ని ఎలా తెలుసుకోవచ్చు? అంటే.. కంపెనీకి వ్యాపారంలో స్థూల మార్జిన్లు గరిష్ట స్థాయిలోనే దీర్ఘకాలం పాటు కొనసాగుతుంటే, ఆ కంపెనీ ఉత్పత్తులు లేదా సేవలకు మంచి డిమాండ్‌ ఉన్నట్టుగా భావించొచ్చు. ఉదాహరణకు యాపిల్‌ స్థూల మార్జిన్లు 44 శాతానికి పైనే. ఆయా వ్యాపారంలో కొన్ని కంపెనీలే పనిచేస్తుండడం, కొత్త  కంపెనీల ప్రవేశం అంత సులభం కాకపోవడం వంటివి అనుకూలతలు. దీనివల్ల ఉన్న కంపెనీలకు ప్రైసింగ్‌ పవర్‌ (ధరలను నిర్ణయించే శక్తి) ఉంటుంది. కనీసం లాభాల మార్జిన్‌ 10 శాతానికి పైన ఉండేలా చూసుకోవాలి. స్వల్ప మార్జిన్‌తో నడిచే కంపెనీలు ఎప్పుడైనా నష్టాల్లోకి జారిపోవచ్చు. పోటీ సంస్థల కంటే మీరు పెట్టుబడి పెట్టే కంపెనీ లాభాల మార్జిన్‌ ఎక్కువగా ఉండాలి. ఈ మార్జిన్‌ను ఏటేటా పెంచుకోవడం లేదంటే అదే స్థాయిలో కొనసాగించడం అవసరం. ఏటేటా క్షీణిస్తూ ఉంటే, బలం క్షీణిస్తున్నట్టుగా చూడొచ్చు. కంపెనీ నిలబడుతుందా? కంపెనీ రిస్క్‌లను కూడా చూడాలి. కంపెనీకి బలాలు ఉన్నాయని ఇన్వెస్ట్‌ చేసిన తర్వాత.. అవి అలాగే కొనసాగుతున్నాయా? అని కనిపెట్టుకుని ఉండాలి. టెలికం రంగంలో ఏం జరిగిందో చూశారు కదా..? జియో రావడంతో ఎయిర్‌టెల్, వొడాఐడియా మినహా అన్నీ మూట సర్దేసుకోవాల్సి వచ్చింది. వొడాఐడియా కూడా ఆరి్థక సంక్షోభంతో కొనసాగుతోంది. ఇలాంటి విపత్తు ఏ రంగంలో అయినా ఉండొచ్చు. ఇన్వెస్ట్‌ చేసే ముందే కంపెనీకి వచ్చే రిస్‌్కల గురించి కూడా అవగాహన ఉండాలి. ఎయిర్‌టెల్‌ కంపెనీకి నెట్‌వర్క్‌ విస్తరణ పరంగా కాస్త మెరుగైన సామర్థ్యాలు ఉన్నాయి. దీనికితోడు మారుతున్న మార్కెట్‌ పరిణామాలకు తగ్గట్టు ఎయిర్‌టెల్‌ ప్రణాళికలు రచించి, అమలు చేసుకుంటూ వెళ్లింది. అందుకే జియోకు గట్టి పోటీదారుగా నిలిచింది. ముఖ్యంగా కంపెనీకి దీర్ఘకాలిక విజన్‌ (భవిష్యత్‌ ప్రణాళిక) ఉండాలి. అలాంటి కంపెనీలు దీర్ఘకాలంలో సవాళ్లను దీటుగా ఎదుర్కొని, వాటాదారులకు విలువను సమకూర్చగలవు.   బలమైన బ్యాలన్స్‌ షీట్‌ ఎంపిక చేసుకునే కంపెనీకి ఆరి్థక బలాలు తప్పకుండా ఉండాలి. కంపెనీకి దాదాపు రుణ భారం లేకుండా ఉంటే మంచిది. ఒకవేళ రుణాలు ఉన్నా కానీ, ఆ మొత్తం ఈక్విటీతో పోలిస్తే నూరు శాతం మించకుండా చూసుకోవాలి. రుణభారం ఎక్కువైతే కంపెనీ సంపాదించినదంతా వడ్డీ చెల్లింపులకే సరిపోతుంది. అప్పుడు కంపెనీ వృద్ధి ప్రణాళికల కోసం అప్పు మీద అప్పు చేసుకుంటూ వెళ్లాల్సి వస్తుంది. ఇలాంటి బ్యాలన్స్‌ షీటు కంపెనీలకు దూరంగా ఉండాలి. రుణరహిత కంపెనీలు, ఆదాయం ఏటా కనీసం 10–15 శాతం, నికర లాభం ఏటా 15–20 శాతం వృద్ధి చెందే కంపెనీల్లో పెట్టుబడికి రక్షణ, వృద్ధికి అవకాశం ఉంటుంది. ఓ కంపెనీ షేరు ధర దీర్ఘకాలంలో లాభాలనే అనుసరిస్తుంటుంది. డివిడెండ్‌  చెల్లించేవి అయితే అదనపు ప్లస్‌గా చూడొచ్చు.    పరిశోధన, ఆవిష్కరణల సామర్థ్యం మారుతున్న కస్టమర్‌ అవసరాలకు అనుగు ణంగా ఉత్పత్తులు, సేవల్లోనూ నవ్యత అవసరం. అందుకే కంపెనీలు పరిశోధనపై పెద్ద మొత్తంలో వెచి్చస్తుంటాయి. ఓ కంపెనీ పరిశోధన, ఆవిష్కరణల సామర్థ్యాలకు నిదర్శనం, ఆ కంపెనీ ఉత్పత్తులకు పేటెంట్‌ హక్కులు ఉండడం. ఎప్పటికప్పుడు కొత్త ఉత్పత్తులు, సేవలను మార్కెట్‌ చేస్తుండడం. ఇలాంటి బలాలు ఉంటే, దీర్ఘకాలంలో ఆ కంపెనీ ఎంత పోటీ ఉన్నా నిలదొక్కుకుని, రాణిస్తుంది. ఇందుకు ఒక నిదర్శనం గూగుల్, యాపిల్‌. ఇవి పరిశోధనపై పెద్ద ఎత్తున ఖర్చు చేస్తుంటాయి. ఉత్పత్తులు, సేవలపై పేటెంట్‌ ఉంటే, వ్యాపారంలో అ ధిక లాభాల మార్జిన్లకూ అవకాశం ఉంటుంది. ఒకవేళ అప్పటికే ఉన్న పేటెంట్ల గడువు ముగుస్తుంటే, అది లాభాలపై ప్రతికూల ప్రభావం చూపుతుంది. ఉద్యోగులతో సంబంధాలు కంపెనీలో పని విలువలు కూడా వాటాదారులకు విలువను తెచ్చి పెట్టే అంశాల్లో ఒకటి. మెరుగైన పని విధానం ఉన్న కంపెనీలు దీర్ఘకాలంలో వాటాదారులకు మంచి విలువను సమకూరుస్తాయని ఎన్నో నిదర్శనాలు ఉన్నాయి. కంపెనీ ఉద్యోగుల విషయంలో సముచితంగా వ్యవహరిస్తుంటే, మెరుగైన పని వాతావరణం ఉన్నప్పుడు వారు మరింత ఉత్పాదకత దిశగా పనిచేయగలరు.   వాటాల విలువ పలుచన అవుతోందా? కంపెనీల మూలధనం పెరుగుతూ వెళుతోందా? ఏ రూపంలో అయినా కానీయండి, దీనివల్ల అప్పటికే కంపెనీలో ఉన్న వాటాల విలువ పలుచనవుతుంది. పెట్టుబడులకు ఎంపిక చేసుకునే కంపెనీల మూలధనం స్థిరంగా ఉండాలి. షేర్ల బైబ్యాక్‌ రూపంలో ఈక్విటీ తగ్గుతుంటే ఇంకా మంచిది. దీనివల్ల వాటాదారుల విలువ ఎప్పటికప్పుడు వృద్ధి చెందుతుంది. బ్యాంక్‌ స్టాక్స్‌కు ఈ విషయంలో మినహాయింపు ఇవ్వొచ్చు. ఎందుకంటే బ్యాంకులకు నిధులే వ్యాపార వస్తువు. కనుక అవి తాజా ఈక్విటీ జారీ ద్వారా ఎప్పటికప్పుడు నిధులు సమీకరిస్తూ, వ్యాపార విస్తరణపై వెచి్చస్తుంటాయి. ఇవి కూడా గమనించాలి.. ► టెక్నాలజీ పరంగా కంపెనీ ముందుండాలి. కాలంతో పాటు వచ్చే మార్పులను ఆహా్వనించాలి. లేదంటే అస్తిత్వ ముప్పు ఏర్పడొచ్చు. ► కొన్ని రంగాల్లో చిన్న కంపెనీల కంటే పెద్ద కంపెనీలకు ప్రాధాన్యం ఇవ్వడమే మంచిది. ఉదాహరణకు టైర్ల రంగంలో చిన్న కంపెనీని ఎంపిక చేసుకోవడం కంటే ఎంఆర్‌ఎఫ్‌ వంటి పెద్ద కంపెనీలే దీర్ఘకాలంలో రాణించేందుకు అవకాశాలు మెరుగ్గా ఉంటాయి.   ► ఓ కంపెనీ షేరు గణనీయంగా పడిపోయిందని ఇన్వెస్ట్‌ చేయడం సరికాదు. ఆ షేరు ఏ కారణాల వల్ల పడిపోయిందన్నది ముందుగా తెలుసుకోవాలి. జెట్‌ ఎయిర్‌వేస్, రిలయన్స్‌ కమ్యూనికేషన్స్, యస్‌ బ్యాంక్‌ ఇలాంటి కేసులను అధ్యయనం చేయాలి. పడిపోతున్న షేరును కొనుగోలు చేయడం, పడిపోతున్న కత్తిని పట్టుకోవడంగా నిపుణులు చెబుతుంటారు. ► కంపెనీ రిటర్న్‌ ఆన్‌ ఈక్విటీ (ఆర్‌వోఈ) దీర్ఘకాలంలో పెద్దగా వృద్ధి లేకుండా అక్కడక్కడే చలిస్తుంటే.. దీనికి బదులు ఏటేటా ఆర్‌వోఈ వృద్ధి చెందే కంపెనీలే మెరుగైన రాబడులను ఇవ్వగలవు.   ► సిమెంట్, మెటల్స్, షుగర్, ఆటోమొబైల్‌ ఇవన్నీ సైక్లికల్‌ కంపెనీలు. కొన్నేళ్ల కాలంలోనే ఎన్నో రెట్ల రాబడులు ఇచి్చన తర్వాత, మళ్లీ ర్యాలీ చేయడానికి కొన్నేళ్ల సమయం తీసుకుంటాయి. ఇలాంటి కంపెనీల్లో అధిక వేల్యుయేషన్ల వద్ద ఇన్వెస్ట్‌ చేసే ముందు ఈ అంశాలను గమనించాలి.   ► వాటాల పరంగా లిక్విడిటీ మెరుగ్గా ఉండాలి. అంటే ఫ్రీఫ్లోట్‌ మార్కెట్‌ క్యాప్‌ చెప్పుకోదగినంతగా ఉండాలి. లిక్విడిటీ తక్కువగా ఉంటే, మార్కెట్‌ కరెక్షన్లలో అమ్ముకోవడానికి అవకాశాలు తక్కువగా ఉంటాయి. కొద్దిపాటి అమ్మకాల ఒత్తిడికే షేరు ధర భారీగా పతనం చెందుతుంది. దీంతో భారీ నష్టాలు ఎదురవుతాయి. కంపెనీ షేరు ధరను కాకుండా, అంతర్గత విలువను (ఇంట్రిన్సిక్‌ వ్యాల్యూ) చూసిన తర్వాతే నిర్ణయం తీసుకోవాలి.   ► కార్పొరేట్‌ గవర్నెన్స్‌ మెరుగ్గా ఉండాలి. కంపెనీ వ్యవహారాలు పారదర్శకంగా ఉన్నప్పుడే, మార్కెట్‌ ఆ కంపెనీకి మెరుగైన విలువను కడుతుంది. ఇనిస్టిట్యూషన్స్‌ పెట్టుబడులతో ముందుకు వస్తాయి. కార్పొరేట్‌ గవర్నెన్స్‌ మెరుగ్గా లేని కంపెనీలకు దూరంగా ఉంటాయి. సత్యం కంప్యూటర్స్, బ్రైట్‌కామ్‌ గ్రూప్, ఈకేఐ ఎనర్జీ వంటి కంపెనీల కేసులను ఇందుకు అధ్యయనం చేయొచ్చు.   ► ప్రమోటర్ల వాటా కంపెనీలో ఎంత ఉందన్నది కూడా చూడాలి. కనీసం 20 శాతంపైన ఉంటే మంచిది. పైగా ప్రమోటర్లు తమకున్న వాటాలను తనఖా పెట్టారా? తనఖా పెట్టిన మొత్తం వారి వాటాల్లో 50 శాతం మించితే అటువంటి వాటికి దూరంగా ఉండాలి.   స్కటిల్‌బట్‌ మెథడ్‌  ప్రకారం.. ఓ కంపెనీలో పెట్టుబడులకు ఆసక్తిగా ఉంటే, ముందు ఆయా కంపెనీల ఉత్పత్తులు, సేవలను వినియోగించుకునే వారిని కలసి మాట్లాడాలి. అలాగే, ఆ కంపెనీ పోటీదారులు, ఉద్యోగులతో మాట్లాడిన తర్వా త ఓ నిర్ణయానికి రావాలి. – ఫిలిప్‌ ఎ. ఫిషర్‌

న్యూఢిల్లీ: కార్పొరేట్‌ గవర్నెన్స్‌ విషయంలో భారత్‌ రోల్‌ మోడల్‌గా ఎదిగేందుకు కంపెనీ సెక్రటరీలు కృషి చేయాలని రాష్ట్రపతి ద్రౌపది ముర్ము సూచించారు. అలాగే, వ్యాపారాలు, పెట్టుబడులను ప్రోత్సహించే చట్టాలు అమలయ్యేలా చూడటంలో తమ వంతు తోడ్పాటు అందించాలని పేర్కొన్నారు. ఇనిస్టిట్యూట్‌ ఆఫ్‌ కంపెనీ సెక్రటరీస్‌ ఆఫ్‌ ఇండియా (ఐసీఎస్‌ఐ) 55వ వ్యవస్థాపక దినోత్సవంలో పాల్గొన్న సందర్భంగా ఆమె ఈ విజ్ఞప్తి చేశారు. ప్రపంచానికి సారథ్యం వహించగలిగే దేశంగా భారత్‌ ముందుకు పురోగమిస్తోందని ముర్ము పేర్కొన్నారు. ఈ నేపథ్యంలో దేశీయంగా వృత్తి నిపుణులు తగిన అర్హత కలిగినవారై ఉండటంతో పాటు సాహసోపేతంగా, సృజనాత్మకంగా కూడా వ్యవహరించాలని ఆమె చెప్పారు. కంపెనీ సెక్రటరీల సంకల్పంపైనే దేశ కార్పొరేట్‌ గవర్నెన్స్‌ భవిష్యత్‌ ఆధారపడి ఉందన్నారు. కార్పొరేట్‌ గవర్నెన్స్‌కు పునరంకితం కావాలి  మెరుగైన కార్పొరేట్‌ గవర్నెన్స్‌ ప్రమాణాల పాటింపునకు కంపెనీ సెక్రటరీలు పునరంకితం కావాలని కేంద్ర ఆర్థిక మంత్రి నిర్మలా సీతారామన్‌  ఈ కార్యక్రమంలో సూచించారు. ఐసీఎస్‌ఐ నెలకొల్పిన ఉత్తమ ప్రమాణాలకు ప్రపంచవ్యాప్తంగా గుర్తింపు ఉందని కితాబిచ్చారు. అగ్నివీర్, డిఫెన్స్‌ సిబ్బంది, అమరవీరుల కుటుంబాలకు చెందిన వారు కంపెనీ సెక్రటరీ కోర్సులో చేరితే రిజిస్ట్రేషన్‌ ఫీజు నుంచి మినహాయింపునివ్వాలని ఐసీఎస్‌ఐ నిర్ణయం తీసుకోవడం, అమరవీరుల కుమార్తెల విద్యాభ్యాసం కోసం రూ. 11 లక్షల విరాళమివ్వడం ప్రశంసనీయమని ఆమె పేర్కొన్నారు. వ్యాపార నిర్వహణను సులభతరం చేసేందుకు ప్రభుత్వం అనేక చర్యలు తీసుకుంటోందని మంత్రి చెప్పారు. ఈ నేపథ్యంలో భారత్‌లోకి గత మూడు ఆర్థిక సంవత్సరాల్లో 230 బిలియన్‌ డాలర్ల పైచిలుకు పెట్టుబడులు వచ్చినట్లు పేర్కొన్నారు. భారత్‌లో పెట్టుబడులు పెట్టేందుకు, వ్యాపారాలు నిర్వహించేందుకు కంపెనీల్లో నెలకొన్న ఆసక్తిని ఇది సూచిస్తోందన్నారు.

ముంబై: కార్పొరేట్‌ గవర్నెన్స్‌కి సంబంధించి నిర్దిష్ట మార్గదర్శకాలు ఉన్నప్పటికీ కొన్ని బ్యాంకుల్లో వాటి అమలు తీరులో మాత్రం లోపాలు ఉన్నట్లు తేలిందని రిజర్వ్‌ బ్యాంక్‌ గవర్నర్‌ శక్తికాంత దాస్‌ తెలిపారు. వాటిని అధిగమించగలిగామని, లేకపోతే ఎంతో కొంత ఒడిదుడుకులు తలెత్తేవని ఆయన పేర్కొన్నారు. ‘కార్పొరేట్‌ గవర్నెన్స్‌పై స్పష్టమైన మార్గదర్శకాలు ఉన్నప్పటికీ, బ్యాంకింగ్‌ రంగంలో ఒడిదుడుకులకు దారి తీసేలా కొన్ని బ్యాంకుల్లో గవర్నెన్స్‌పరమైన లోపాలు బైటపడటం ఆందోళనకరమైన విషయం‘ అని బ్యాంక్‌ బోర్డుల డైరెక్టర్లతో సోమవారం జరిగిన సమావేశంలో దాస్‌ పేర్కొన్నారు. బ్యాంకుల బోర్డులు, యాజమాన్యాలు ఇలాంటి లోపాలు తలెత్తకుండా చూసుకోవాల్సిన అవసరం ఉందని ఆయన స్పష్టం చేశారు.    స్మార్ట్‌ మోసాలు.. మొండిపద్దులపరమైన ఒత్తిళ్లను దాచి పెట్టేందుకు, కృత్రిమంగా ఆర్థిక పనితీరును గొప్పగా చూపించుకునేందుకు బ్యాంకులు ‘స్మార్ట్‌ అకౌంటింగ్‌’ విధానాలను ఆశ్రయించడాన్ని దాస్‌ తీవ్రంగా తప్పు పట్టారు. ఇందుకోసం బ్యాంకులు పాటిస్తున్న విధానాలను ప్రస్తావించారు. ఖాతాల్లో మొండిబాకీల భారాన్ని తగ్గించుకునేందుకు ఒక బ్యాంకు మరొక బ్యాంకుకు సందర్భాన్ని బట్టి తమ రుణాలను విక్రయించి, తిరిగి బైబ్యాక్‌ చేయడం .. రుణగ్రహీత చెల్లించాల్సిన రీపేమెంట్లను అంతర్గతంగా ఖాతాల్లో సర్దుబాటు చేయడంలాంటివి వీటిలో ఉన్నట్లు దాస్‌ పేర్కొన్నారు.

న్యూఢిల్లీ: లిస్టెడ్‌ కంపెనీలకు సంబంధించి కార్పొరేట్‌ గవర్నెన్స్‌ (కంపెనీల నిర్వహణ/పాలన వ్యవహారాలు) బలోపేతానికి సెబీ చర్యలను ప్రతిపాదించింది. కొందరు వాటాదారులు ప్రత్యేక హక్కులను శాశ్వతంగా అనుభవించే అంశాన్ని పరిష్కరించడంపై దృష్టి పెట్టింది. లిస్టెడ్‌ కంపెనీలు చేసుకునే ఒప్పందాలు, బోర్డులో డైరెక్టర్‌ స్థానాలకు సంబంధించి కూడా పలు కొత్త ప్రతిపాదనలు చేసింది. ఆస్తుల అమ్మకం లేదా లీజు అంశాలనూ పరిష్కరించనుంది. ఈ ప్రతిపాదిత చర్యలపై సలహాలు, సూచనలను మార్చి 7లోపు తెలియజేయాలని సెబీ కోరింది.   సెబీ ప్రతిపాదనలు   ► ఒక కంపెనీ ఏదైనా వాటాదారునకు శాశ్వత హక్కులు కల్పిస్తే.. దీనిపై ఐదేళ్లకోసారి వాటాదారుల ఆమోదం తీసుకోవాల్సి ఉంటుంది.   ► ఇప్పటికే కల్పించిన ప్రత్యేక హక్కులను సైతం ఐదేళ్ల తర్వాత పునరుద్ధరణపైనా వాటాదారుల ఆమోదం కోరాల్సి ఉంటుంది.   ► ప్రమోటర్లు, వ్యవస్థాపకుడు, కొన్ని కార్పొరేట్‌ బాడీలకు ప్రత్యేక హక్కులు కల్పించడంపై వాటాదారుల నుంచి ఆందోళన వస్తుండడంతో సెబీ ఈ మార్పులకు శ్రీకారం చుట్టింది. ప్రత్యేక హక్కులు పొందిన వాటాదారులు, తర్వాతి కాలంలో వారి వాటాలను తగ్గించుకున్నప్పటికీ, అవే హక్కులను అనుభవిస్తుండడాన్ని సెబీ గుర్తించింది. ఇది వాటాదారుల హక్కులకు విరుద్ధమని సెబీ అభిప్రాయపడింది.   ► కంపెనీ బోర్డులో నియమితులయ్యే డైరెక్టర్లు అందరూ ఎప్పటికప్పుడు వాటాదారుల ఆమోదం పొందాల్సి ఉంటుందని సెబీ తన తాజా ప్రతిపాదనలలో పేర్కొంది. దీంతో కొందరు వ్యక్తులకు కంపెనీ బోర్డుల్లో శాశ్వత స్థానం కల్పిస్తున్నారనే ఆందోళనను పరిష్కరించనుంది. ముఖ్యంగా, ప్రమోటర్లు, డైరెక్టర్లకు సంబంధించిన వారిని ఇలా నియమిస్తుండడం గమనార్హం.   ► 2024 ఏప్రిల్‌ 1 నుంచి బోర్డు డైరెక్టర్ల నియామానికి ప్రతీ ఐదేళ్లకోసారి వాటాదారుల ఆమోదం కోరాల్సి ఉంటుంది. 2024 మార్చి నాటికి బోర్డుల్లో డైరెక్టర్లుగా అధికారం అనుభవిస్తున్న వారికి సంబంధించి కూడా తదుపరి జరిగే ప్రథమ వార్షిక సాధారణ సమావేశంలో వాటాదారుల అనుమతి తీసుకోవాలని సెబీ పేర్కొంది.   ► యాజమాన్యం లేదా కంపెనీ నిర్వహణపై ప్రభావం చూపించే ఒప్పందాలు, కంపెనీపై ఏవైనా బాధ్యతలు మోపే వాటి గురించి స్టాక్‌ ఎక్సేంజ్‌లకు తెలియజేయాలి. ► కంపెనీ వ్యాపార కార్యకలాపాలు, సరఫరా, కొనుగోళ్ల ఒప్పందాలకు సంబంధించి తెలియజేయాల్సిన అవసరం ఉండదు.   ఈఎస్‌జీ కింద మరిన్ని పథకాలు మ్యూచువల్‌ ఫండ్స్‌ సంస్థలు (ఏఎంసీలు) ఈఎస్‌జీ కింద ఐదు కొత్త విభాగాల్లో ఫండ్స్‌ను తీసుకొచ్చేందుకు సెబీ ప్రతిపాదన చేసింది. ఈఎస్‌జీ అనేది పర్యావరణానికి హాని చేయని, సామాజిక, పరిపాలన ప్రమాణాలకు ప్రాధాన్యం ఇచ్చే కంపెనీల్లో పెట్టుబడులు పెట్టే విధానం. ప్రస్తుతం ఒక ఏఎంసీ ఒక ఈఎస్‌జీ పథకాన్ని ప్రారంభించేందుకు అనుమతి ఉంది. కానీ ఒకటికి మించి భిన్నమైన పథకాలను ఈఎస్‌జీ కేటగిరీలో ఆఫర్‌ చేయాలనుకుంటే అందుకు ప్రస్తుతం అనుమతి లేదు. సెబీ నూతన ప్రతిపాదన కార్యరూపం దాలిస్తే ఏంఎసీలు ఐదు ఈఎస్‌జీ కేటగిరీల్లో కలిపి మొత్తం మీద ఐదు పథకాలను ఆఫర్‌ చేయవచ్చు. ఈ పథకాల కింద మొత్తం ఆస్తుల్లో 80 శాతం వరకు ఈక్విటీ లేదా డెట్‌లో ఇన్వెస్ట్‌ చేసుకోవచ్చు. ఈఎస్‌జీ థీమ్‌లో అధికంగా పెట్టుబడులు కలిగి ఉండేట్టు అయితే దాన్ని విధిగా తెలియజేయాల్సి ఉంటుందని సెబీ తన ప్రతిపాదనల్లో పేర్కొంది. నెలవారీ పోర్ట్‌ఫోలియో వివరాలకు అదనంగా, ఈఎస్‌జీ రేటింగ్‌లను సైతం ఫండ్స్‌ సంస్థలు ఇన్వెస్టర్లకు విధిగా వెల్లడించాల్సి ఉంటుంది. ఈ ప్రతిపాదనలపై సలహా, సూచనల తర్వాత సెబీ తుది నిర్ణయం తీసుకోనుంది.

న్యూఢిల్లీ: దేశీ డిజిటల్‌ వ్యవస్థ తోడ్పాటుతో అంకుర సంస్థలు రాబోయే రోజుల్లో 10 కోట్ల పైచిలుకు ఉద్యోగాలను సృష్టించగలవని వెంచర్‌ క్యాపిటల్‌ సంస్థ సెకోయా క్యాపిటల్‌ ఎండీ రాజన్‌ ఆనందన్‌ చెప్పారు. ప్రపంచ స్థాయి కంపెనీలుగా ఎదగాలంటే దేశీ స్టార్టప్‌లు ప్రధానంగా కార్పొరేట్‌ గవర్నెన్స్‌పై మరింతగా దృష్టి పెట్టాల్సి ఉంటుందని ఆయన సూచించారు. ‘గత కొన్నాళ్లుగా కార్పొరేట్‌ గవర్నెన్స్‌కు ప్రాధాన్యం పెరుగుతోంది. ప్రపంచ స్థాయి కంపెనీలుగా ఎదగాలంటే ప్రపంచ స్థాయి ప్రమాణాలు పాటించాలి. ఇందుకు సంబంధించి పాటించాల్సిన ప్రక్రియలు, క్రమశిక్షణ మొదలైన వాటి గురించి వ్యవస్థాపకుల్లో అవగాహన పెంచుతున్నాం‘ అని ఆనందన్‌ వివరించారు. సెకోయా ఇన్వెస్ట్‌ చేసిన భారత్‌పే, జిలింగో సంస్థల్లో కార్పొరేట్‌ గవర్నెన్స్‌పరమైన సమస్యలు బైటపడిన నేపథ్యంలో ఆయన వ్యాఖ్యలు ప్రాధాన్యం సంతరించుకున్నాయి.   అంతర్జాతీయంగా నెలకొన్న వివిధ అంశాల ఊతంతో అమెరికా, భారత్, చైనా తదితర దేశాల్లోని స్టార్టప్‌ వ్యవస్థల్లోకి భారీగా నిధులు వచ్చిపడ్డాయని ఆనందన్‌ చెప్పారు. అనేక సవాళ్లు ఉన్నప్పటికీ చైనా వ్యవస్థలోకి గతేడాది దాదాపు 130 బిలియన్‌ డాలర్లు, అలాగే భారత స్టార్టప్‌ సంస్థల్లోకి 40 బిలియన్‌ డాలర్లు వచ్చినట్లు వివరించారు. కానీ ప్రస్తుతం పరిస్థితులన్నీ మారిపోయాయని ఆనందన్‌ చెప్పారు. ‘ద్రవ్యోల్బణం గరిష్ట స్థాయికి చేరింది. వడ్డీ రేట్లు పెరుగుతున్నాయి. అమెరికా ఫెడరల్‌ రిజర్వ్‌ కూడా రేట్లు వేగంగా పెంచవచ్చు. ఎకానమీలోకి కుమ్మరించిన 7 లక్షల కోట్ల డాలర్లలో సింహభాగాన్ని వెనక్కి తీసుకోవచ్చు‘ అని ఆయన పేర్కొన్నారు. అయితే, ఇంతటి కష్ట పరిస్థితుల్లో కూడా స్టార్టప్‌లు ఎదిగేందుకు మార్గాలు అన్వేషించాలని సూచించారు.   

హైదరాబాద్‌: రామ్‌కో సిమెంట్స్‌ చైర్మన్‌గా ఎంఎఫ్‌ ఫారూఖిని నియమించుకుంది. చైర్‌పర్సన్, మేనేజింగ్‌ డైరెక్టర్‌ పదవులు రెండింటినీ ఒక్కరే నిర్వహించకుండా, మరింత మెరుగైన కార్పొరేట్‌ గవర్నెన్స్‌ కోసం వీటిని వేరు చేయాలంటూ సెబీ లోగడ నిబంధనలు తీసుకొచ్చింది. నూతన నిబంధనలు ఈ ఏడాది ఏప్రిల్‌ 1 నుంచి అమల్లోకి వచ్చాయి. దీంతో రామ్కో సిమెంట్స్‌ లిమిటెడ్‌ బోర్డు చైర్మన్, ఎండీ పదవులను వేరు చేస్తూ నిర్ణయం తీసుకుంది. చైర్మన్‌గా మాజీ ఐఏఎస్‌ అధికారి  ఎంఎఫ్‌ ఫారూఖిని ఎంపిక చేసినట్టు సంస్థ ప్రకటించింది. ఇక ఇప్పటి వరకు చైర్మన్, ఎండీగా సేవలు అందించిన కంపెనీ వ్యవస్థాపకుడు పీఆర్‌ వెంకట్రామ రాజా ఎండీగా కొనసాగుతారని కంపెనీ ప్రకటించింది. ఎండీగా ఆయన పదవీకాలం ఈ ఏడాది జూన్‌ 3తో ముగియనుంది. అయితే, ఆ తదుపరి మరో ఐదేళ్ల కాలానికి ఎండీగా నియమించినట్టు రామ్‌కో సిమెం ట్స్‌ తెలిపింది. ఈ నిర్ణయాలకు రానున్న కంపెనీ ఏజీఎంలో వాటాదారుల ఆమోదం తీసుకోనుంది. 

న్యూఢిల్లీ: క్యాష్‌ మేనేజ్‌మెంట్‌ కంపెనీ సీఎంఎస్‌ ఇన్ఫో సిస్టమ్స్‌ తాజాగా ఇద్దరు మహిళా డైరెక్టర్లను నియమించుకుంది. కార్పొరేట్‌ పాలన నిబంధనలకు అనుగుణంగా స్వతంత్ర డైరెక్టర్ల హోదాలో మంజు అగర్వాల్, ఎస్‌.వసంత్‌ కారన్‌జ్‌కర్‌లను ఎంపిక చేసుకున్నట్లు కంపెనీ పేర్కొంది. బ్యాంకింగ్, డిజిటల్‌ బ్యాంకింగ్, ఫిన్‌టెక్‌ విభాగాలలో వీరికి సీనియారిటీ ఉన్నట్లు కంపెనీ వెల్లడించింది. దీంతో బోర్డులో మహిళా డైరెక్టర్ల సంఖ్య మూడుకు చేరినట్లు తెలియజేసింది. ఆరుగురు సభ్యుల బోర్డుకు చైర్‌పర్శన్, నాన్‌ఎగ్జిక్యూటివ్‌ డైరెక్టర్‌ శ్యామలా గోపీనాథ్‌ అధ్యక్షత వహిస్తున్న సంగతి తెలిసిందే. కార్పొరేట్‌ సుపరిపాలన విషయంలో కంపెనీ పాటిస్తున్న అత్యుత్తమ ప్రమాణాలకు తాజా ఎంపికలు నిదర్శనాలని సీఎంఎస్‌ ఇన్ఫో పేర్కొంది. తద్వారా ముగ్గురు లేదా అంతకుమించి మహిళా డైరెక్టర్లు కలిగిన ఎన్‌ఎస్‌ఈ టాప్‌–10 శాతం లిస్టెడ్‌ కంపెనీలలో ఒకటిగా ఆవిర్భవించినట్లు వివరించింది.   బ్యాక్‌గ్రౌండ్‌..: అగర్వాల్‌ ఎస్‌బీఐలో 34ఏళ్లపాటు ఉద్యోగ బాధ్యతలు నిర్వర్తించారు. దేశ, విదేశాలలో రిటైల్, డిజిటల్‌ బ్యాంకింగ్, కస్టమర్‌ సర్వీసులు, వ్యూహాలు, నిర్వహణ తదితర విభాగాలలో విధులు చేపట్టారు. ఇక వసంత్‌ కారన్‌జ్‌కర్‌ కన్జూమర్‌ లెండింగ్‌ సంస్థ పేసెన్స్‌కు సహవ్యవస్థాపకురాలిగా వ్యవహరించారు. బిజినెస్, వృద్ధి, నిర్వహణ విభాగాలకు అధికారిణిగా బాధ్యతలు నిర్వహించారు. పేయూ క్రెడిట్‌ ఇండియాకు చీఫ్‌ బిజినెస్‌ ఆఫీసర్‌గా కూడా పనిచేశారు. పేసెన్స్‌ పురోగతి సాధించాక పేయూ ఇండియాకు చెందిన నాస్పెర్స్‌కు విక్రయించారు.

న్యూఢిల్లీ: బ్యాంకింగ్‌లో పాలనా ప్రమణాలు మరింత బలపడాల్సిన అవసరం ఉందని ఆర్‌బీఐ డిప్యూటీ గవర్నర్‌ ఎంకే జైన్‌ పేర్కొన్నారు. ఒక ఆంగ్లపత్రిక నిర్వహించన ఒక కార్యక్రమంలో ఆయన మాట్లాడుతూ, పాలనా ప్రమాణాల పెంపువల్ల ప్రజల్లో బ్యాంకింగ్‌ పట్ల మరింత విశ్వాసం పెరుగుతుందన్నారు. కార్పొరేట్‌ గవర్నెన్స్‌ అనేది ఏదైనా సంస్థకు మూలస్తంభం వంటిదన్నారు. ఇది బ్యాంకులకు భిన్నమైన గుర్తింపును, ప్రాముఖ్యతను ఇస్తుందని అన్నారు. బ్యాంకింగ్‌ సేవల పరంగా ప్రత్యేక సేవా లక్షణాలను కలిగివుందన్నారు.  దీనితోపాటు ఆర్థిక వ్యవస్థ వృద్ధికి ఉత్ప్రేరకాలుగా బ్యాంకులు పనిచేస్తాయని అందరూ గుర్తుంచుకోవాల్సిన అంశమన్నారు. ఇటువంటి ప్రత్యేక లక్షణాల వల్లే ఎటువంటి హామీ లేకుండానే భారీ ఎత్తున డిపాజిట్లను బ్యాంకులు సమీకరించగలుగుతున్నాయని అన్నారు. ఈ పరిస్థితుల్లో బ్యాంకుల్లో పాలనా సంస్కరణలు కీలకంగా ఉన్నాయన్నారు. డిజిటల్‌ బ్యాంకింగ్‌ విస్తరణ నేపథ్యంలో సైబర్‌ భద్రత అనేది కీలక పర్యవేక్షక అంశంగా మారిందన్నారు. ఈ విషయంలో ఆందోళనలను పరిష్కరించడానికి, వివిధ ప్రమాద సూచికలను ఉపయోగించి బ్యాంకులలో సైబర్‌ ప్రమాదాన్ని అంచనా వేయడానికి ఆర్‌బీఐ ఒక నమూనా ఆధారిత ఫ్రేమ్‌వర్క్‌ను అభివృద్ధి చేసిందని తెలిపారు.  ‘‘ఒక ఆర్థిక సంస్థ కార్యకలాపాలు, దాని పాలనా ప్రమాణాలు, వ్యాపార నమూనా, ఇబ్బందులను ఎదుర్కొనే సామర్థ్యం, ఈ విషయంలో ఇచ్చే హామీ వంటి అంశాలు... దీర్ఘకాలంలో ఆ సంస్థ ఎంత బాగా పనిచేస్తుందో నిర్ణయిస్తుంది‘ అని ఈ సందర్భంగా ఆయన అన్నారు.  

న్యూఢిల్లీ: కంపెనీల్లోని ఇండిపెండెంట్‌ డైరెక్టర్లకు స్వేచ్ఛ లేదని, ప్రమోటర్ల ప్రయోజనాలకే ఉపయోగపడుతున్నారని పలువురు ఇన్వెస్టర్లు అభిప్రాయపడుతున్నారు. ఆన్‌లైన్‌ ప్లాట్‌ఫార్మ్, లోకల్‌సర్కిల్స్‌ నిర్వహించిన కార్పొరేట్‌ గవర్నెన్స్‌ సర్వే 2020లో ఈ వివరాలు వెల్లడయ్యాయి. దేశవ్యాప్తంగా 272 జిల్లాల్లో ఉన్న వివిధ కేటగిరీల వాటాదారులపై నిర్వహించిన ఈ సర్వేలో వెల్లడైన ముఖ్యాంశాలు....   ► సర్వేలో పాల్గొన్న వారిలో 79 శాతం మంది ఇండిపెండెంట్‌ డైరెక్టర్ల స్వేచ్ఛపై ఆందోళన వ్యక్తం చేశారు.   ► మైనారిటీ వాటాదారుల ప్రయోజనాల పరిరక్షణ కోసం ఇండిపెండెంట్‌ డైరెక్టర్లు పనిచేస్తున్న దాఖలాలు లేవని 65 శాతం మంది అభిప్రాయపడ్డారు.    ► పలువురు ఇండిపెండెంట్‌ డైరెక్టర్లు తమ బాధ్యతలను నిర్వర్తించడం లేదు. అకౌంటింగ్‌ మోసాలను చూసీ చూడనట్లు వదిలేస్తున్నారని, వాటాదారులకు తెలియకుండానే కంపెనీ ఆస్తుల విక్రయానికి సహకరిస్తున్నారని, ఇన్‌సైడర్‌ ట్రేడింగ్‌కు పాల్పడుతున్నారని ఇండిపెండెంట్‌ డైరెక్టర్లపై అభియోగాలున్నాయి. ఈ సమస్యలను పరిష్కరించగలిగితే మరింత మంది షేర్లలో ఇన్వెస్ట్‌ చేయడానికి ముందుకు వస్తారు.   ► భారత కంపెనీల్లో కార్పొరేట్‌ గవర్నెన్స్‌ మెరుగుపడితే విదేశీ ఇన్వెస్టర్ల పెట్టుబడులు కూడా పెరుగుతాయి.

న్యూఢిల్లీ: కార్పొరేట్‌ పాలన విశ్వసనీయంగా ఉండే దిశగా ఇన్ఫోసిస్‌ సహ వ్యవస్థాపకుడు ఎన్‌ఆర్‌ నారాయణమూర్తి పలు సూచనలు చేశారు. తప్పిదాలకు పాల్పడిన బోర్డు సభ్యులు, అధికారులను సెబీ బ్లాక్‌ లిస్ట్‌ (నిషేధిత జాబితా)లో పెట్టాలని, అప్పటి వరకు వారికి చెల్లించిన పారితోషికాలను ముక్కు పిండి వసూలు చేయాలని అభిప్రాయపడ్డారు. పోటీ సంస్థలకు మేలు చేసే విధంగా లేకపోతే తప్ప.. ప్రజావేగులు చేసే ఫిర్యాదులపై దర్యాప్తు సమాచారాన్ని కూడా వాటాదారులకు అందించాలన్నారు. ఆల్‌ ఇండియా మేనేజ్‌మెంట్‌ అసోసియేషన్‌ ‘కార్పొరేట్‌ గవర్నెన్స్‌’పై నిర్వహించిన కార్యక్రమంలో మూర్తి పాల్గొని మాట్లాడారు. ‘‘ప్రజా వేగు ఫిర్యాదుపై విచారణలో భాగంగా కంపెనీ బోర్డు సభ్యులు, అధికారులు తమ విశ్వసనీయ విధులను సరిగ్గా న్విహించలేదని, పాలనా లోపం ఉన్నట్టు తేలితే రాజీనామా చేయాలని కోరాలి. ప్రజా వేగు ఫిర్యాదు అన్నది అసంతృప్త ఉద్యోగి నుంచి ప్రతీకార చర్య రూపంలో ఉండరాదు. తన ఫిర్యాదుకు ఆధారంగా అవసరమైన డేటా, వాస్తవాలను ఫిర్యాదిదారు అందించాల్సి ఉంటుంది. అదే సమయంలో ఫిర్యాదిదారుకు వేధింపుల్లేకుండా కంపెనీ సరైన రక్షణ కల్పించాలి’’ అని నారాయణమూర్తి తన అభిప్రాయాలను వినిపించారు.    పారదర్శకత అవసరం..‘‘ప్రజా వేగు ఫిర్యాదును పరిష్కరించే విధానం పారద్శకంగా, విశ్వసనీయతను పెంచే విధంగా ఉండడం తప్పనిసరి. ఒకవేళ ఫిర్యాదు మధ్య స్థాయి లేదా దిగువ స్థాయి ఉద్యోగికి వ్యతిరేకంగా వచ్చినట్టయితే.. ఆ ఉద్యోగితో సంబంధం లేని సీనియర్‌ ఉద్యోగులతో ఓ కమిటీని నియమించి విచారణ నిర్వహించాలి. ఒకవేళ బోర్డు సభ్యులు లేదా చైర్మన్‌ లేదా సీఈవోకు వ్యతిరేకంగా పిర్యాదు దాఖలైతే.. చాలా వరకు భారతీయ కంపెనీల బోర్డులు బయటి నుంచి ఓ న్యాయ సేవల సంస్థ సహకారంతో విచారణ చేసి అస్పష్టంగా ముగించేస్తున్నారు. కానీ ఇది మంచి ఆలోచన కాదు. ఎందుకంటే మీరు న్యాయమూర్తిగా వ్యవహరించకూడదు. అంతర్జాతీయంగా పేరున్న సంస్థలు ఇటువంటి ప్రజావేగు ఫిర్యాదులు వచ్చిన సందర్భాల్లో టాప్‌ టెన్‌ వాటాదారులు, సమాజంలో ఎంతో గౌరవనీయులైన వ్యక్తులను విచారణలో భాగం చేస్తున్నాయి’’ అంటూ నారాయణ మూర్తి కంపెనీల బోర్డులు, ఉద్యోగులకు వ్యతిరేకంగా వచ్చే ఫిర్యాదుల విచారణలో నిజాయితీ అవసరమని గుర్తు చేశారు.

ఎన్ని ఎదురు దెబ్బలు తింటున్నా మన దేశంలో కార్పొరేట్‌ గవర్నెన్స్‌ వ్యవస్థను చక్కదిద్దడానికి అవసరమైన చర్యలు తీసుకోవడంలో ప్రభుత్వాలు విఫలమవుతున్నాయని ఇన్‌ఫ్రాస్ట్రక్చర్‌ లీజింగ్‌ అండ్‌ ఫైనాన్షియల్‌ సర్వీసెస్‌(ఐఎల్‌ అండ్‌ ఎఫ్‌ఎస్‌) సంక్షోభం బట్టబయలు చేసింది. ఆ సంస్థ తీసుకున్న రూ. 91,000 కోట్ల మేర రుణాలకు అది కనీసం వడ్డీ కూడా కట్టలేని స్థితికి చేరుకున్నట్టు వెల్లడయ్యాక కేంద్ర ప్రభుత్వం స్పందించి దిద్దుబాటు చర్యలు ప్రారంభించింది. జాతీయ కంపెనీ లా బోర్డు అనుమతితో ఐఎల్‌ అండ్‌ ఎఫ్‌ఎస్, దాదాపు 160 వరకూ ఉన్న దాని అనుబంధ సంస్థల యాజమాన్య అధికారాలు స్వీకరించింది. పాత బోర్డును రద్దు చేసి కొటక్‌ మహీంద్రా బ్యాంకు ఎండీ ఉదయ్‌ కొటక్‌ సారథ్యంలో కొత్త బోర్డును నియమించింది. ఉన్నంతలో ఇప్పుడు ప్రభుత్వం ఇంతకుమించి చేయగలిగింది లేదు. మరో ఆరేడు నెలల్లో సార్వత్రిక ఎన్నికలకు సిద్ధపడబోయే ఏ ప్రభుత్వానికైనా ఇలాంటి సంక్షోభం ఒక దుర్వార్తే. ఎందుకంటే ఒక దిగ్గజ సంస్థ ఉన్నట్టుండి సంక్షోభంలో పడిందంటే అది దానికి మాత్రమే పరిమితమై ఉండదు. దాంట్లో పెట్టుబడులు పెట్టిన సంస్థలు, దానికి అప్పులిచ్చిన సంస్థలు, ఇతరత్రా లావాదేవీల్లో ఉన్న సంస్థలు ఒక్కసారిగా కుదేలవుతాయి. ఒక్కొక్కటే పేకమేడల్లా కూలుతాయి. స్టాక్‌ మార్కెట్‌పై దాని దుష్ప్రభావం పడుతుంది. ముఖ్యంగా విదేశాల్లో మన పరువు ప్రతిష్టలు దెబ్బతింటాయి. భవిష్యత్తులో పెట్టుబడులు పెట్టేందుకు ఏ విదేశీ సంస్థా ముందుకు రాదు. ఇది ఆర్థిక వ్యవస్థలో పెను సంక్షోభాన్ని తీసుకొస్తుంది. కనుకనే ఒక కార్పొరేట్‌ రంగ నిపుణుడన్నట్టు ఈ తాజా పరిణామం ‘మినీ లేమాన్‌ బ్రదర్స్‌ సంక్షోభం’. ప్రభుత్వం ఇప్పుడు తీసుకున్న చర్యల పర్యవసానంగా సంక్షోభం కాస్త సద్దుమణుగుతుంది. సంస్థ చేపట్టిన మౌలికరంగ ప్రాజెక్టులకు ఆటంకం కలగకుండా చూడటం, అది గట్టెక్కడానికి సంస్థ ఆస్తుల్ని విక్రయించటం, రుణాల పునర్వ్యవస్థీకరణ, కొత్తగా నిధులు సమకూర్చడం వగైరా చర్యలు తీసుకుంటామని ప్రభుత్వం హామీ ఇస్తోంది. ఆదరా బాదరాగా జనం సొమ్మును తరలించి సంక్షోభాన్ని నివారించేకంటే అసలు వాటిని మొగ్గలోనే తుంచేవిధంగా పటిష్టమైన వ్యవస్థల్ని నిర్మించటంలో మనం పదే పదే విఫలం కావటం విస్మయం కలిగిస్తుంది. మన దేశంలో కార్పొరేట్‌ కుంభకోణాలు కొత్తగాదు. అత్యద్భుతమైన పని తీరు ప్రదర్శిస్తున్నాయని కితాబులందుకున్న కంపెనీలు హఠాత్తుగా కళ్లు తేలేయడం, వాటి నిర్వాహకులు విదేశాలకు ఉడాయించడం తరచు జరుగుతూనే ఉంది. అవకతవకల్లో, అసమర్ధతల్లో ఆ సంస్థలు ప్రభుత్వ రంగ సంస్థల్ని మించిపోతున్నాయి. కార్పొరేట్‌ గవర్నెన్స్‌ పటిష్టంగా ఉంటే ఇలాంటి తెరచాటు బాగోతాలకు వీలుండదు. మౌలిక రంగ ప్రాజెక్టులకు దీర్ఘకాలిక రుణాలు అందించే అతి పెద్ద నాన్‌ బ్యాంకింగ్‌ ఫైనాన్స్‌ సంస్థ ఐఎల్‌ అండ్‌ ఎఫ్‌ఎస్‌. ఇందులో ప్రభుత్వ రంగ బీమా సంస్థ ఎల్‌ఐసీ అతి పెద్ద వాటాదారు. ఆ తర్వాత స్థానం జపాన్‌కు చెందిన ఓరిక్స్‌ కార్పొరేషన్‌ది. సంస్థ బోర్డులో ఈ వాటాదారులకు ప్రాతినిధ్యంవహించే డైరెక్టర్లుంటారు. సంస్థ అమలు చేసే ప్రతి విధానాన్ని బోర్డు ఖరారు చేస్తుంది. ఈ సంస్థ కార్యకలాపాలను, లావాదేవీలను నిరంతరం గమనిస్తూ దానికి రేటింగ్‌ ఇచ్చే క్రెడిట్‌ రేటింగ్‌ సంస్థలుంటాయి. కానీ ఇంతమంది కళ్లుగప్పి ఈ సంస్థ దివాళా స్థితికి ఎలా చేరుకుందన్న సందేహం ఎవరికైనా కలుగుతుంది. ఈ సంస్థలో ఎల్‌ఐసీ వాటా నాలుగోవంతుకు మించి...అంటే 25.3 శాతం ఉంది. బీమా రంగంలో అది దిగ్గజ సంస్థ.   చెల్లించాల్సిన రుణాల్ని సంస్థ ఎగవేసినప్పుడు తప్ప బయటివారికి అనుమానం రాదు. కానీ సంస్థ డైరెక్టర్లుగా ఉన్న నిపుణులకు పూర్తి అవగాహన ఉండాలి. ఉంటుంది. మరి సింహభాగం పెట్టుబడులు పెట్టిన ఎల్‌ఐసీ ఏం చేసినట్టు? మొన్న జూన్‌లో ఐఎల్‌ అండ్‌ ఎఫ్‌ఎస్‌కు చెందిన అనేక అనుబంధ సంస్థల్లో ఒక సంస్థ సకాలంలో రుణ చెల్లింపు చేయకపోవడంతో తొలిసారి బయటివారికి అనుమానాలు తలెత్తాయి. ఆ తర్వాత గ్రూపులోని ఇతర సంస్థలూ ఇదే రీతిలో ఉండటంతో.. మరీ ముఖ్యంగా గత నెల 14న ఆ సంస్థ కొన్ని రుణాలను తీర్చటంలో విఫలం కావడంతో వ్యవహారమంతా బట్టబయలైంది. పరిస్థితి ఇంతగా దిగజారే వరకూ బోర్డు డైరెక్టర్లు నిమ్మకు నీరెత్తినట్టు చేష్టలుడిగిపోవడం, రుణాలిస్తున్న సంస్థలైనా దీన్నంతటినీ గమనించలేకపోవటం, క్రెడిట్‌ రేటింగ్‌ సంస్థలు అత్యుత్తమ రేటింగ్‌లిస్తూ రావటం ఆశ్చర్యం కలిగిస్తుంది. ఈ మొత్తం వ్యవహారాన్ని సీరియస్‌ ఫ్రాడ్‌ ఇన్వెస్టిగేషన్‌ ఆఫీస్‌(ఎస్‌ఎఫ్‌ఐఓ)కు అప్పగించారు. మంచిదే. ఆ దర్యాప్తు సత్వరం పూర్తయి, ఇందులో ఎవరి జవాబుదారీతనం ఎంతో తేల్చాలి. మౌలిక సదుపాయాల రంగంలోని సంస్థలకు ఫైనాన్స్‌ చేయడంతోపాటు ఆ రంగంలో స్వయంగా ప్రాజెక్టులు చేపట్టే సంస్థలకు అడుగడుగునా ప్రమాదాలు పొంచి ఉండకతప్పదు. భూసేకరణ మొదలుకొని అనుకోని రీతిలో ఎదురయ్యే  సమస్యలతో భారీ ప్రాజెక్టుల పనులు ప్రారంభం కావడంలో జాప్యం చోటుచేసుకొనే అవకాశాలుంటాయి. దానికితోడు ప్రణాళికలు రూపొందించుకోవడంలో, మానవ వనరుల్ని సమీకరించుకోవడంలో విఫలమైనా ఇబ్బందులు తలెత్తుతాయి. పర్యవసానంగా ప్రాజెక్టు వ్యయం అపరిమితంగా పెరిగిపోతుంది. సంస్థ నష్టాల బారిన పడుతుంది. సకాలంలో చెల్లింపులు చేయడంలో విఫలమవుతుంది. అందువల్లే ఇలాంటి సంస్థల నిర్వహణ అత్యంత నిపుణులైనవారికి అప్పగిస్తారు. ఇప్పుడు ఐఎల్‌ అండ్‌ ఎఫ్‌ఎస్‌ సంస్థ బోర్డులోనూ ఆ స్థాయివారే ఉన్నారు. కానీ ఏం లాభం? ఎడాపెడా అప్పులు తెస్తూ సంస్థను నిర్వహించడం సరికాదని బోర్డుకు తెలియదు. వాటిని విశ్వసించి రుణాలివ్వడంకాక, సొంతంగా మదింపు వేయడం తమ బాధ్యతని బ్యాంకులకు తోచదు. ఇలాంటి పరిస్థితి ప్రమాదకరమైనది. ఈ తరహా సంక్షోభాలు ఇక తలెత్తనివిధంగా కనీసం ఇప్పటికైనా చర్యలు తీసుకోవటం తక్షణావసరం.  

న్యూఢిల్లీ: కార్పొరేట్‌ పరిపాలనను మరింత బలోపేతం చేసేందుకు కంపెనీలకు స్వతంత్ర డైరెక్టర్లు కాదలిచిన వారికి ఎంపిక పరీక్షలు నిర్వహించే ఆలోచన చేస్తున్నట్టు కేంద్ర కార్పొరేట్‌ శాఖ మంత్రి పీపీ చౌదరి తెలిపారు. నిజానికి కంపెనీల చట్టం 2013లో ఉత్తమ పరిపాలనకు గాను కఠిన నిబంధనలు ఉన్నప్పటికీ, ఇటీవలి కాలంలో కార్పొరేట్‌ అవకతవకల నేపథ్యంలో ఇండిపెండెంట్‌ డైరెక్టర్ల పాత్ర ప్రశ్నార్థకంగా మారింది. ఇక కార్పొరేట్‌ వ్యవహారాల్లో ప్రభుత్వం తన పాత్రను పరిమితం చేసుకోవాలనుకుంటున్న తరుణంలో ఇండిపెండెంట్‌ డైరెక్టర్ల పాత్ర మరింత కీలకంగా మారింది. దేశంలో కార్పొరేట్‌ పాలనను మరింత మెరుగుపరిచేందుకు ప్రభుత్వం కట్టుబడి ఉన్నట్టు పీపీ చౌదరి తెలిపారు. ఇందులో భాగంగా ఇండిపెండెంట్‌ డైరెక్టర్ల పాత్రను బలోపేతం చేయడం ఒక చర్యగా చెప్పారు. కంపెనీల బోర్డులో ఇండిపెండెంట్‌ డైరెక్టర్‌ అయ్యే వారికి తగిన అర్హతలు ఉండాలన్నారు. కనీస అర్హతకు తోడు, ఒక సర్టిఫికేషన్‌ కోర్స్‌/ పరీక్ష అనేదానిని పరిశీలిస్తున్నట్టు మంత్రి పేర్కొన్నారు. ఈ విషయమై తుది నిర్ణయం తీసుకునే ముందు కంపెనీలను సంప్రదిస్తామన్నారు. అయితే, కొత్తగా ఇండిపెండెంట్‌ డైరెక్టర్లు అవ్వాలనుకునే వారికే పరీక్ష నిర్వహణ ప్రతిపాదన అని, ప్రస్తుతమున్న వారికి కాదని స్పష్టం చేశారు. ప్రస్తుతమున్న వారికి అవగాహన కార్యక్రమాలు చేపడతామని చెప్పారు. ఇక, ప్రభుత్వం తీసుకొచ్చే సవరణలతో, ఇండిపెండెంట్‌ డైరెక్టర్ల డేటా బ్యాంకును ఏర్పాటు చేయడంతోపాటు, నిర్వహణ బాధ్యతలను ఐఐసీఏ ఏజెన్సీ చూస్తుందని మంత్రి చెప్పారు. ఇండిపెండెంట్‌ డైరెక్టర్లు కంపెనీల పాలన విధానాలను పర్యవేక్షిస్తూ, సలహాదారులుగా వ్యవహరిస్తుంటారు.  

సాక్షి, బెంగళూరు: వ్యవస్థాపకులకు, బోర్డుకు మధ్య ఉన్న విభేదాలను చక్కబెట్టడానికి వచ్చిన నందన్‌ నిలేకని ఎంపికపై ఆరోపణలు వెల్లువెత్తుతున్నాయి. ఇన్ఫోసిస్‌ చైర్మన్‌గా నందన్‌ నిలేకనిని నియమించే విషయంలో  కంపెనీ కార్పొరేట్ గవర్నెన్స్‌ ప్రమాణాను ఉల్లంఘించిందని అడ్వజరీ సంస్థ స్టేక్‌హోల్డర్స్‌ ఎంపవర్‌మెంట్‌ సర్వీసెస్‌(ఎస్‌ఈఎస్‌) ఆరోపించింది. కంపెనీ సీఈవో, ఎండీగా ఉన్న విశాల్‌ సిక్కా అకస్మాత్తుగా రాజీనామా చేయడంతో, అనంతరం తలెత్తిన పరిణామాల నేపథ్యంలో ఈ ఏడాది ఆగస్టులో నందన్‌ నిలేకని ఇన్ఫోసిస్‌లోకి పునరాగమనం చేశారు. సరియైన బోర్డు మీటింగ్‌ నిర్వహించకుండానే నిలేకని ఎంపిక జరిగిందని ఎస్‌ఈఎస్‌ పేర్కొంది. చైర్మన్‌గా ఎంపికైన నిలేకని, బోర్డు మీటింగ్‌లో పాల్గొన్నారని, అంటే ఆ నిర్ణయం ముందే తీసుకున్నారని ఎస్‌ఈఎస్‌ ఎండీ జెఎన్‌ గుప్తా అన్నారు.  బోర్డు రెండు విడత సమావేశంలో నిలేకని నియామకంపై ప్రకటన వచ్చిందని కంపెనీకి చెందిన వర్గాలు చెప్పాయి. తొలి విడత సమావేశం మాజీ చైర్మన్‌ ఆర్‌ శేషసాయి సమక్షంలోనే జరిగిందని పేర్కొన్నాయి. విశాల్‌ సిక్కా, మరో ఇద్దరు బోర్డు సభ్యలు జెఫ్రీ లెమాన్, జాన్ ఎట్‌చెమెండీ రాజీనామాలు ఆమోదించిన అనంతరం, నిలేకని ఇన్ఫీలో జాయిన్‌ అయ్యారు. అనంతరం శేషసాయి కూడా బోర్డు చైర్మన్‌గా తప్పుకున్నారు. కో-చైర్మన్‌ రవి వెంకటేషన్‌ కూడా రాజీనామా చేశారు. అయితే ఆయన బోర్డులో కొనసాగుతున్నట్టు పేర్కొన్నారు. ఈ తతంగమంతా రాజీ పద్ధతిలో  జరిగినట్టు ఎస్‌ఈఎస్‌ ఆరోపించింది. బోర్డు రూమ్‌ బయటనే ఇదంతా జరిగిందని పేర్కొంది. బయట తీసుకున్న నిర్ణయాలను, బోర్డు మీటింగ్‌లో వెల్లడించడం, కార్పొరేట్‌ గవర్నెర్స్‌ ప్రమాణాలకు విరుద్ధమని తెలిపింది. అయితే కార్పొరేట్‌ గవర్నెన్స్‌ విషయంలోనే ఇన్ఫోసిస్‌లో వివాదం చెలరేగడం గమనార్హం. 


 బెంగళూరు: ఇన్ఫోసిస్‌ వ్యవస్థాపకులు, మేనేజ్‌మెంట్‌ను ఒక్క తాటిపైకి తేవడం, విభేదాలు లేకుండా అంతా కలిసికట్టుగా పనిచేసేలా చూడటమే తన ప్రధాన లక్ష్యమని ఐటీ దిగ్గజం ఇన్ఫోసిస్‌ సహ చైర్మన్‌ రవి వెంకటేశన్‌ తెలిపారు. ఇది ’సాధ్యపడే’ విషయమేనని, తాను నాన్‌ ఎగ్జిక్యూటివ్‌ కో–చైర్మన్‌ అయినప్పటికీ వారంలో నాలుగైదు రోజులు దీనికే సమయం కేటాయిస్తున్నానని ఆయన వివరించారు. టాప్‌ మేనేజ్‌మెంట్‌ వ్యవహార శైలిపై ఇన్ఫీ ప్రమోటర్లు బాహాటంగానే అసంతృప్తి వ్యక్తం చేస్తున్న నేపథ్యంలో రవి వెంకటేశన్‌ వ్యాఖ్యలు ప్రాధాన్యం సంతరించుకున్నాయి.
 
  కంపెనీ గానీ ఐకమత్య స్ఫూర్తిని రగిల్చగలిగితే పరిస్థితులు వాటంతటవే సర్దుకోగలవని ఆయన తెలిపారు. కార్పొరేట్‌ గవర్నెన్స్‌ లోపాలు మొదలైన వాటిపై సహ వ్యవస్థాపకుడు నారాయణ మూర్తి స్థాయి వ్యక్తి మాట్లాడారంటే అంతా కచ్చితంగా దానిపై దృష్టి పెట్టాల్సిందేనని రవి చెప్పారు. మరోవైపు, ఇన్ఫీ నుంచి తాను తప్పుకోకుండా ఉండాల్సిందంటూ మూర్తి ఇటీవల బాధపడటంపై స్పందిస్తూ.. తాను వాటి గురించి మాట్లాడబోనని, దీనిపై వివరణనిచ్చేందుకు ఆయనే సరైన వ్యక్తి అని తెలిపారు. ప్రస్తుత సీఈవో విశాల్‌ సిక్కాను ఎంపిక చేసిందే నారాయణ మూరి అని రవి వివరించారు. సిక్కా అనేక సానుకూల మార్పులు తీసుకొచ్చారని, ఆయన ఐడియాలను ఉద్యోగులు, క్లయింట్లతో పాటు మూర్తి కూడా మెచ్చుకునే ఉంటారని భావిస్తున్నట్లు చెప్పారు.


 అభ్యంతరాలను వెనక్కితీసుకోలేదని తేల్చిచెప్పిన మూర్తి
 
 ♦  సిక్కా, మాజీ ఎగ్జిక్యూటివ్‌లకు ప్యాకేజీలు సరైనవే: చైర్మన్‌ శేషసాయి
 ♦  ప్రమోటర్లతో యుద్ధవాతావరం అంతా మీడియా సృష్టేనని వ్యాఖ్య
 ♦  మీడియా ‘డ్రామా’ కలవరపెడుతోందన్న సీఈఓ సిక్కా...
 ♦  వ్యవస్థాపకులతో సంబంధాలు అద్భుతంగా ఉన్నాయని వెల్లడి
 
 ముంబై/న్యూఢిల్లీ/బెంగళూరు: దేశీ ఐటీ దిగ్గజం ఇన్ఫోసిస్‌లో కార్పొరేట్‌ గవర్నెన్స్‌ చిచ్చు... సెగలు పుట్టిస్తోంది. కార్పొరేట్‌ నైతిక ప్రమాణాలు దిగజారాయంటూ స్వయంగా వ్యవస్థాపకులు బట్టబయలు చేసినప్పటికీ.. కంపెనీ సీఈఓ విశాల్‌ సిక్కా, బోర్డు సభ్యులు మాత్రం సమస్యే లేదన్న రీతిలో వ్యవహరిస్తుండటం వివాదాన్ని మరింత ముదిరేలా చేస్తోంది. అత్యవసరంగా సోమవారం మీడియా ముందుకు వచ్చిన కంపెనీ డైరెక్టర్ల బోర్డు మరోసారి తమ నిర్ణయాలను సమర్థించుకుంది. వ్యవస్థాపకులకు ప్రస్తుత యాజమాన్యానికి మధ్య ఎలాంటి యుద్ధ వాతావరణం లేదన్న ఇన్ఫీ చైర్మన్‌ ఆర్‌. శేషసాయి.. సిక్కాతో పాటు ఇద్దరు మాజీ సీనియర్లకు ఇచ్చిన ప్యాకేజీలు సమంజసమేనని తేల్చిచెప్పారు.
 
 అంతక్రితం ఇన్ఫీకి సంబంధించి మీడియా కథనాలను ‘డ్రామా’గా అభివర్ణించిన సీఈఓ సిక్కా.. ఇది తమను గందరగోళానికి, కలవరపాటుకు గురిచేస్తోందన్నారు. సోమవారం ముంబైలో జరిగిన కోటక్‌ ఇన్వెస్టర్ల సదస్సులో పాల్గొన్న సందర్భంగా ఆయన ఈ వ్యాఖ్యలు చేశారు. మరోపక్క, కార్పొరేట్‌ గవర్నెన్స్‌ లోపాలను పరిష్కరించాల్సిందేనని.. తన అభ్యంతరాలను వెనక్కితీసుకోలేదని కంపెనీ కీలక వ్యవస్థాపకుల్లో ఒకరైన నారాయణ మూర్తి స్పష్టం చేయడం గమనార్హం.
 
 అప్పగించిన బాధ్యతలు నిర్వర్తిస్తున్నా..
 సీఈవో విశాల్‌ సిక్కా వేతన పెంపు, మాజీ ఎగ్జిక్యూటివ్‌లకు భారీ ప్యాకేజీలనుఇన్ఫీ చైర్మన్‌ ఆర్‌ శేషసాయి సమర్థించుకున్నారు. బోర్డు తనకి అప్పగించిన బాధ్యతలే నిర్వర్తిస్తున్నట్లు వ్యాఖ్యానించారు. ‘షేర్‌హోల్డర్లు, బోర్డు నాకో పని అప్పగించారు. వారికి అభ్యంతరం లేనంత వరకూ నాకు అప్పగించిన బాధ్యతలను నిర్వర్తిస్తూనే ఉంటాను’ అని పేర్కొన్నారు. ప్రొఫెషనల్స్‌ సారథ్యంలోనే ఇన్ఫోసిస్‌ నడుస్తోందన్నారు. సిక్కా వేతనాన్ని 7.08 మిలియన్‌ డాలర్ల నుంచి 11 మిలియన్‌ డాలర్లకు పెంచినప్పటికీ.. అత్యధిక స్థాయి లక్ష్యాలను సాధిస్తేనే ఆయనకు ఈ మొత్తం దక్కుతుందని శేషసాయి చెప్పారు. పైగా ఈ ప్యాకేజీలో స్థిరంగా చెల్లించే భాగాన్ని 5.08 మిలియన్‌ డాలర్ల నుంచి 4 మిలియన్‌ డాలర్లకు తగ్గించినట్లు వివరించారు. ఇక కీలకమైన రహస్యాలను బైట పెట్టకుండా ఉండేందుకే మాజీ సీఎఫ్‌వో రాజీవ్‌ బన్సల్, జనరల్‌ కౌన్సిల్‌ డేవిడ్‌ కెనెడీలకు భారీ ప్యాకేజీ ఇచ్చారన్న మూర్తి ఆరోపణలపై స్పందిస్తూ.. ఇలాంటి ’అనుమానం తలెత్తడం.. తీవ్రంగా కలిచివేసే’ అంశమని శేషసాయి చెప్పారు. బన్సల్‌ చాలా చురుకైన సహోద్యోగి అని పేర్కొన్నారు. అయితే, టీమ్‌తో సఖ్యత విషయంలో సమస్యలు తలెత్తిన నేపథ్యంలో ఆయన నిష్క్రమణ ఇరు పక్షాలకు ఆమోదయోగ్యమైన విధంగానే జరిగిందని చెప్పారు. బన్సల్‌ తన బాధ్యతలను చిత్తశుద్ధితో నిర్వర్తించారని శేషసాయి కితాబిచ్చారు. వాస్తవానికి బన్సల్‌కి రూ. 17 కోట్లు చెల్లించేందుకు ఒప్పందం కుదిరినా కూడా అంతిమంగా రూ. 5 కోట్లే చెల్లించడం జరిగిందన్నారు.
 
 అందరి లక్ష్యం కంపెనీ శ్రేయస్సే ..
 సహవ్యవస్థాపకులు లేవనెత్తిన అంశాలపై స్పందిస్తూ.. ’వాటాదారులు, వ్యవస్థాపకుల మనసుల్లో కంపెనీ శ్రేయస్సు కోసం తపనే తప్ప మరో అంశం లేదు. వారి అభిప్రాయాలు తెలుసుకోవడం, అర్ధం చేసుకోవడం, తదనుగుణంగా తగు చర్యలు తీసుకోవడం మా విధి’ అని శేషసాయి పేర్కొన్నారు. ఈ విషయంలో ఎవరికీ స్వార్ధప్రయోజనాలు లేవని .. సంస్థ శ్రేయస్సే అందరి లక్ష్యమని చెప్పారు. యుద్ధవాతావరణం అంతా కూడా మీడియా సృష్టే తప్ప.. అలాంటి పరిస్థితేమీ లేదన్నారు. స్వతంత్ర డైరెక్టర్లు డీఎన్‌ ప్రహ్లాద్, పునీత కుమార్‌ సిన్హా నియామకాలు వారి అర్హతల ఆధారంగానే జరిగాయని చెప్పారు. ఇక న్యాయవాద సంస్థ సిరిల్‌ అమర్‌చంద్‌ మంగళదాస్‌ నియామకం.. గవర్నెన్స్‌పై మార్గదర్శకత్వం కోసమే తప్ప మధ్యవర్తిత్వం కోసం కాదని స్పష్టం చేశారు.
 
 సిక్కాకు బాసట..
 పోస్టల్‌ బ్యాలట్‌ ద్వారా అత్యధిక సంఖ్యలో వాటాదారుల ఆమోదం మేరకే విశాల్‌ సిక్కా వేతనాన్ని సవరించినట్లు శేషసాయి చెప్పారు. కుటుంబంతో కలిసి ప్రయాణాలకు సిక్కా కార్పొరేట్‌ జెట్‌ ఉపయోగించేవారని, ఆ బిల్లులను కంపెనీ ఖాతాలో వేసేవారని వచ్చిన ఆరోపణలను ఆయన ఖండించారు. ఇన్ఫోసిస్‌కు కార్పొరేట్‌ జెట్‌ లేనే లేదన్నారు. ‘గడచిన కొద్ది నెలల్లో విశాల్‌ సిక్కా ప్రయాణాల్లో ఎనిమిది శాతం మాత్రమే చార్టర్డ్‌ జెట్స్‌ ద్వారా జరిగాయి’ అని శేషసాయి చెప్పారు. ఇకనైనా వివాదాలను పక్కన పెట్టి తాము కంపెనీని నడపడంపైనే దృష్టి సారించేందుకు వాటాదారులు సహకరించాలని కోరారు.
 
 ఇన్ఫీ వివరణ నిరాశపర్చింది: బాలకృష్ణన్‌
 తాజా పరిణామాలపై ఇన్ఫోసిస్‌ వివరణ తనను నిరాశపర్చిందని కంపెనీ మాజీ సీఎఫ్‌వో వి.బాలకృష్ణన్‌ వ్యాఖ్యానించారు. సీఈవో జీతభత్యాల పెంపు, మాజీ ఎగ్జిక్యూటివ్‌లకు భారీ ప్యాకేజీల విషయంపై ‘నిర్దిష్ట సమాధానాలు’ ఇవ్వలేదని పేర్కొన్నారు.
 
 నేను వెనక్కితగ్గను: మూర్తి
 బోర్డుతో రాజీకి వచ్చినట్లు వచ్చిన వార్తలను మూర్తి ఖండించారు. తన అభ్యంతరాలపై వెనక్కితగ్గలేదని స్పష్టం చేశారు. ‘కార్పొరేట్‌ నైతిక ప్రమాణాల్లో లోపాలపై నేను లేవనెత్తిన ఆందోళనళలను బోర్డు తగినవిధంగా పరిష్కరించాల్సిందే. నిర్ణయాల్లో పూర్తి పారదర్శకత ఉందన్న భరోసా కల్పించాలి. తాజా ఉదంతానికి(ఇష్టానుసారంగా ప్యాకేజీలివ్వడం) కారకులైన వారిపై చర్యలు తీసుకోవాలి’ అని మూర్తి తేల్చిచెప్పారు. కాగా, ఇన్ఫీ బోర్డు నిజాయితీపై అడిగిన ప్రశ్నకు.. నేరుగా సమాధానం ఇవ్వలేదు. ‘వాళ్లంతా(బోర్డు సభ్యులు) మంచి పరిణితి, భావాలు ఉన్న వ్యక్తులే. అయితే, మంచివాళ్లు కూడా కొన్నిసార్లు తప్పులు చేస్తారు. వాటాదారుల ఆందోళనలను పూర్తిగా వినడం, అవసరమైతే నిర్ణయాలను పునఃపరిశీలిం చడం, తగిన దిద్దుబాటు చర్యలు చేపట్టడం.. ఇవన్నీ మంచి నాయకత్వ లక్షణాలు. కంపెనీ ఉజ్వల భవిష్యత్తును దృష్టిలో పెట్టుకొని వాళ్లు(బోర్డు) కార్పొరేట్‌ గవర్నెన్స్‌ను మెరుగుపరిచేవిధంగా తగిన దిద్దుబాటు చర్యలు చేపడతారని ఆశిస్తున్నా’ అని మూర్తి స్పష్టం చేశారు.
 
 ఇంత గొప్ప కంపెనీకి సారథ్యం నా అదృష్టం: సిక్కా
  ఇన్ఫీలో తాజా పరిరిణామాలపై సిక్కా తొలిసారిగా సోమవారం మీడియాతో మాట్లాడారు. ‘మీడియాలో ఇప్పుడు నడుస్తున్న ఈ డ్రామా చాలా గందరగోళానికి గురిచేస్తోంది. అయితే, ఎంతగా మమ్మల్ని కలవరపెట్టినా కంపెనీ అత్యంత పటిష్టమైన మూలాలపై నిలబడిందన్నది మాత్రం మర్చిపోవద్దు. అంతేకాదు ఇంతగొప్ప సంస్థకు సారథిగా ఉండటం నిజంగా నా అదృష్టం’ అని సిక్కా పేర్కొన్నారు.
 
 వ్యవస్థాపకులతో సత్సంబంధాలే...
 ఇన్ఫీ వ్యవస్థాపకులతో తన సంబంధాలు అద్భుతంగా ఉన్నాయని సిక్కా స్పష్టం చేశారు. ‘మూర్తిని క్రమం తప్పకుండా కలుస్తూనే ఉంటా. ఏడాదిలో సుమారు ఐదారుసార్లు కలిశా. ఆయనతో నాకు అత్యంత సుహృద్భావమైన సంబంధాలు ఉన్నాయి. అయితే, ఇతర వ్యవస్థాపకులను మాత్రం ఇంత తరచూ కలవడడం లేదు’ అని ఆయన పేర్కొన్నారు. కాగా, సిక్కా బోర్డుతో కార్పొరేట్‌ గవర్నెన్స్‌కు సంబంధించిన పోరును మూర్తి ఇంతటితో ముగిస్తున్నట్లు మీడియాలో సోమవారం తొలుత వార్తలు వచ్చాయి. ఈ నేపథ్యంలో సిక్కా అంతా సజావుగానే ఉందన్న రీతిలో వ్యాఖ్యలు చేశారు. నారాయణ మూర్తిని ఒక ‘అత్యత్భుతమైన వ్యక్తి’ అంటూ సిక్కా పేర్కొనడం విశేషం. కాగా, భారీ నగదు నిల్వల సద్వినియోగంపై కొందరు మాజీ సీనియర్‌ ఎగ్జిక్యూటివ్‌లు లేవనెత్తిన ప్రశ్నల గురించి స్పందిస్తూ... నిధుల కేటాయింపులపై కంపెనీ బోర్డు ఎప్పుటికప్పుడు మదింపు చేస్తుందని.. తగిన సమయంలో దీనిపై నిర్ణయం తీసుకుంటామని సిక్కా చెప్పారు.
 
 ఏం జరిగిందంటే..
 ♦ సీఈఓ విశాల్‌ సిక్కా వార్షిక వేతన ప్యాకేజీని(స్టాక్‌ ఆప్షన్స్, పనితీరు ఆధారిత వేతనం ఇతరత్రా అన్నీ కలిపి) ఈ ఏడాది నుంచి 11 మిలియన్‌ డాలర్లకు పెంచేందుకు ఇన్ఫోసిస్‌ బోర్డు గతంలో ఆమోదం తెలిపింది.
 
 ♦ దీంతో పాటు ఇన్ఫీ నుంచి వైదొలగిన మాజీ సీఎఫ్‌ఓ రాజీవ్‌ బన్సల్‌కు భారీ మొత్తంలో వీడ్కోలు ప్యాకేజీ(దాదాపు అన్నీ కలిపి రూ.23 కోట్లు), అదేవిధంగా మరో సీనియర్‌ ఎగ్జిక్యూటివ్‌(జనరల్‌ కౌన్సిల్‌) డేవిడ్‌ కెన్నడీకి రూ.5.85 కోట్ల రాజీనామా ప్యాకేజీని ఇవ్వడానికి బోర్డు ఓకే చెప్పింది.
 
 ♦ ఇక్కడే గొడవంతా మొదలైంది. ఇంత భారీగా ప్యాకేజీలను ఇవ్వడంపై కీలక వ్యవస్థాకులైన నారాయణ మూర్తి, నందన్‌ నీలేకని, క్రిస్‌ గోపాలకృష్ణన్‌లు తీవ్ర అభ్యంతరం లేవనెత్తారు. దీన్ని వ్యతిరేకిస్తూ బోర్డుకు లేఖ కూడా రాశారు.
 
 ♦ అలాంటి లోపాలేవీ లేవని, అవన్నీ వదంతులేనంటూ సీఈఓ సిక్కా, ఇతర బోర్డు సభ్యులు గతవారంలో వివరణ ఇచ్చారు.
 
 ♦ అయితే, కార్పొరేట్‌ ప్రమాణాలు గత రెండేళ్లుగా పడిపోతూవస్తున్నాయని  నారాయణ మూర్తి స్వయంగా పేర్కొనడంతో విభేదాలు నిజమేనని బట్టబయలైంది. బోర్డును ప్రక్షాళన చేయాలని కూడా చెప్పడంతో ప్రస్తుత నాయకత్వంపై వ్యవస్థాపకులు తీవ్ర అసంతృప్తితో ఉన్నట్లు స్పష్టమైంది.
 
 ♦ కంపెనీలో వ్యవస్థాపకులకు ప్రస్తుతం దాదాపు 13% వాటా ఉంది. ఇప్పుడున్న కంపెనీ మార్కెట్‌ విలువ(రూ.2,25,905 కోట్లు) ప్రకారం చూస్తే.. వ్యవస్థాపకుల వాటా విలువ దాదాపు రూ.30 వేల కోట్లు కావడం గమనార్హం.


 బెంగళూరు : ఇన్ఫోసిస్ ఫౌండర్ చైర్మన్ నారాయణమూర్తి మళ్లీ బాంబు పేల్చారు. ఇన్ఫోసిస్లో నెలకొన్న సంక్షోభానికి ఇక ఫుల్ స్టాప్ పెట్టేందుకు బోర్డుతో మూర్తి సంధికి వచ్చినట్టు వస్తున్న రిపోర్టులను ఆయన ఖండించారు. తను లేవనెత్తిన ఆందోళనలపై వెనక్కి తగ్గేది లేదని మూర్తి ఉద్ఘాటించారు. ఇన్ఫోసిస్ సంక్షోభానికి ఫుల్ స్టాప్ చెబుదామనుకున్న మూర్తి, బోర్డుతో సంధికి వచ్చారని పలు రిపోర్టులు వచ్చాయి. బోర్డు సభ్యులు  కంపెనీ సమస్యలను, ఆందోళలను సరియైన రీతిలో పరిష్కరించాల్సిందేనని, వారు మంచి పారదర్శకతను అందించాలని ఇన్ఫోసిస్ ఫౌండర్ చెప్పారు.
  
 వారందరూ ఎంతో సమగ్రత కలిగి మంచి  ఉద్దేశ్యమున్న సభ్యులు, కానీ మంచి వ్యక్తులు కూడా ఏదో ఒక సందర్భంలో తప్పుచేస్తారని పేర్కొన్నారు. ఇలాంటి వాటిలో ఇదీ ఒకటి. మంచి నాయకత్వమంటే షేర్ హోల్డర్స్ ఆందోళనలన్నింటిన్నీ విని, సరియైన నిర్ణయం తీసుకోవాలని హితవు పలికారు.  దీనిపై బోర్డు సభ్యులు త్వరలో నిర్ణయం తీసుకుని కార్పొరేట్ పాలన మెరుగుపరిచి కంపెనీ భవిష్యత్ మంచిగా తీర్చిదిద్దుతారని ఆశిస్తున్నట్టు చెప్పారు.  కానీ తాను లేవనెత్తిన ఆందోళనలపై మాత్రం సరియైన నిర్ణయం తీసుకునేంత వరకు వెనక్కి తగ్గేది లేదన్నారు.  (చదవండి: ఇన్ఫీలో లుకలుకలకు ఫుల్ స్టాప్?)
  


 కార్పొరేట్‌ గవర్నెన్స్‌ దిగజారిందన్న మూర్తి వ్యాఖ్యలతో రంగంలోకి...
 పరిణామాలను నిశితంగా గమనిస్తున్నట్లు వెల్లడి
 నేడు సంస్థాగత ఇన్వెస్టర్లతో సీఈఓ విశాల్‌ సిక్కా భేటీ  
 
 న్యూఢిల్లీ: ఇన్ఫోసిస్‌లో కార్పొరేట్‌ గవర్నెన్స్‌ చిచ్చు అంతకంతకూ తీవ్రతరం అవుతోంది. వ్యవస్థాపకులు, కంపెనీ డైరెక్టర్ల బోర్డుకు మధ్య నెలకొన్న విభేదాలు ఇన్వెస్టర్లలో కలకలం రేపుతున్నాయి. కంపెనీలో కార్పొరేట్‌ నైతిక ప్రమాణాలు దిగజారాయంటూ స్వయంగా కీలక వ్యవస్థాపకుల్లో ఒకరైన నారాయణ మూర్తి బహిరంగంగా ప్రకటించిన నేపథ్యంలో క్యాపిటల్‌ మార్కెట్‌ నియంత్రణ సంస్థ సెబీ రంగంలోకి దిగింది. ఇన్ఫీలో జరుగుతున్న పరిణామాలను నిశితంగా పరిశీలిస్తోంది. చిన్న ఇన్వెస్టర్ల ప్రయోజనాలను పరిరక్షించేందుకు ఈ ఉదంతంపై ప్రత్యేకంగా దృష్టి సారించినట్లు సంబంధిత వర్గాలు పేర్కొన్నాయి.
 
  టాటా గ్రూప్‌తో పాటు యునైటెడ్‌ స్పిరిట్స్, రికో ఇండియా వంటి కంపెనీల్లో కార్పొరేట్‌ గవర్నెన్స్‌ లోపాలు వెలుగుచూసిన తర్వాత మరో కీలక దేశీ కంపెనీలో ఇలాంటి ఉదంతం చోటుచేసుకోవడంతో సెబీ సీరియస్‌గా తీసుకున్నట్లు సమాచారం. ‘ఇన్ఫీ పరిణామాలపై మీడియాలో వచ్చిన పలు కథనాలను పరిగణనలోకి తీసుకొని... ఇప్పటికే స్టాక్‌ ఎక్సే్ఛంజీల నుంచి వివరణ కోరాం. కార్పొరేట్‌ గవర్నెన్స్‌ లోపాలకు సంబంధించి ఇటీవలి కాలంలో పలు దిగ్గజ కంపెనీల్లో జరుగుతున్న పరిణామాలు ఆందోళన కలిగిస్తున్నాయి. వీటిన్నింటిపైనా మేం నిశితంగా దృష్టిసారిస్తున్నాం. ముఖ్యంగా చిన్న ఇన్వెస్టర్లతో పాటు సంస్థాగత ఇన్వెస్టర్ల ప్రయోజనాలనూ పరిరక్షించడం మా విధి’ అని సెబీ ఉన్నతాధికారి ఒకరు పేర్కొన్నారు.
 
 సీఈఓ విశాల్‌ సిక్కా వేతన ప్యాకేజీని భారీగా పెంచడంతో పాటు మరో ఇద్దరు మాజీ సీనియర్‌ ఎగ్జిక్యూటివ్‌లకు పెద్దమొత్తంలో వీడ్కోలు ప్యాకేజీలను ఆఫర్‌ చేయడంపై వ్యవస్థాపకులు తీవ్ర అభ్యంతరం వ్యక్తం చేసినట్లు వార్తలొచ్చాయి. కార్పొరేట్‌ ప్రమాణాలు దిగజారాయంటూ బోర్డుకు వారు లేఖ కూడా రాసినట్లు మీడియాలో గుప్పుమంది. అలాంటి లోపాలేవీ లేవని, అవన్నీ వదంతులే నంటూ సీఈఓ సిక్కా, ఇతర బోర్డు సభ్యులు వివరణ ఇచ్చుకున్నారు. అయితే, నారాయణ మూర్తి స్వయంగా కార్పొరేట్‌ ప్రమాణాలు గత రెండేళ్లుగా పడిపోతూవస్తున్నాయని ఇంటర్వూ్యల్లో పేర్కొనడంతో విభేదాలు నిజమేనని తేటతెల్లమైంది. బోర్డును ప్రక్షాళన చేయాలని కూడా ఆయన చెప్పారు. దీంతో ప్రస్తుత నాయకత్వ బృందంపై వ్యవస్థాపకులు తీవ్ర అసంతృప్తితో ఉన్నట్లు స్పష్టమైంది. మరోపక్క, కంపెనీ మాజీ ఎగ్జిక్యూటివ్‌లు కూడా ఇటీవలి పరిణామాలపై(భా రీగా ప్యాకేజీలు ఇవ్వడంపట్ల) ప్రశ్నలు లేవనెత్తుండటం తెలిసిందే.
 
 అవసరమైతే కంపెనీ నుంచి నేరుగా వివరణ...
 అత్యంత ప్రొఫెషనల్‌గా నిర్వహించే కంపెనీల జాబితాలో ఉన్న ఇలాంటి కంపెనీలు విదేశీ ఇన్వెస్టర్లను ఆకర్షించడంలో ముందుంటాయని.. ఇప్పుడు ఇలాంటి ప్రతికూల పరిణామాలు చోటుచేసుకోవడం వల్ల పెట్టుబడులకు సానుకూల గమ్యంగా భారత్‌ సంపాదించుకున్న పేరుప్రఖ్యాతులు దెబ్బతింటాయని సెబీ అధికారి వ్యాఖ్యానించారు. ఇన్ఫోసిస్‌ స్టాక్‌ ఎక్సే్ఛంజీలకు ఇచ్చిన వివరణను పరిశీలిస్తామని.. అవసరమైతే కంపెనీ నుంచే నేరుగా తాము వివరణ కోరనున్నట్లు ఆయన చెప్పారు. తాము ప్రత్యక్షంగా ఈ విషయంలో జోక్యం చేసుకునే ముందు తటస్థ అడ్వయిజరీ సంస్థలతో పాటు వివిధ సంస్థాగత ఇన్వెస్టర్ల అభిప్రాయాలను కూడా పరిగణనలోకి తీసుకుంటామని తెలిపారు.
 
 ఇన్వెస్టర్లతో సిక్కా సమావేశం నేడు...
 వ్యవస్థాపకులకు, బోర్డుకు మధ్య విభేదాలు బట్టబయలు అయిన నేపథ్యంలో నష్టనివారణ చర్యలపై ఇన్ఫీ సీఈఓ విశాల్‌ సిక్కా దృష్టిసారిస్తున్నారు. నేడు ముంబైలో జరగనున్న ఒక కార్యక్రమం సందర్భంగా ఆయన సంస్థాగత ఇన్వెస్టర్లతో సమావేశం కానున్నట్లు సమాచారం. కోటక్‌ ఇనిస్టిట్యూషనల్‌ ఈక్విటీస్‌ నిర్వహిస్తున్న ‘ఛేజింగ్‌ గ్రోత్‌ కాన్ఫరెన్స్‌’లో సోమవారం సిక్కా కీలకోపన్యాసం చేయనున్నారు. ఈ కార్యక్రమంలో పాల్గొనే ఫండ్‌ మేనేజర్లకు ఇన్ఫీలో తాజా పరిణామాలను వివరించే అవకాశం ఉంది.
 
 కాగా, ఈ సదస్సులో సిక్కా పాల్గొనడంపై చాలా రోజుల ముందే(ఇటీవల కంపెనీకి సంబంధించి చోటుచేసుకున్న పరిణామాలకు ముందే) ఖరారైందని ఇన్ఫీ ప్రతినిధి పేర్కొన్నారు. అయితే, నేడు జరిగే సమావేశంలో వ్యవస్థాపకులు, బోర్డుకు మధ్య విభేదాలే ఎక్కువగా చర్చనీయాంశం అయ్యే అవకాశం ఉందని పరిశీలకులు చెబుతున్నారు. కాగా, వ్యవస్థాపకులు లేవనెత్తిన అభ్యంతరాలపై సిక్కాతో పాటు కొందరు బోర్డు సభ్యులు సోమవారం మీడియా ముందు వివరణ ఇవ్వనున్నట్లు సమాచారం.
 
 ఇన్వెస్టర్లు నిలదీయాలి: పాయ్‌
 ఇన్ఫోసిస్‌ వద్దనున్న భారీ నగదు నిల్వల సద్వినియోగం, కార్పొరేట్‌ ప్రమాణాల్లో లోపాలకు సంబంధించి సంస్థాగత ఇన్వెస్టర్లు ప్రశ్నించాలని కంపెనీ మాజీ చీఫ్‌ ఫైనాన్షియల్‌ ఆఫీసర్‌(సీఎఫ్‌ఓ) మోహన్‌దాస్‌ పాయ్‌ పేర్కొన్నారు. ‘కంపెనీలో నిధుల కేటాయింపులు చాలా ముఖ్యం. పెట్టుబడులను పరిరక్షించుకోవడం కోసం సంస్థాగత ఇన్వెస్టర్లు తప్పకుండా దీన్ని ప్రశ్నించాలి. అది వాళ్ల విధి.
 
  మరోపక్క, కార్పొరేట్‌ ప్రమాణాలు దిగజారడంపైనా నిలదీయాలి. ఎందుకంటే ఇది కంపెనీ ప్రతిష్టను దెబ్బతీస్తుంది’ అని పాయ్‌ పేర్కొన్నారు. 2016 డిసెంబర్‌ చివరినాటికి ఇన్ఫీ వద్ద రూ.35,697 కోట్ల నగదు నిల్వలు ఉన్నాయి. కంపెనీ షేర్ల బైబ్యాక్‌ను ప్రకటించాలంటూ పాయ్‌ ఎప్పటినుంచో సూచిస్తున్న సంగతి తెలిసిందే. కాగా, ఇన్ఫీలో 13 శాతం మేర వాటా ఉన్న వ్యవస్థాపకులు ఇతర ఇన్వెస్టర్ల మాదిరిగానే బోర్డును ప్రశ్నించారని.. ఆ అధికారం వారికుందని పాయ్‌ వ్యాఖ్యానించారు. వారు లేవనెత్తిన అభ్యంతరాలపై బోర్డు సవివరంగా వివరణ ఇవ్వాలని చెప్పారు.


 బెంగళూరు: ఐటీ దిగ్గజం ఇన్ఫోసిస్లో నెలకొన్న పరిణామాలు మరింత ముదురుతున్నాయి. కార్పొరేట్ గవర్నెన్స్ దారుణంగా పడిపోవడానికి బాధ్యత వహిస్తూ ఇన్ఫోసిస్ చైర్మన్  తప్పనిసరిగా రాజీనామా చేయాలని డిమాండ్లు వస్తున్నాయి. తాత్కాలిక చైర్మన్ తాజా పరిమాణాలపై షేర్హోల్డర్స్తో భేటీ అవ్వాలని, ప్రస్తుత చైర్మన్  ఆర్. శేషాసాయి తన పదవి నుంచి తప్పుకోవాలని  కంపెనీ మాజీ చీఫ్ ఫైనాన్సియల్ ఆఫీసర్(సీఎఫ్ఓ) బాలక్రిష్ణన్ డిమాండ్ చేశారు.  '' గతంలో కంపెనీలో జరిగిన అన్ని లోపాలకు బాధ్యత వహిస్తూ శేషాసాయి చైర్మన్ పదవి నుంచి దిగిపోవాలి. బోర్డు తాత్కాలిక చైర్మన్ను ఎన్నుకోవాలి. ఈ సమస్యలను పరిష్కరించుకోవాలి. ఇదే సరియైన పని'' అని వీ. బాలక్రిష్ణన్ ఓ టీవీ ఛానెల్కు ఇచ్చిన ఇంటర్వ్యూలో పేర్కొన్నారు.
  
 బోర్డు సభ్యులు, చైర్మన్ తప్పనిసరిగా వీటికి బాధ్యత వహించాల్సిందేనన్నారు. ఇది  ఇన్ఫోసిస్ సీఈవో విశాల్ సిక్కా, వ్యవస్థాపకులకు సంబంధించిన అంశం కాదని, ఇవి బోర్డుకు సంబంధించిందని స్పష్టీకరించారు. కార్పొరేట్ గవర్నెన్స్లో నెలకొన్న పరిస్థితులపై ఎప్పడికప్పుడూ వ్యవస్థాపకులు బోర్డును హెచ్చరిస్తూనే ఉన్నారని, అయితే వారే ఎలాంటి చర్యలు చేపట్టలేదని వెల్లడించారు. అయితే ఈ విషయంలో విశాల్ సిక్కాను కూడా తప్పుబట్టారు. ఆయన కూడా ఓ బోర్డు సభ్యుడేనని పేర్కొన్నారు.  అందరూ కలిసే దీనికి బాధ్యత వహించాలన్నారు.
  
 గత ఏడాదికాలంగా విలువలు, పారదర‍్శకత, కార్పొరేట్ పాలన(గవర్నెన్స్‌)పై ఇన్ఫోసిస్లో ఆందోళనలు చెలరేగినప్పటికి  ఫిబ్రవరి 8,9 తేదీల్లో ఇవి మరింతై వెలుగులో వచ్చాయి. సిక్కా వేతనం పెంపు, మరో ఇద్దరు మాజీ సీనియర్‌ ఎగ్జిక్యూటివ్‌లకు భారీ వీడ్కోలు ప్యాకేజీలను ఆఫర్‌ చేయడంపై ఇన్ఫీ వ్యవస్థాపకులు తీవ్ర అభ్యంతరం వ్యక్తం చేస్తూ కంపెనీ బోర్డుకు లేఖ రాసినట్లు వార్తలు గుప్పుమనడంతో ఇన్ఫోసిస్లో తలెత్తిన వివాదాలు తెరపైకి వచ్చాయి. కానీ ఇవి సిక్కా వేతనానికి సంబంధించినవి కావని, కార్పొరేట్ గవర్నెన్స్కు సంబంధించిందని కంపెనీ వ్యవస్థాపకులు నారాయణమూర్తి స్పష్టంచేశారు.
  
  


 అనంతపురం: ముఖ్యమంత్రి చంద్రబాబు నాయుడుకు ప్రజాస్వామ్యంపై విశ్వాసం లేదని మాజీ ఎమ్మెల్సీ శివరామిరెడ్డి ధ్వజమెత్తారు. ఎమ్మెల్సీ ఎన్నికల్లో చంద్రబాబు అధికార దుర్వినియోగానికి పాల్పడుతున్నారని ఆయన అరోపించారు. ఓట్లు నమోదుచేయిస్తేనే ప్రాక్టికల్స్‌లో మార్కులంటూ.. చైతన్య, నారయణ కాలేజీలు విద్యార్థులను మభ్యపెడుతున్నాయని, చంద్రబాబుది కార్పొరేట్ పాలన అని విమర్శించారు.


 ఐసీఎస్‌ఐ ప్రతిపాదన
 హైదరాబాద్, బిజినెస్ బ్యూరో : వ్యాపారాల నిర్వహణను సరళతరం చేసే విధంగా.. అంతర్జాతీయ స్థాయిలో కంపెనీలన్నింటికి ఒకే తరహా కార్పొరేట్ గవర్నెన్స్ నియమావళి అమల్లోకి తెచ్చే దిశగా ఇన్‌స్టిట్యూట్ ఆఫ్ కంపెనీ సెక్రటరీస్ ఆఫ్ ఇండియా (ఐసీఎస్‌ఐ) కసరత్తు చేస్తోంది. దీంతో పాటు ఇంటర్నేషనల్ కార్పొరేట్ గవర్నెన్స్ డే ప్రతిపాదనకు కూడా ఇతర దేశాల మద్దతు కూడగట్టేలా ఐక్యరాజ్యసమితితో కూడా త్వరలో చర్చలు జరపనున్నట్లు మంగళవారమిక్కడ ఒక కార్యక్రమంలో పాల్గొన్న సందర్భంగా ఐసీఎస్‌ఐ ప్రెసిడెంట్ మమతా బినాని తెలిపారు.
 గ్లోబల్ కార్పొరేట్ గవర్నెన్స్ కోడ్ (జీసీజీసీ)పై అవగాహన పెంచే క్రమంలో డిసెంబర్ 9,10 తేదీల్లో హైదరాబాద్‌లో ప్రత్యేక సదస్సు నిర్వహిస్తున్నట్లు మమత వివరించారు. దేశవిదేశాల నుంచి సుమారు 2,500 మంది పైచిలుకు ప్రతినిధులు దీనికి హాజరు కానున్నట్లు చెప్పారు. యువతలో వృత్తి నైపుణ్యాలపై అవగాహన పెంచేందుకు ఈ నెల 15న యువకౌశల్ పేరిట కార్యక్రమం నిర్వహిస్తున్నట్లు మమత తెలిపారు. ఐసీఎస్‌ఐ పరిధిని విస్తరిస్తూ త్వరలో దుబాయ్‌లో కూడా కేంద్రాన్ని ప్రారంభించనున్నట్లు చెప్పారు. ఐసీఎస్‌ఐ హైదరాబాద్ చాప్టర్ చైర్మన్ మహాదేవ్ తిరునగరి, కౌన్సిల్ సభ్యుడు ఆహ్లాద రావు తదితరులు ఈ కార్యక్రమంలో పాల్గొన్నారు. అటు ఐసీఎస్‌ఐ సభ్యులతో జరిగిన ఇష్టాగోష్టిలో పాల్గొన్న సందర్భంగా సంస్థ చేపడుతున్న వివిధ కార్యక్రమాల గురించి మమత వివరించారు.


 కోల్‌కతా: పారదర్శకమైన, సమగ్రమైన విధానాలతో కార్పొరేట్ గవర్నెన్స్‌కి సంబంధించిన ర్యాంకింగ్స్‌లో భారత్ 4వ స్థానాన్ని దక్కించుకుంది. కన్సల్టెన్సీ సంస్థ కేపీఎంజీ నిర్వహించిన అధ్యయనంలో అంతర్జాతీయంగా 25 దేశాల జాబితాలో మలేసియా, ఆస్ట్రేలియా సరసన నిల్చింది. ఈ విషయంలో భారత్.. చైనాను మిం చింది. అటు యూరప్, మధ్య ప్రాచ్య, ఆసియా (ఈఎంఏ) మార్కెట్ల విభాగంలో భారత్ రెండో స్థానాన్ని దక్కించుకుంది. ఆడిట్ కమిటీ లు, స్వతంత్ర డెరైక్టర్ల పాత్రను, బాధ్యతలను మరింత పెంచడం ద్వారా భారత్ మెరుగైన ర్యాంకింగ్‌లు దక్కించుకోగలిగినట్లు కేపీఎంజీ ఇండియా సీఈవో రిచర్డ్ రేకి తెలిపారు.


  న్యూఢిల్లీ: కంపెనీలు ఎగ్జిక్యూటివ్‌లకు అధిక వేతనాలు చెల్లించడం, స్వతంత్ర డెరైక్టర్లకు స్టాక్ ఆప్షన్స్ కేటాయించడం వంటి అంశాలకు ఇక చెక్ పడనుంది. ఇందుకు అనుగుణంగా మార్కెట్ల నియంత్రణ సంస్థ సెబీ కార్పొరేట్ పాలన(గవర్నెన్స్)కు సంబంధించిన నిబంధనలను పూర్తిగా సమీక్షించి తగిన మార్పులను చేపట్టింది.
 
  తాజా నిబంధనలు ఈ ఏడాది అక్టోబర్ 1నుంచి అమలుకానున్నాయి. వీటితోపాటు మ్యూచువల్ ఫండ్‌లలో రూ. 2 లక్షల వరకూ పెట్టుబడులపై పన్ను మినహాయింపులపై కూడా దృష్టిపెట్టింది. తాజా నిబంధనలను సెబీ బోర్డు గురువారం సమావేశంలో ఆమోదించింది. పన్ను మినహాయింపు అంశాల ప్రతిపాదలను ప్రభుత్వానికి పంపనున్నట్లు సమావేశం అనంతరం సెబీ చైర్మన్ యూకే సిన్హా చెప్పారు.